រដ្ឋាភិបាលកម្ពុជាបានសម្រេចបង្កើតនៅថ្ងៃទី០៤ ខែតុលា ឆ្នាំ២០២៤ នូវគណៈកម្មការរៀបចំអង្គកឋិនទានដង្ហែទៅកាន់វត្តខ្មែរក្រោមដោយមានសមាសភាពចូលរួមពីអ្នកតំណាងរាស្ត្រ មន្ត្រីរដ្ឋាភិបាល និងអភិបាលខេត្តសរុបចំនួន២២រូប។ គណៈកម្មការនេះមានភារកិច្ចរៀបចំអង្គកឋិនទានដង្ហែទៅកាន់វត្តខ្មែរក្រោមឱ្យស្របតាមប្រពៃណី និងទំនៀមទម្លាប់ព្រះពុទ្ធសាសនា។ នេះជាលើកទី១ ដែលរដ្ឋាភិបាលអាណត្តិថ្មីដឹកនាំដោយលោក ហ៊ុន ម៉ាណែតបានបង្ហាញពីសកម្មភាពផ្សារភ្ជាប់នឹងពលរដ្ឋខ្មែរក្រោម។ អ្នកវិភាគសង្គម និងនយោបាយបានសាទរ និងហៅការធ្វើបែបនេះថា រដ្ឋាភិបាលកម្ពុជាកំពុងបង្ហាញពីការរួបរួមជាតិខ្មែរ។ តែពួកគេក៏មិនភ្លេចស្នើឱ្យរដ្ឋាភិបាលគិតគូរពីសុខទុក្ខរបស់ពលរដ្ឋខ្មែរក្រោមដែលកំពុងរងការគៀបសង្កត់ពីសំណាក់អាជ្ញាធរវៀតណាមទេ៕