ភ្លាមៗ​បន្ទាប់​ពី អតីត​នាយក​រដ្ឋ​មន្ត្រី​កម្ពុជា ​លោក ហ៊ុន សែន ប្រកាស​ថា​ កម្ពុជា​បញ្ចប់​ការ​ចូល​រួម​ក្នុង​តំបន់​ត្រី​កោណ​អភិវឌ្ឍន៍​កម្ពុជា ឡាវ វៀតណាម​ (CLV-DTA)​ មាន​ប្រតិកម្ម​គាំ​ទ្រ​ពី​ច្រើន​មជ្ឈដ្ឋាន​រួម​ទាំង​អ្នក​ដែល​ធ្លាប់​តែ​ប្រឆាំង​ផង​ដែរ​។​ បើ​តាម​ ​លោក ហ៊ុន សែន ​មូល​ហេតុ​សំ​ខាន់​មួយ​ដែល​ធ្វើ​ឲ្យ​លោក​ផ្លាស់​ប្តូរ​ជំហរ​ ដោយ​ដក​កម្ពុជា​ចេញ​ពី​គម្រោង​CVL​ពេល​នេះ​ ក៏ព្រោះ​ថា ​លោក​គ្មាន​ទម្លាប់​អង្គុយ​បក់​ផ្សែង​នោះ​ទេ​ ប៉ុន្តែ​ត្រូវ​ពន្លត់​ភ្លើង​ទាំង​ស្រុង​។​ ទន្ទឹម​គ្នា​នឹង​ការ​គាំ​ទ្រការ​សម្រេច​ចិត្ត​របស់​រដ្ឋាភិ​បាល​លើក​នេះ​ ក្រុម​អ្នក​វិភាគ ​ចង់​ឃើញ អា​ជ្ញាធរ​ដោះលែង​សកម្មជន​ប្រឆាំង​នឹង​ CLV ឲ្យ​មាន​សេរីភាព​ឡើង​វិញ ​ហើយ​នោះ ​គឺ​ជា​សញ្ញា​ឈាន​ទៅ​រក​ការ​ឯក​ភាព​ជាតិ​ទាំង​ស្រុង​របស់​កម្ពុជា​ក្នុង​សំណុំ​រឿង​ព្រំដែន​។​