យោងតាមរបាយការណ៍របស់ក្រសួងសេដ្ឋកិច្ច និងហិរញ្ញវត្ថុ គិតត្រឹមត្រីមាសទី៣ឆ្នាំ២០២៤ កម្ពុជាមានបំណុលសាធារណៈសរុប១១.៧៨ពាន់លានដុល្លារអាមេរិក។ ក្នុងនោះ បំណុលប្រមាណ១១.៦៧ពាន់លានដុល្លារ ជាបំណុលដែលកម្ពុជាជំពាក់បរទេស និងដៃគូអភិវឌ្ឍន៍នានា ខណៈបំណុលចំនួន១១៥លានដុល្លារផ្សេងទៀត គឺជាបំណុលដែលខ្ចីក្នុងស្រុក។  សេដ្ឋវិទូ និងអ្នកតាមដានការវិវត្តន៍សង្គមយល់ឃើញដូចៗគ្នាថា ស្ថានភាពបំណុលសាធារណៈរបស់កម្ពុជានៅមានសុខភាពល្អ និងមិនទាន់ចាត់ទុកជាកម្រិតហានិភ័យនៅឡើយ។ តែអ្វីដែលរដ្ឋាភិបាលកម្ពុជាត្រូវប្រកាន់ខ្ជាប់នោះគឺ ការប្រើប្រាស់កម្ចីឱ្យមានប្រសិទ្ធភាព និងតម្លាភាព ជៀសវាងការប្រព្រឹត្តអំពើពុករលួយដែលបង្កហានិភ័យដល់សេដ្ឋកិច្ចជាតិ។