ក្រសួងសុខាភិបាលកម្ពុជាបានប្រាប់ឲ្យដឹងថា ក្នុង១ឆ្នាំៗ មានអ្នកកើតជំងឺមហារីកថ្មីចំនួន ២០ ០០០នាក់ ក្នុងនោះមានស្លាប់ ១៤ ០០០នាក់ ពោលមានស្លាប់ម្នាក់នៅរៀងរាល់៤០នាទី ឬស្មើនឹងប្រមាណ ៣៨នាក់ ក្នុង១ថ្ងៃ។ ប្រឈមនឹងបញ្ហានេះ ប្រមុខរដ្ឋាភិបាលកម្ពុជា លោក ហ៊ុន ម៉ាណែត បានប្រាប់ឲ្យអាជ្ញាធរពាក់ព័ន្ធពិនិត្យឲ្យបានតឹងរឹងនូវការនាំចូល សាច់ បន្លែពីក្រៅប្រទេស។ អ្នកតាមដានសង្គម និងសុខភាព បានគាំទ្រនឹងការលើកឡើងរបស់ប្រមុខរដ្ឋាភិបាល តែយល់ថាមន្ត្រីអនុវត្តច្បាប់ត្រូវមានភាពម៉ឺងម៉ាត់ និងធ្វើឡើងជាប់ជានិរន្តរ៍។