នៅ​ក្នុង​ការ​បោះ​ឆ្នោត​ឃុំ​សង្កាត់​ដែល​ទើប​តែ​កន្លង​ទៅ​នេះ គេ​សង្កេត​ឃើញ​យុវជន​ជា​ច្រើន នាំ​គ្នា​ចូល​រួម​នៅ​ក្នុង​យុទ្ធនាការ​ឃោសនា​បោះ​ឆ្នោត។ មិន​ត្រឹម​តែ​ប៉ុណ្ណោះ ពួក​គេ​យល់​ដឹង​ពី​សិទ្ធិ​នយោបាយ​របស់​ខ្លួន ហើយ​មាន​សេចក្ដី​ក្លាហាន​បង្ហាញ​ពី​ជំហរ​នយោបាយ​របស់​ខ្លួន​យ៉ាង​បើក​ចំហ ទាំង​នៅ​តាម​ទី​សាធារណៈ និង​នៅ​លើ​បណ្ដាញ​សង្គម​។ ជា​ការ​ពិត ការ​ចូល​រួម​របស់​យុវជន​នេះ មិន​ត្រឹម​តែ​ផ្ដល់​ឲ្យ​យុវជន​នូវ​បទ​ពិសោធ​ការងារ​ជាក់​ស្ដែង​ទេ តែ​វា​ថែម​ទាំង​អាច​​រួម​ចំណែក​អភិវឌ្ឍ​ប្រទេស​ជាតិ​ទៀត​ផង​​។ ប៉ុន្តែគួរ​ឲ្យ​សោក​ស្ដាយ​ដែរ ដែល​នៅកម្ពុជា នៅ​តែ​មាន​អ្នក​នយោបាយ​ដែល​និយម​យក​យុវជន​ជា​ឈ្នាន់ ដើម្បី​បំពេញ​សេចក្ដី​ត្រូវ​ការ​របស់​ខ្លួន​។ ក្នុង​បរិបទ​នេះ ​តើយុវជនប្រយ័ត្ន​ខ្លួន​យ៉ាង​ដូច​ម្ដេច ដើម្បីកុំឲ្យក្លាយខ្លួនជាឧបករណ៍របស់អ្នកនយោបាយ?