ប្រទេស​កម្ពុជា​មាន​ស្តង់​ចំនួន​៧៨ ​សម្រាប់​តាំង​បង្ហាញ​ផលិតផល​របស់ខ្លួន ​នៅក្នុង​ព្រឹត្តិការណ៍​ពិព័រណ៍​ចិន-​អាស៊ាន ​លើក​ទី​២១ ​នៅទីក្រុង​ណាននីង ​ប្រទេស​ចិន​ពីថ្ងៃ​ទី​២៤ ​ដល់​ទី​២៨​ ខែ​កញ្ញា ​ឆ្នាំ​២០២៤​។ នៅក្នុង​កិច្ចសម្ភាស​ជាមួយ​វិទ្យុបារាំង ​RFI ​លោក​ឧកញ៉ា ​តែ តាំងប៉ ​ប្រធាន​សម្ព័ន្ធ​សមាគម​សហគ្រាស​ធុនតូច ​និង​មធ្យម​កម្ពុជា​(FASMEC) និង​ជា​ប្រធាន​ក្រុមប្រឹក្សាភិបាល ​Cambodia SME Trading Co Ltd ​បានឲ្យដឹងថា​ផលិតផល​កម្ពុជា​ទទួលបាន​ការ​ចាប់អារម្មណ៍​ច្រើនពី​មហាជន​នៅប្រទេសចិន​។ ​តាមលោក​ឧកញ៉ា ​តែ តាំងប៉ ​ក្នុងចំណោម​ផលិតផល​សក្តានុពល​របស់​កម្ពុជា​មួយចំនួន ​ដំណាប់​ស្វាយ​កែវរមៀត​ជាទំនិញ​ដ៏​ពេញនិយម​នៅក្នុង​ប្រទេសចិន​។