ត្រឹមរយៈពេលតែ ១ខែ១០ថ្ងៃ នៃដើមឆ្នាំ២០២៥នេះ អគ្គិភ័យបានកើតឡើងច្រើនធៀបនឹងរយៈពេលដូចគ្នាក្នុងឆ្នាំ២០២៤ ដែលបានធ្វើឲ្យបាត់បង់ជីវិតមនុស្ស ៩នាក់ និងបំផ្លិចបំផ្លាញទ្រព្យសម្បត្តិពលរដ្ឋអស់ជាច្រើន។ នៅក្នុងកិច្ចសម្ភាសជាមួយវិទ្យុបារាំងអន្តរជាតិ RFI នាថ្ងៃទី១៤ ខែកុម្ភៈ ឆ្នាំ២០២៥ នេះ លោកឧត្តមសេនីយ៍ទោ សឿ រិទ្ធី អនុប្រធាន និងជាអ្នកនាំពាក្យនៃនាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះនៃអគ្គស្នងការនគរបាលជាតិក្រសួងមហាផ្ទៃបានថ្លែងថា អង្គភាពរបស់លោក ក៏ដូចជាថ្នាក់ដឹកនាំអគ្គស្នងការ និងក្រសួងមហាផ្ទៃមានការព្រួយបារម្ភចំពោះកំណើនអគ្គិភ័យនៅដើមឆ្នាំ ២០២៥ នេះ។