៩៤%​នៃ​ប្រជាពលរដ្ឋ​កម្ពុជា​គាំទ្រ​ឲ្យ​មាន​ការ​តម្លើង​ពន្ធ​លើ​ថ្នាំ​ជក់។​នេះ​បើ​តាម​ការ​ស្ទង់​មតិ​ដែល​ត្រូវ​បាន​លោក​វេជ្ជបណ្ឌិត មុំ គង់ លើក​មក​អះអាង។ តាម​រយៈ​លទ្ធផល​នៃ​ការ​ស្ទង់​មតិ​នេះ ​ក្រុម​អង្គការ​ដែល​ធ្វើការ​ខាង​សុខភាព បាន​ជំរុញ​ឲ្យ​រដ្ឋាភិបាល​កម្ពុជា​តម្លើង​ពន្ធ​លើ​ថ្នាំជក់​ឲ្យ​បាន​ខ្ពស់ ដើម្បី​ជួយ​សេដ្ឋកិច្ច​ជាតិ និង​កាត់​បន្ថយ​អ្នក​ជក់​បារី។ នាយក​អង្គការ​ចលនា​ដើម្បី​សុខភាព​កម្ពុជា បាន​លើក​ឡើង​ថា ការ​តម្លើង​ពន្ធ​ថ្នាំ​ជក់​ជា​ក្តី​បំណង​របស់​ពលរដ្ឋ​កម្ពុជា ពីព្រោះ​វា​នឹង​ជួយ​ឲ្យ​ពលរដ្ឋ​ប្រមាណ​២​លាន​នាក់​ឈប់​ជក់​បារី និង​មនុស្ស​ប្រមាណ​១៥០០០​នាក់​រួច​ផុត​ពី​សេចក្តី​ស្លាប់​ដោយសារ​ការ​ជក់​បារី​ក្នុង​មួយ​ឆ្នាំ​ៗ​។