To Oostern treckt dat ja wedder vele Lüüd rut in’e Natur - un dat weer ok al in ole Tieden so. Ganz besünners schöne Wöör hett dorför mal Johann Wolfgang vun Goethe in sien „Faust“ funnen. Freit Jo bi "Wi snackt Platt" op den Oosterspazeergang op Platt, översett un vördragen vun Friedrich-Hans Schaefer. Dorto stellt wi Jo dat ne'e Kinnerbook "Regen in'n Kopp" vun den Hamborger Musiker un Autor Ove Thomsen vör, dat geiht üm en negen Johr ole Deern ut de Ukrain, de bi sik an'e School een plattdüütschen Leeswettstriet wunnen hett, un wi besöökt de Plattsnackers vun'n Plattdüütschkrink in Farmsen-Berne. 25 Johr gifft dat den nu al, un an'n Dunnersdag, dor warrt dat in'n Kriegkamp 21, nich wiet weg vun'n U-Bahnhoff Berne, ok fiert.