លោក​ស៊ី ជីនពីង កំពុងតែឈានចូលកាន់អំណាច​ប្រធានាធិបតីចិន ក្នុងអាណត្តិទី៣។ អស់រយៈពេល​១០ឆ្នាំកន្លងមកនេះ ក្រោម​ការដឹកនាំ​របស់​លោកស៊ី ជីនពីង ចិនត្រូវបានគេមើលឃើញថា បានធ្វើ​ទំនើបកម្មកងទ័ព ជាមួយ​នឹងគ្រឿងសព្វាវុធយ៉ាងទំនើបអស្ចារ្យ ប្រកបដោយ​សមត្ថភាពប្រយុទ្ធយ៉ាងខ្លាំងក្លា។ លោកស៊ី ជីនពីង មិនមែនត្រឹមតែ​បានពង្រឹងកងទ័ពចិននោះទេ តែ​ទន្ទឹមគ្នានេះ ការរីកចម្រើនយ៉ាងលឿនរហ័សរបស់កងទ័ពចិន​នេះ បានធ្វើឲ្យប្រទេសផ្សេងៗទៀតក្នុងតំបន់ ខិតខំ​ប្រឹងប្រែង តាមឲ្យ​ទាន់ចិនផងដែរ។ ការប្រជែងគ្នា​ក្នុងវិស័យកងទ័ពគ្រឿងសព្វាវុធ រវាងប្រទេសក្នុងតំបន់អាស៊ីប៉ាស៊ីហ្វិកនេះ​ មិនមែនជាចំណុច​វិជ្ជមាន​នោះទេ សម្រាប់ស្ថិរភាព និង​សន្តិភាព​តំបន់​។