Óbyggðirnar kalla á KK og Magga Eiríks og Anna Halldórs upplifir Villta morgna en Quarashi kemur með nýjan tón inn í íslenska dægurlagaheiminn.

Sólstrandargæjarnir halda Partý á rassgötu 3 og stimpla sig út en Páll Óskar er Seif. Kolrassa opnar augun þín en Björgvin Halldórs dreymir kannski engil.

Gus Gus fer alveg óvart í útrás en Jet Black Joe leggur árar í bát. Damon Albarn gerist Íslandsvinur númer eitt og Blur fær júhú lánað hjá Botnleðju.

Árið er 1996

Hljómsveitin Sigur Rós fagnar 20 ára afmæli í ár og af því tilefni fara umsjónarmenn heimildaþáttaraðarinnar Árið er... Íslensk dægurlagasaga í tali og tónum yfir feril sveitarinnar.

Auk brota úr þáttunum Árið er 1994 til 2005 verður boðið upp á ný viðtöl og tóndæmi í tveimur tveggja tíma þáttum sem eru á dagskrá Rásar 2 á sumardaginn fyrsta, 24. apríl og verkalýðsdaginn, 1. maí.

Umsjón: Ásgeir Eyþórsson og Gunnlaugur Jónsson.

Hljómsveitin Sigur Rós fagnar 20 ára afmæli í ár og af því tilefni fara umsjónarmenn heimildaþáttaraðarinnar Árið er... Íslensk dægurlagasaga í tali og tónum yfir feril sveitarinnar.

Auk brota úr þáttunum Árið er 1994 til 2005 verður boðið upp á ný viðtöl og tóndæmi í tveimur tveggja tíma þáttum sem eru á dagskrá Rásar 2 á sumardaginn fyrsta, 24. apríl og verkalýðsdaginn, 1. maí.

Umsjón: Ásgeir Eyþórsson og Gunnlaugur Jónsson.

Saklaust menntaskólagrín vindur upp á sig og Sólstrandargæjarnir gera allt vitlaust í sundskýlum einum fata, útataðir í sósulit á röngum tíma í vitlausu húsi. Björk stórnar eins manns her og hvíslar ábreiðu frá sjötta áratugnum í 4. sæti breska smáskífulistans. Fjöllistahópurinn Gus Gus fæðist, Bubbi og Rúnar sjá ljósið, Sálin rís úr dvala og Fjallkonan bömpar.

Botnleðja sigrar í Músíktilraunum og Drullumallar nýja plötu á mettíma, Halli Reynis fer hring eftir hring og Súkkati finnst það Vont en það venst en Ástin dugir Páli Óskari. Tónlistarhátíð Uxi veldur usla og breska pressan fer á kostum í umfjöllun um hátíðina en Maus hræðir rokkara landsins með draugalögum.

Árið er 1995

Björk og Smekkleysa notfæra sér nýjustu tækni og koma sér fyrir á internetinu. Hin 16 ára gamla Emilíana Torrini slær í gegn í Söngkeppni framhaldsskólanna og syngur sig á topp vinsældalista landsins með hljómsveitinni Spoon. Unun veitir Ást í viðlögum og flytur Lög unga fólksins.

Maus malar Músíktilraunir og Sigur Rós fæðist í Fellahelli. Birthmark gefur út óskrifaðar skáldsögur en listræn þreyta segir til sín hjá Nýdanskri. Páll Óskar gerist Milljónamæringur en þjóðin heldur að hann sé kominn í Bogomil Font. Hárið fer á svið í Íslensku óperunni og slær öll aðsóknarmet á meðan Jet Black Joe fer í fjórða sæti á Filippseyjum. Dos Pilas ferðast á eigin vængjum og Vinir vors og blóma eru frjálsir en Spinal Tap Íslands heldur lokatónleika í Tunglinu á meðan Björk er valin besta erlenda söngkonan og besti nýliðinn á Brit Awards hátíðinni.

Árið er 1994

Ellefti þátturinn í útvarpsþáttaröðinni Árið er .... Íslensk dægurlagasaga í tali og tónum.

Meðal viðmælenda í ellefta þættinum, þar sem íslenska tónlistarárið 1993 verður tekið fyrir, eru Björk Guðmundsdóttir, Steingrímur Guðmundsson, Sigtryggur Baldursson, Páll Óskar Hjálmtýsson, Guðmundur Jónsson, Eyþór Arnalds, Andrea Gylfadóttir, Páll Rósinkranz, Pálmi Sigurhjartarson, Björgvin Ploder, Friðþjófur Ísfeld Sigurðsson, Jakob Smári Magnússon, Helgi Björnsson, Orri Harðarson, Rafn Jónsson, Óttar Proppé, Jón Ólafsson, Daníel Ágúst Haraldsson, Stefán Hjörleifsson, Bubbi Morthens, Stefán Hilmarsson, Davíð Magnússon, Máni Svavarsson og Gunnar Bjarni Ragnarsson.

Kolrassa rústar dauðarokkinu, Jet Black Joe rignir inn í íslenska tónlistarsumarið og KK hittir Vegbúann á Beinni leið á Þjóðvegi 66.

Sálin fær Þessi þungu högg beint í andlitið og springur í loft upp.Ham breytist í Helíu í Sódómu Reykjavík og málar Partýbæinn rauðan á meðan Down & Out sá Ljótum hálfvitafræjum í höfuðborginni.

Bubbi fer til Kúbu og Deep Jimi & The Zep Creams fara í útrás til Norður Ameríku en Nýdanskir Horfa til himins. Máni Svavars Veggfóðrar og finnst það vera Pís of keik. Megas yrkir um Gamansemi Guðanna en Sykurmolarnir túra með U2 og stimpla sig út.

Árið er 1992.

Níundi þátturinn í útvarpsþáttaröðinni Árið er .... Íslensk dægurlagasaga í tali og tónum. Meðal viðmælenda í níunda þættinum, þar sem íslenska tónlistarárið 1991 verður tekið fyrir, eru KK, Óttar Felix, Rúni Júl, Gunnar Jökull, Geiri Sæm, Stebbi Hilmars, Eyfi, Jón Ólafs, Egill Ólafs, Jakob Frímann, Eyþór Arnalds, Þorvaldur Bjarni, Gísli Sigmunds og Einar Örn.

Bubbi segir sögur af landi og Possibilliespiltar syngja um tunglið sitt. Langi Seli er einn á ísjaka á meðan Dr. Gunni fer aleinn í bíó en Mannakorn vilja verða Samferða.

Stjórnin spilar og syngur eitt lag enn í Eurovision á meðan útrásardraumur Rikshaw breytist í martröð. Megas syngur um Ungfrú Reykjavík. Álfheiður Björk, Hildur og Elísa koma líka við sögu og Helgi Björns hrópar Halló ég elska þig.

Björk syngur Gling gló og sér eftir því en Todmobile hræðir viðkvæma landsmenn með Pöddulaginu. Ég er afi minn og Nostradamus var ekkert merkilegri en ég en stóra spurningin er, hver er þessi maður sem er svona Ofboðslega frægur að Stuðmenn sjá sig knúna til að syngja um hann lag?

Árið er 1990

Risaeðlan rankar við sér og Bootlegs klósettskrýmslið kíkir upp á yfirborðið. Nýdönsk djammar fram á nótt, Todmobile heyrir raddir, Valgeir Guðjóns gengur heim og Síðan skein sól.

Grinders spilar fyrir fullu Tungli en það er háflóð hjá Bubba og nóttin er löng. Sykurmolarnir syngja á íslensku og ensku, hljómsveitin Ham breiðir yfir Abba og alls staðar er fólk. Í útvarpinu heyrði HLH flokkurinn lag og Langi Seli syngur Breiðholtsbúgí. Krummi skýtur föstum skotum í átt að tónlistarmönnum þjóðarinnar en enginn sér Daníel Ágúst á sviðinu í Lausanne í Sviss. Bróðir Darwins fer í sirkus, Geirmundur lætur sönginn hljóma og yrkir í sandinn í syngjandi sveiflu en stóra spurningin er: Hvar er draumurinn?

Árið er 1989