Cun in concert da benefizi per l'Ucraina en la Isarphilharmonie a München. Anne-Sophie Mutter, violina – e musicistas e musicists dals Münchner Philharmoniker, dal orchester sinfonic dal Bayerischer Rundfunk e dal orchester statal da la Bavaria, dirigent Lahav Shani.

La guerra en l'Ucraina che ha cumenzà ils 24 da favrer cuntinua, victima è adina dapli la populaziun, dunnas ed uffants. Per gidar en questa situaziun desperada datti bleras acziuns da sustegn e benefizi, uschia er da vart da la cultura. Ils 8 da mars hai dà in concert per sustegnair l'organisaziun «Save the Children», salvai ils uffants.

Sin il palc: Anne-Sophie Mutter, la violinista da renum internaziunal e musicistas e musicists dals Münchner Philharmoniker, dal orchester sinfonic dal Bayerischer Rundfunk e dal orchester statal da la Bavaria, cun il dirigent Lahav Shani. Sin il program: Duas ovras econuschentas da Ludwig van Beethoven – il Concert per violina ed orchester en D dur, e la sinfonia No. 5 in C moll.

Ils ensembles da musica populara da la Scol'auta da Lucerna concertescha ensemen cun l'ensemble dal Mozarteum da Salzburg. 

L'ensemble Alpinis (CH) e l'ensemble Mozarteum (A) han exercità intensivamain durant in'emna lur producziuns per il concert al festival Alpentöne 2021. Igl è gartegià a las duas formaziuns da cumbinar musica populara svizra e musica populara austriaca da moda interessanta e fitg divertenta. In vair gust per las ureglias d'udir, co che las studentas ed ils students da las duas scolas autas sunan lur tocs en cumplaina armonia.

Il saxofonist Pius Baumgartner preschenta l'instrument che ha in'interessanta istorgia.

Inventà e dà il num a l'instrument ha Adolphe Sax, in Beltg. A Paris ha el preschentà quel per l'emprima giada l'onn 1842 e l'interess è stà grond. Il 1846 ha el survegnì la patenta per ses instrument nov.

Cumponists da musica classica han cumenzà a cumponer ovras per saxofon. Pli grond success ha il saxofon dentant gì en il jazz. En ils Stadis Unids ha cumenzà l'unda da big-band. Per quest gener da musica è il tun dal saxofon centrals. Da la big-band, sur il bepop ed autras furmas da jazz ha il saxofon chattà ses plaz en la musica da rock e pop dentant er en la musica populara.

Vita e carriera dal grond virtuos da trumbetta ch'è mort avant 10 onns.

Maurice André è stà in talent da natira a la trumbetta. Ses tun dutsch, sias cadenzas, sia virtuositad èn nunemblidaivla. El è daventà ina legenda sin la trumbetta classica, dentant er jazz ha el apprezià.

En l'emissiun repassain sia vita e ses emprims tuns sin l'instrument ch'el ha auzà sin in nov nivel. Grazia a Maurice André è la trumbetta anc ozendi uschè enconuschenta ed ha gronda reputaziun sco instrument da solo.

Ella cuntegn bler: resuns d'ina uffanza en Russia, umor, sensualitad ed elements che furman ina punt tranter romantica tardiva e moderna. En quest Artg musical è ella la suletta protagonista: la musica da Paul Juon.

Ils 6 da mars 1872 nascha Paul Juon a Moscau. El è il biadi dad in tschert Simon Juon da Masein, emigrà il 1826 en Lettonia. L'uffanza ed ils onns da studi passenta Paul Juon en Russia. Cun 26 onns sa renda el a Berlin, nua ch'el lavura a l'Academia roiala da musica. En Germania chatta el era in editur per sias ovras. En il decurs da sia vita survegn el varsaquants premis e blera renconuschientscha per sia musica. In onn suenter la surpigliada da la pussanza entras ils Naziunalsocialists vegn el a viver en Svizra, nua ch'el mora il 1940.

Durant ils decennis suenter sia mort è ses opus dentant ì in zic en emblidanza. Forsa pervia da sia vita tranter naziuns (durant sia vita ha el possedì 3 naziunalitads), ubain forsa era pervia da ses stil che na para betg «modern» avunda per il temp suenterguerra.

Mo dapi ils onns 90 chatt'ins puspè pli savens ovras da Paul Juon sin programs da concert. Enconuschentas èn cunzunt sias ovras da musica da chombra che furman era quantitativamain la gronda part da l'opus.

A chaschun dal 150avel anniversari dal cumponist vul la Societad internaziunala Paul Juon  ussa dar in stausch a sias ovras per orchester: Bainprest vegn a cumparair in'ediziun che cuntegna diversas ovras nunpublitgadas.

Il 2014 sin il palc dal Dracula Club.

Il chantautur oriund da Palermo viva dapli blers onns a Turitg. Sia carriera ha cumenzà en Svizra e cun ils onns ha el er fatg in return musical en Italia. Ina patria ch'el aveva bandunà – frustrà pervi da la criminalitad e la situaziun durant ils onns 80. Cun sias chanzuns cleras ed intensivas ha el chattà bainspert ses public, er collavurond cun auters chantauturs sco Linard Bardill, Konstantin Wecker ubain Werner Schmidbauer e Martin Kälberer.

Da chasa sin il palc

Il meglier sa senta Pippo Pollina sin il palc, quai è ses element e là sa mussa sia gronda fermezza: la preschientscha, l'intensitad, la melanconia ed er ses umur. El ha fatg numerus concerts en tut l'Europa, blers en Svizra ed er en il Grischun. Ils 31 da fanadur 2014 è el stà per la segunda giada sin il palc en il Dracula Club al Festival da Jazz a San Murezzan, e la registraziun da ses concert emettain nus en l'Artg musical.

Raul Midón sin il palc dal Festival Jazz Baltica: in um, sia vusch e la ghitarra.

Raul Midón è in chantautur e ghitarrist da New Mexico, in um cun ina vusch extraordinaria e marcanta. Tut sulet sin il palc mussa el ina preschientscha incredibla, va tras tut ils stils e geners da musica, dal jazz, blues, R&B, folk e soul. Sia carriera musicala ha el cumenzà sco chantadur per stailas da la musica da pop sco Shakira, Jennifer Lopez, Christina Aguilera, Ricky Martin, Julio Iglesias e José Feliciano. Dapi il 2002 è el solist, ha realisà divers discs e collavurà cun stars sco Jason Mraz, Herbie Hancock, Marcus Miller ubain Paquito D'Rivera.

Ses concert dal 2021 al festival Jazz Baltica, al Timmendorfer Strand en Germania dal Nord, è vegnì mess a disposiziun dal barat da musica da la EBU. Gist suenter udis parts d'in segund concert da quest barat: The New York Blue Note Quintet cun in tribut a Charlie Parker, in dals musicists ils pli genials dal temp dal bebop.

L'atun 2021 hai dà a Berna ina conferenza cun experts internaziunals davart la musica vocala svizra dal 19 fin 21avel tschientaner. Sco conclusiun da la conferenza hai dà in concert che RTR ha registrà. En quel èn d'udir duas primaudiziuns ed ulteriura musica vocala da cumponists svizzers. Er la musica rumantscha è represchentada cun in'ovra da Gion Antoni Derungs.

En l'emissiun vegn er a pled Willi Derungs. Il dirigent oriund da la Val Lumnezia viva dapi blers onns a Berna ed è stà iniziant da la conferenza.

Dapi decennis datti la stad en divers lieus en il Grischun concerts dal Calamus-Trio. L'Artg musical emetta quel da la stad 2021.

Ils clarinettists Josias Just, Martin Zimmermann e la pianista Alena Cherny han ina gronda cuminanza da fans che spetgan cun brama lur turnea da concert. Er la stad 2021 ha il trio divertì in grond auditori, tranter auter er en la baselgia son Martin a Cuira. Quest concert è stà sut l'ensaina da musica populara, la ragisch da tutta musica insumma. En lur concert han els fatg in viadi musical en divers pajais europeics.

Orchesters d'instruments a flad han ina lunga tradiziun en Svizra. Da las bun 1'900 societads da musica en l'entir pajais sunan radund 1'400 en furmaziuns d'armonia u d'instruments a flad. Ina tala quantitad motivescha natiralmain er ils cumponists svizzers da scriver litteratura per quest gener da musica.

En l'Artg musical tadlain ovras da cumponists svizzers da la generaziun veglia ed er ovras da cumponists da la generaziun pli giuvna.