លោក ពីន សំខុន ​ដែលមានវ័យជាង​៧០ឆ្នាំ​ទៅហើយ ​កាលពី​ពេលថ្មីៗនេះ ​បានប្រកាសចូល​ប្រឡូកនឹង​កិច្ចការ​នយោបាយ​ឡើងវិញ​ បន្ទាប់ពីលោក​ស្ថិតនៅស្ងាត់ស្ងៀម​អស់រយៈពេល​២ទសវត្សរ៍​។ ​លោកជា​អតីត​ប្រធានសមាគម​អ្នកកាសែតខ្មែរ​ និងជាអតីត​ប្រធានវិទ្យុ​អាស៊ីសេរី​ជាខេមរភាសា ​ក្រោយមក​ជាអ្នកនយោបាយ​មួយរូប​នៃអតីត​គណបក្សសង្គ្រោះជាតិ​នៅក្រៅប្រទេស​។​ តាមលោក ពីន សំខុន​ ការដែលលោកចូល​ប្រឡូក​ក្នុងឆាក​នយោបាយ​ តាមរយៈ​គណបក្ស​កែទម្រង់កម្ពុជា​ ដែលមានលោក​ អ៊ូ ច័ន្ទរ័ត្ន​ ជាស្ថាបនិកនោះ ​គឺដោយសារតែ​ប្រទេសកម្ពុជា​មួយរយៈនេះ ​មិនមាន​គណបក្ស​ប្រឆាំង​ ដើម្បី​តទល់​ជាមួយបក្ស​កាន់អំណាច​ ក្នុងការនាំយក​មកវិញនូវ​លទ្ធិប្រជាធិបតេយ្យ​ពហុបក្ស​។​