តុលាការកំពូល​នៃសាលាក្តី​ខ្មែរក្រហម​ នៅថ្ងៃទី១៦​ខែសីហា ​ខាងមុខនេះ ​នឹងបើក​សវនាការ​លើបណ្តឹង​សារទុក្ខ​ ដែលស្នើឡើង​ដោយជនជាប់ចោទ​ ខៀវ សំផន​ ក្នុងសំណុំរឿង​ ០០២/០២ ដោយលោក​ស្នើសុំច្រានចោល​ទោសទណ្ឌនានា​ ដែលតុលាការ​បានផ្តន្ទាលើ​រូបគាត់​កន្លងមក​។​ សវនាការនេះ​ នឹងគ្រោងធ្វើ​ឡើងរយៈពេល​៤ថ្ងៃ ​ដោយអនុវត្ត​ទៅតាមបទដ្ឋាន​សុខាភិបាល​ជាក់លាក់​ ក្នុងបរិបទ​នៃការរាត្បាត​ជំងឺ​កូវីដ-១៩នេះ។​ លោក នេត្រ ភក្ត្រា ​ប្រធានផ្នែក​កិច្ចការ​សាធារណៈ​នៃសាលាក្តីខ្មែរក្រហម​ បានថ្លែងឲ្យដឹងថា​ ជនជាប់ចោទ​ លោក ខៀវ សំផន ​អាយុ ៩១ឆ្នាំ ​ដែលបានទទួល​វ៉ាក់សាំង​ការពារ​ជំងឺកូវីដ-១៩​ ២ដូសហើយនោះ ​មានសុខភាពល្អ​ជាទេ ​និងត្រៀមចូលរួម​សវនាការ​ផ្តាច់ព្រ័ត្រនេះ ​មិនឲ្យខកខានឡើយ​។