Usiabudu kwa hofu kama vile kwa wizi wizi. Mungu wetu amehakikisha kwamba tunakuwa salama ili tumuabudu bila hofu. Tena kila ukifanyacho kifanye kama kwa Bwana, ni ibada yako kwa Bwana. Usifanye kwa woga. Biblia inasema usiogope. 

Maadui zetu sisi tuaminio ni maadui za Bwana Mungu wetu. Na Mungu wetu ni Mungu afurikiaye adui zake kama mto ufurikao. Kwa hiyo hatuna haja ya kuogopa kwa sababu Mungu wetu anawafurikia adui zetu.

Tunapojitia nguvu katika Bwana kwa yale tunayopitia tunapaswa kufahamu kuwa maandiko yanasema Furaha ya Bwana ndiyo nguvu zetu. Tena imeandikwa Furahini katika Bwana siku zote, tena nasema furahini. Namna ya kuchota katika baraka za wokovu wetu ni kwa furaha. Usinunenue mpendwa wala kwenda katika huzuni kila wakati ukidhani huo ndiyo utakatifu. Usiogope bali furahi katika Bwana.

Biblia inatuambia tusiende kama waendavyo wasioamini, wala tusiogope kama wao waogopavyo. Sisi tunapaswa kumtakasa Mungu wetu mioyoni mwetu. Usiogope yuko Bwana wa majeshi kukulinda.

Tumepewa Roho Mtakatifu adumuye ndani yetu, na siyo roho ya hofu. Kwa hiyo usiogope. Kama hofu inakusumbua jitahidi kumngoja Bwana. Uwe hodari, upige moyo konde na umngoje Bwana- utaona hofu inavyokimbia mbali nawe.

Moja ya madhara makubwa sana ya woga ni kutuzuia tusiwekeze tukiogopa kuingia hasara au kutojua yatakayotokea. Hii ni mbaya sana kwa sababu fursa huwa zimefungwa na muda kwa hiyo wakati unasitasita muda unakwenda na fursa hupotea. Kwa hiyo usiogope kuwekeza, tumia fursa zilizopo. Biblia inasema usiogope.

Ukiwa Mkristo uwe na uhakika lazima maadui waibuke. Na katika maisha huwezi kufanya mambo makubwa pasipo kusababisha watu wainuke dhidi yako kwa uadui. Lakini usiogope maadui, Biblia inasema usiogope.

Hata wakati unapitia dhiki, taabu na udhia, bado imani yako isitindike ukadhani Mungu amekuacha. Usiogope maana Mungu wako bado yuko nawe.

Kama Bwana Mungu alivyomuokoa mtumishi wake Daniel alipotupwa katika tundu la simba, ndivyo hivyo Bwana anaweza kukuokoa na wewe pia. Unapoangukia katika mikono ya waovu usiogope kwa sababu Mungu wako anakulinda. Biblia inasema usiogope.