Wachawi wote wanatumika chini ya baba yao shetani, yule nyoka wa zamani. Kwa hiyo wao ni kama baba yao yaani nyoka. Kama umeokoka, siyo tu kwamba Mungu anakulinda dhidi ya adui, bali Kristo amekupa mamlaka ya kukanyaga nyoka na ng'e na nguvu zote za adui. Huna haja ya kuogopa...

Watu wengi na hata Wakristo wameshikwa na hofu kubwa ya uchawi au kulogwa. Yaani inafika mahali maamuzi ya mtu yanakuwa yanategemea sana suala la kulogwa, ingawa yeye ni Mkristo. Unaogopa kuishi mahali kwa sababu kuna wachawi, unaogopa kwenda mahali kwa sababu ya wachawi, wengine mpaka wanaogopa kulala usiku kwa sababu ya wachawi.  Sikiliza somo hili upate kujifunza mambo ya msingi ya imani yetu ili ujue kwamba hupaswi kuogopa wachawi bali wao ndio wanapaswa wakuogope. Kama umeokoka unaye Mkuu ndani yako kuliko aliyeko ulimwenguni.

Katika mambo magumu unayopitia na kipindi kigumu ulichokikabili kwa muda sasa, pamoja na mateso yote yanayokusonga, usikate tamaa wala usiogope. Mungu ameahidi siku za kurejeshwa ambapo nuru itarudi usoni mwako na furaha itajaa moyoni. Ingawa ulihenya na kuwa ishara ya laana, au alama ya chukizo na kielelezo cha namna mtu anavyoweza kuporomoka, Bwana ameahidi kuinuliwa kwako mpaka iwe alama ya jinsi Bwana anavyoweza kubariki na ishara ya vile Mungu huinua. Walionyoosha kidole kwako kuonyesha aibu yako watanyoosha vidole kwako kuonyesha uzuri wako. Yote yatafanyika ili Bwana ajipatie utukufu zaidi. Ndivyo Biblia inavyosema kwako unayemtumaini Bwana Mungu, Yeye Jiwe la Israeli. Sikiliza ubarikiwe, na mshirikishe na ndugu wa karibu baraka hizi.

Mtu anayemwamini Yesu Kristo, na mafundisho yake, hana haja ya kuogopa kifo. Yesu alikuja kutuweka huru, kwa hiyo sisi tunaoamini siyo watumwa tena. Waebrania 2:14,15 imesema “Basi kwa kuwa watoto wana nyama na damu, Yeye pia alishiriki katika ubinadamu wao, ili kwa kifo chake, apate kumwangamiza huyo mwenye nguvu za mauti, yaani, Shetani, na kuwaweka huru wale waliokuwa utumwani maisha yao yote kwa sababu ya kuogopa mauti.”

Kwa hiyo, tunajua kwamba kuwa huru katika Kristo Yesu inamaanisha pia tusiogope kifo. Sikiliza kipindi hiki uelewe zaidi tukianzia na maneno ya Yesu kwamba “Amin, amin, nawambia, yeye anayeamini anao uzima wa milele” (Yohana 6:47). Uzima wa milele maana yake hakuna kifo.

Mara unapobidi kukabiliana na upinzani wa aina yeyote ile, mtu au vitu au mazingira, usiogope. Mara nyingine unakabiliana na adui anayeonekana ana uwezo kuliko wewe, ana nguvu kuliko wewe, ana nyenzo kuliko wewe na hata kama maadui ni wengi kuliko wewe, bado usiogope. Kwa sababu upande wako yuko Mungu mtenda maajabu asiyeshindwa. Usiogope unapotoka kukabiliana na upinzani.

Habari zanakuja na uvumi pia, lakini mara nyingi ni habari mbaya tu za kusikitisha na kutisha. Usiogope wala usitahayari kwa sababu Bwana Mungu yuko nawe. Hata katika nyakati hizi za mwisho ambapo hukumu inaenda kumwagwa juu ya waishio juu ya nchi bado usiogope kwa sababu wewe unayemuamini Yesu Kristo una chapa yake na hakuna hukumu ya adhabu juu yako. Usiogope habari utakayoisikia, Biblia inasema usiogope. 

Katika maisha yetu ya kila siku huwa tunapitia changamoto mbalimbali; kesi za kusingiziwa, kutafutwa na watu walighadhabika dhidi yetu, kupita katika nyakati zenye shida na mateso kwetu au watu wetu wa karibu, magonjwa yenye kutishia uhai wa wapendwa wetu, na kadha wa kadha. Haya mambo huweza kutusononesha moyo na kutufanya tufadhaike, na kufadhaika husababisha woga ndani yetu. Yesu Kristo anasema amani ametuachia, tusifadhaike mioyoni wala kuwa na woga. Kwa hiyo katika yote yanayotokea usitoke katika imani. Imani katika Kristo Yesu itakufanya ubaki na amani ya Kristo Yesu na hutafadhaika wala kuwa na woga. Kumbuka Biblia inasema usiogope.

Wakati shida nyingi zimekusonga, changamoto za maisha ni kubwa sana kiasi cha kujiona mdogo sana mbele ya hayo yanayokukabili, kumbuka usijiangalie wewe bali muangalie Bwana aliyezifanya mbingu na nchi. Msaada wako u katika Bwana, Yeye afanyaye njia mahali pasipo na njia ndiyo awe kimbilio lako siku zote. Hapo hutaogopa kitu. Biblia inasema usiogope.

Kazi ya Mungu, ule wito ulio nao, ile kazi ambayo ndiyo hasa Mungu amekuweka hapa duniani uifanye lazima iamshe uadui na upinzani mkubwa dhidi yako. Lakini hakika ujue kwamba ugumu huu siyo dhidi yako tu lakini ni namna ambayo shetani anapingana na kusudi la Mungu hapa duniani na pia juu yako. Kwa hiyo hata katika ugumu huo unaopitia usikate tamaa na wala usikae legelege kwamba umeshindwa. Endelea kupambana, endelea kujitia nguvu katika Bwana, simama katika imani. Usiogope.

Unapokuwa katika wito wako, katika kazi ambayo Bwana amekuita ukaifanye, mambo huwa siyo marahisi. Kazi huweza kuwa ngumu tena zenye kuhatarisha maisha. Mara nyingine, kama ni kazi ambayo kulikuwa na mtangulizi kabla yako unakuta yule mtangulizi anaonekana bora kuliko wewe mara mia moja. Lakini kama ni wito wako, ni kazi ambayo Mungu anataka uifanye basi ni neema tu wala siyo kutokana na ubora wowote kwa upande wako. Hivyo muamini aliyekuita katika kazi hiyo, Mungu Mwenyezi. Uwe hodari katika neema. Usiogope.