Wakati unapita kwenye changamoto mpaka unatamani kukata tamaa kabisa, au jambo gumu sana kiasi cha kuona kwamba hakuna lolote linaweza kufanyika tena. Kumbuka neno la Yesu Kristo, Usiogope, Amini tu. Simama thabiti katika imani yako. Kuwa shujaa usiogope.

Kila mwaka inapofika wakati wa kusherehekea sikukuu ya Pasaka, yaani kufufuka kwake Yesu Kristo msalabani, kumbuka suala moja la msingi sana- kushindwa kwa mauti. Kutokana na Yesu kufufuka katika wafu mauti imeshindwa milele kwa sababu Yesu anaishi milele. Na ndio maana mahali pengine ameitwa mzaliwa wa kwanza wa waliokufa, siyo kwa sababu yeye ndio wa kwanza kufufuka- manabii Elia na Elisha walitumiwa kufufua wafu pia, yeye ndio wa kwanza kufufuka katika wafu na kuishi milele. Hii ni alama kwetu kwamba wote waliolala katika imani watafufuliwa na kuishi milele pamoja nae. Kama yeye mwenyewe alivyosema mtu akimuamini hata akifa bado anaishi. Mauti imeshindwa, kwa hiyo usiogope mauti kwa sababu haina kitu kwako. Biblia inasema usiogope.

Inapofika mahala maisha yako yanataka kukatishwa na shetani, au biashara yako inataka kufa, au kazini vita imeinuka ili kukukatisha, hapo unapaswa kukumbuka maandiko na kukiri kwamba "Sitakufa bali nitaishi, nami nitayasimulia matendo ya Bwana". Kwa neno hili na imani yako katika Bwana Mungu wako ndani ya Kristo Yesu uwe hodari na usiogope. Biblia inasema usiogope.

Haya ni mafundisho ya Biblia yanayolenga kukupa ujumbe kwamba usiogope chochote wala yeyote. Sikiliza hii podcast kila jumatatu hapa kwenye anchor fm na katika platforms nyingine za podcast. Pia unaweza kuisikiliza kupitia pastormsafiri.blogspot.com

Mafundisho haya yanaandaliwa nami Pastor Msafiri.

Barikiwa.

Unapomuweka Bwana Mungu kama nuru yako na ngome yako maishani mwako hauna haja ya kuogopa yeyote wala chochote. Huna haja ya kuogopa kwa sababu yeye Bwana anakuzunguka kukulinda, anakupatia mahitaji yako wewe na nyumba yako. Amani yako iwe ni ya Mungu wako katika Kristo Yesu. Usiogope.

Zipo nyakati ambazo unakutana na changamoto kubwa sana au adui hodari sana kuliko wewe. Kwa kila kipimo cha kibinadamu nyakati kama hizi mtu hujiona mdogo sana na mnyonge mbele ya yale yanayokabiliana nawe. Unajiona mdudu tu usiyefaa kitu. Maandiko yanasema "usiogope Yakobo uliye mdudu..." kwa sababu Mungu wako yuko nawe kukupigania na kutetea. Kwa hiyo hata katika nyakati ngumu kama hizi bado simama katika imani yako katika Kristo Yesu ukijua ya kwamba Mungu wetu anaweza kukuokoa. Usiogope. Biblia inasema usiogope.

Siku ya hofu yako inapokuja, mtumaini Bwana Mungu wako. Usiogope. Wajapokuwapo maadui wamekuzunguka wakitaka kula nyama yako, mkimbilie Bwana MUNGU wako naye atakuokoa. Kama mkondo ufurikao atawafurikia adui zako. Ahadi zake ni za kweli muamini.

Katika maisha tufani na dhoruba zipo kama vile katika meli inavyopita baharini kuelekea mahali fulani. Lakini kama vile tufani ilivyovunja meli iliyokuwa imemchukua Paulo kama mfungwa kwenda Roma kwa Kaisari lakini yeye na wengine wote walifika sehemu waliyokuwa wanaenda, yaani Roma, ndivyo ambavyo Mungu atakufikisha mahali unapaswa kufika hata kama dhoruba na tufani zitavuma. Usiogope.

Maamuzi magumu yana changamoto sana kuyafanya kwa sababu huwa yanakuweka katika nafasi hatarishi sana. Mara nyingine hatari ya kuporomoka hadhi ya maisha, kuonekana kituko au hata kifo. Hata hivyo kufanya maamuzi magumu huwa kunafungua milango ya kubarikiwa na kwenda viwango vikubwa hasa pale maamuzi hayo yanapokuwa ni mapenzi matimilifu ya Mungu. Kwa hiyo ili kwenda mbali kimaisha, usiogope kufanya maamuzi magumu. Biblia inasema usiogope.

Usiogope mabaya yanayokuzunguka; upanga, hukumu, tauni au njaa. Mtafute Bwana, mlilie wakati wa shida naye atakuokoa. Usiogope.