Erna Kristín Bjarnadóttir, sem missti allt sitt í eldsvoða við Ásbrú í morgun meðtók það ekki þegar hún sá lögreglu og slökkvilið að störfum fyrir utan húsið heldur fór einfaldlega að gráta. Hún reiknar með að fjölskyldan þurfi að byrja allt upp á nýtt. Sólveig Klara Ragnarsdóttir talaði við Ernu. Freyr Gígja Gunnarsson tók saman.

Ekkert í framburði mannsins sem var skotinn á Blönduósi varð til þess að hann fékk stöðu sakbornings í málinu, að sögn lögreglustjóra. Það hafi aðeins verið gert til að veita honum meiri réttindi en ella. Ágúst Ólafsson sagði frá.

Til að eldri borgarar geti verið lengur heima þarf fé segir María Fjóla Harðardóttir, formaður Samtaka fyrirtækja í velferðarþjónustu, hins vegar spari það peninga til lengri tíma. Ingibjörg Sara Guðmundsdóttir talaði við hana.

Ísraelski herinn segir afar líklegt að ísraelskur hermaður hafi skotið fréttamann Al Jazeera til bana á Vesturbakkanum í maí. Lögmaður hersins útilokaði þó að hermaðurinn verði sóttur til saka. Þórgnýr Einar Albertsson sagði frá.

--------------

Liz Truss, verðandi forsætisráðherra Bretlands, lofar afgerandi aðgerðum til að rétta af efnahag landsins og koma almenningi til aðstoðar vegna síhækkandi verðlags á nauðsynjavörum. Ásgeir Tómasson tók saman.

Þjóðarátak þarf til að laga Íslendinga að loftslagsbreytingum sem framundan eru og tíminn er knappur. Þetta segir Guðlaugur Þo?r Þórðarson, umhverfis-, orku- og loftslagsráðherra. Hafdís Helga Helgadóttir talaði við hann.

Hvorki í ár né á því næsta verða samræmd próf lögð fyrir í grunnskólum. Mennta- og barnamálaráðuneytið greindi frá því í síðustu viku að unnið væri að þróun á nýju námsmati; Rúnar Sigþórsson prófessor emeritus við Háskólann á Akureyri segir deilur um samræmt próf nærri jafngömul skyldunámi í landinu. Hann fagnar því að þróa eigi nýtt námsmat og færa nær skólunum en telur erfitt að tvinna saman endurgjöf til nemenda og upplýsingasöfnun um skólakerfið.

Umsjón: Anna Kristín Jónsdóttir. Tæknimaður: Kormákur Marðarson. Stjórn útsendingar fréttahluta: Margrét Júlía Ingimarsdóttir.