ក្រសួង​សុខាភិបាល​នៅ​ព្រឹក​ថ្ងៃ​ទី​ ១១​ វិច្ឆិកា​ បាន​ចេញ​មក​ច្រាន​ចោល​ជា​បន្ត​បន្ទាប់​នូវ​ព័ត៌មាន​ក្លែងក្លាយ​ និង​ព័ត៌មាន​មិនពិត​ ដែល​ត្រូវ​បាន​ផ្សព្វផ្សាយ​ដោយ​ជន​ណា​មួយ​ ឬ​ក្រុម​ណា​មួយ​ ទាក់ទង​នឹង​ស្ថានភាព​នៃ​ជំងឺ​កូវីដ១៩​នៅ​ក្នុង​ប្រទេស​កម្ពុជា​។ ព័ត៌មាន​ក្លែងក្លាយ ​ដែល​ត្រូវ​បាន​បំផុស​ឡើង​ជា​បន្ត​បន្ទាប់​តាម​រយៈ​បណ្តាញ​សង្គម​ ហើយ​ត្រូវ​បាន​គេ​ចែក​រំលែក​តៗគ្នា​ ដូចជា ​ករណី​ស្ថានភាព​សុខភាព​របស់​មន្ត្រី​ជាន់ខ្ពស់​រដ្ឋាភិបាល​កម្ពុជា​ ឬ​ករណី​ឆ្លង​ទៅ​លើ​មន្ត្រី​ជាន់ខ្ពស់​រដ្ឋាភិបាល​ជាដើម​។ ជុំវិញ​ករណី​នេះ​ អ្នក​នាំ​ពាក្យ​ក្រសួង​សុខាភិបាល​លោកស្រី​ វេជ្ជបណ្ឌិត​ ឱ វណ្ណឌីន ​បាន​អំពាវនាវ​អោយ​ប្រជាពលរដ្ឋ​កុំជឿ​ និង​ត្រូវ​បែងចែក​អោយ​បាន​ច្បាស់​នូវ​ព័ត៌មាន​ណា​ពិត​ និង​ព័ត៌មាន​ណា​ក្លែងក្លាយ​ មុន​នឹង​ធ្វើការ​ចែក​រំលែក​។