ការចាប់ខ្លួន ចោទប្រកាន់ និង ឃុំខ្លួនលោករ៉ុង ឈុន ដោយសារតែនិយាយពាក់ព័ន្ធនឹងបញ្ហាព្រំដែនរវាងកម្ពុជា និងវៀតណាមនៅក្នុងខេត្តត្បូងឃ្មុំកំពុងក្លាយជាបញ្ហាដ៏ចម្រូងចម្រាស។ អ្នកគាំទ្រ និង សាធារណជនខ្លះដែលយល់ថា ការនិយាយរបស់លោករ៉ុង ឈុន គ្រាន់តែជាការបញ្ចេញមតិ និងគ្មានកំហុស បាននាំគ្នាធ្វើយុទ្ធនាការទាមទារឱ្យដោះលែងលោករ៉ុង ឈុន តាមរយៈការជួបជុំគ្នាផ្ទាល់ និង តាមហ្វេសប៊ុក។ ក្រៅពីភាពចម្រូងចម្រាសនៅក្នុងប្រទេសនេះ អ្នកតាមដាន និងសង្គមស៊ីវិលខ្លះក៏បានមើលឃើញថា បញ្ហាចាប់ខ្លួននេះ ក៏នឹងបន្ថែមការប៉ះពាល់ដល់ការអនុវត្តដកប្រព័ន្ធអនុគ្រោះEBAខ្លះពីកម្ពុជាផងដែរ ពោល គឺអាចជំរុញឱ្យដកបានជោគជ័យតែម្តង។ ប៉ុន្តែអ្នកនាំពាក្យរដ្ឋាភិបាលកម្ពុជាបានគូសបញ្ជាក់ថា បញ្ហាអាទិភាពរបស់រដ្ឋាភិបាល គឺសន្តិភាព និងស្ថិរភាពក្នុងសង្គម ហើយរឿងអ្វីផ្សេងជាបញ្ហាបន្ទាប់បន្សំប៉ុណ្ណោះ។