ពលរដ្ឋ​យ៉ាងហោចណាស់​ជាង៣០នាក់​ស្លាប់ដោយសារ​ករណី​ពុលស្រាស​និងស្រាថ្នាំ​នៅរវាង​ខែឧសភា​និងខែមិថុនា​នេះ​។ ក្នុង​ចំណោមអ្នកស្លាប់​ទាំងជាង៣០​នាក់នេះស្ថិតក្នុង​ ខេត្តកណ្ដាល ​ខេត្តកំពត​ និងខេត្តពោធិ៍សាត់​។​ បើតាម​អាជ្ញាធរ​មូលដ្ឋាន​បានបង្ហាញ​មូលហេតុ​ស្រដៀងគ្នាថា ​ករណី​ពលរដ្ឋពុលស្រាស​ និងស្រាថ្នាំ​ដោយសារស្រាទាំងអស់នោះ ​មានជាតិ​មេតាណុល​ខ្ពស់​ ហើយសិប្បកម្ម​ផលិតស្រាមួយ​ចំនួនគ្មាន​លិខិត​អនុញ្ញាត្ត​ពីក្រសួងជំនាញ​។​ ជាការកត់​សម្គាល់​ករណី​ពុលស្រានៅ​តាមមូលដ្ឋាន​នេះមិនមែន​ជារឿងថ្មីនោះទេ ​ប៉ុន្តែដំណោះស្រាយ​ដាក់ដូចគ្មានប្រសិទ្ធភាព​សោះ។​   សម្រាប់​ក្រុមអង្គការ​សង្គមស៊ីវិល​ពួកគេយល់ឃើញថា​ ដើម្បី​ទប់ស្កាត់​ករណី​ពុលស្រា ​កម្ពុជា​ពន្លឿន​ការចេញច្បាប់​ស្ដីពីការ​គ្រប់គ្រង​គ្រឿងស្រវឹង​។ ​ច្បាប់ស្ដីពី​ការគ្រប់គ្រង​គ្រឿងស្រវឹង ​បើតាមសង្គមស៊ីវិល​បានជាប់គាំង​នៅត្រឹមគណៈរដ្ឋ​មន្ត្រីតាំងពីឆ្នាំ២០១៥​មកម្លេះ​។