ទីផ្សារ​ទាំង​តូច​ទាំង​ធំ​ជា​ច្រើន​ នៅ​រាជធានី​ភ្នំពេញ​ត្រូវ​អាជ្ញាធរ​ប្រកាស​បិទ​ជា​បន្តបន្ទាប់​គ្នា​ ក្រោយ​ពី​រកឃើញថា ​ទីផ្សារ​ទាំង​អស់​នោះ​ជា​កន្លែង​ឆ្លង​រាលដាល​ជំងឺកូវីដ-១៩ ​ដ៏​ច្រើន​សន្ធឹក​សន្ធាប់​។ ការ​បិទ​ទីផ្សារ​នេះ ​ត្រូវ​បាន​ស្វាគមន៍​ជា​ទូទៅ ​ក្នុង​គោល​បំណង​កាត់​ផ្តាច់​ការ​ឆ្លង​រាលដាល​ជំងឺ​កូវីដ-១៩​។ ក៏​ប៉ុន្តែ​ការ​បិទ​ទីផ្សារ​ ស្រប​ពេល​នឹង​ការ​បិទខ្ទប់​ការ​ចល័ត​របស់​ប្រជាពលរដ្ឋ​ ធ្វើ​ឲ្យ​មាន​ការ​លើក​ឡើង​ថា ​រដ្ឋ​មិន​មាន​យន្តការ​ ត្រៀម​ទុក​ជា​មុន​ ដើម្បី​ផ្គត់ផ្គង់​តម្រូវ​ការ​ប្រចាំថ្ងៃ​របស់​ប្រជាពលរដ្ឋ​ដូចជា​គ្រឿង​ឧបភោគ​ បរិភោគ​ ត្រី​ សាច់​ បន្លែ ​ជាដើម​។ ការ​បិទ​ផ្សារ​ជា​ច្រើន​បែប​នេះ​ ក៏​ជា​ហេតុផល​មួយ​ធ្វើឲ្យ​ទំនិញ​ឡើង​ថ្លៃ​ដែរ​ នៅ​ពេល​តម្រូវការ​ មាន​ច្រើន​លើសលប់​លើ​ការ​ផ្គត់ផ្គង់​ បើ​ទោះណា​ជា​អាជ្ញាធរ​ធ្វើការ​អំពាវនាវ​កុំ​ឲ្យ​មាន​ការ​ឡើង​ថ្លៃ​ក៏​ដោយ​។