នៅ​ក្នុង​អំឡុង​ពេល​នៃ​ការ​រាតត្បាត​មេរោគ​កូវីដ​១៩​ ប្រទេស​កម្ពុជា​ត្រូវ​គេ​មើល​ឃើញ​ថា​មាន​ចរន្ត​ទេសចរ​ក្នុង​ស្រុក​ច្រើន​ជាង​ពេលណាៗ​ទាំងអស់​ ដោយសារ​តែ​ការ​ធ្វើ​ទេសចរណ៍​ទៅ​ក្រៅ​ប្រទេស​មិន​អាច​ប្រព្រឹត្តិ​ទៅ​បាន​។ រមនីយដ្ឋាន​ធម្មជាតិ​ រមនីយដ្ឋាន​កែច្នៃ ​ឧទ្យានជាតិ​ តំបន់​អភិរក្ស​ធម្មជាតិ​ ដែល​មាន​ទេសភាព​ដ៏​ស្រស់​ត្រកាល​ បាន​ទាក់ទាញ​អ្នក​ទេសចរ​ក្នុង​ស្រុក​យ៉ាងខ្លាំង​។ ក៏​ប៉ុន្តែ​រឿង​មួយ​ដែល​ធ្វើ​ឲ្យ​មាន​ការ​សោកស្តាយ​នោះ​គឺ​ ការ​ចោល​សំរាម​ពាស​វាល​ពាស​កាល​ នៅ​ក្នុង​តំបន់​ដ៏​ស្រស់​ត្រកាល​ទាំង​នោះ ​នៅ​តែ​បន្ត​កើត​មាន​។ ឥរិយាបទ​ឆ្គាំឆ្គង​ទាំង​នេះ​ បង្ហាញ​ពី​កំរិត​យល់​ដឹង​របស់​ពលរដ្ឋ​ខ្មែរ​មួយ​ចំនួន​ នៅ​តែ​មិន​អាច​កែ​ប្រែ​បាន​ បើ​ទោះណា​ជា​មាន​ការ​អប់រំ​ផ្សព្វផ្សាយ​យ៉ាង​ណា​ក៏​ដោយ​។