ក្រសួងសុខាភិបាល​នៅថ្ងៃទី២០​មិថុនា ២០២១ បាន​ប្រកាស​ដាក់ចេញនីតិវិធី​ប្រតិបត្តិ​សម្រាប់គ្រប់​គ្រង ថែទាំ និង​ព្យាបាល​កូវីដ១៩​នៅតាម​ផ្ទះ។ បើតាម​ក្រសួង​ដដែល អ្នក​ជំងឺ​ដែល​អាចដាក់​ឲ្យ​​ព្យា​បាល​នៅតាម​ផ្ទះ​បាន​គឺទាល់​តែស្ថានភាព​ជំងឺមានកម្រិតស្រាល​ និងពុំមានចេញរោគសញ្ញា។ ចំណែក​ផ្ទះវិញគឺត្រូវ​មានបន្ទប់​ស្នាក់​នៅ និង​បន្ទប់ទឹក​​ដាច់​ដោយឡែក។ វិធីសាស្ត្រ​ថ្មី ត្រូវបានក្រសួងអះអាងថាជាការជួយ​សម្រាលបន្ទុក​សង្គម ខណៈកូវីដ១៩​បន្ត​ឆ្លងរាលដាលស្ទើរ​គ្រប់​ខេត្ត​ទូទាំង​ប្រទេស។ អ្នកឃ្លាំមើលសង្គមសំដែងការ​គាំទ្រនូវវិធីសាស្ត្រថ្មីនេះ ​តែថា ការ​អនុវត្ត​ទទួល​បានជោគជ័យ​ គឺទាល់តែ​មាន​តាមដាន​ជាប្រចាំ​របស់​មន្ត្រីសុខាភិបាល។