ក្រសួង​បរិស្ថាន កាលពីថ្ងៃទី ២៤ មេសា បាន​ចេញ​សេចក្តីថ្លែង​ការណ៍​មួយ ដោយ​បាន​ព្រមាន​ចាត់​វិធានការច្បាប់ លើសកម្មជន​បរិស្ថាន ដែល​ចូលក្នុង​តំបន់​ការពារ​ធម្មជាតិ ដែល​ស្ថិត​ក្រោម​ការ​គ្រប់គ្រង​របស់​ក្រសួង​បរិស្ថាន​។ ការ​ព្រមាន​នេះ គឺ​ខណៈ​ដែល​សកម្មជន​បរិស្ថាន និង​សិទ្ធិ​មនុស្ស កំពុង​បើក​យុទ្ធនាការ​ជំហានទី​០២ ដើម្បី​បញ្ឈប់​ការ​កាប់​បំផ្លាញ​ព្រៃឈើ​នៅ​កម្ពុជា និង​ស្របពេល​ដែល​សកម្មជន​បរិស្ថាន​ទាំង​នោះ ​គ្រោង​ប្រារព្ធ​ខួប០៨ឆ្នាំ​នៃ​ការ​ស្លាប់​បាត់បង់​ជីវិត​របស់​លោក ឈុត វុទ្ធី នៅ​ក្នុង​តំបន់​ព្រៃឡង់​ក្នុង​ខេត្ត​ព្រះវិហារ នៅថ្ងៃទី​២៦ មេសា​នេះ​។ យ៉ាងណាក្តី មន្ត្រីសិទ្ធិ​មនុស្ស​បាន​អំពាវនាវ​ឲ្យ​ភាគីទាំង​ពីរ​យោគយល់​គ្នា ក្នុង​បុព្វហេតុ​ការពារព្រៃឈើ​នៅ​កម្ពុជា​។