ទឹកជំនន់​ឆ្នាំនេះ​គឺ​ជា​មេរៀន​ថ្មី​មួយ​សម្រាប់​រដ្ឋាភិបាល​ក្នុង​ការ​ដក​ពិសោធន៍​ពី​ការងារ​គ្រប់​គ្រង់​ធនធានទឹក​ឲ្យ​មាន​ប្រសិទ្ធិភាព​ គឺ​ធ្វើយ៉ាង​ណា​កុំ​ឲ្យ​នៅ​រដូវ​ភ្លៀង​កើតមាន​ទឹក​ជំនន់​លិច​ផ្ទះ ​ហើយ​បែរ​ជា​នៅ​រដូវ​ប្រាំង​ខ្វះ​ទឹក​ប្រើ​ប្រាស់​ទៅ​វិញ​។ ការ​លើក​ឡើង​យ៉ាង​ដូច្នេះ​របស់​អ្នក​វិភាគ​គឺ​សំដៅ​ដល់​ការ​ស្នើ​របស់​ក្រសួង​ធនធានទឹក​ ដែល​ឲ្យ​អាជ្ញាធរ​គ្រប់​ខេត្ត-រាជធានី ​ទប់​ស្កាត់​សកម្មភាព​លុបបឹង ប្រឡាយ និង​ទន្លេ ​កន្លង​មក​នោះ​ ហាក់​ដូចជា​គ្មាន​ប្រសិទ្ធិភាព​។ ជា​លទ្ធផល​នៅ​ពេល​ភ្លៀង​ខ្លាំង​ម្តងៗ​ធ្វើ​ឲ្យ​កើត​ទៅ​ជា​ទឹក​ជំនន់​ ខណៈ​កន្លែង​ស្តុក​ទឹក​សំខាន់​ៗជា​ច្រើន​ត្រូវ​បាន​លុប​ក្រោម​រូបភាព​អភិវឌ្ឍន៍​។