កម្ពុជា​កំពុងរៀប​ចំ​បែបបទ​ បង្កើតគណៈកម្មាធិការ​ជាតិសិទ្ធិមនុស្ស​កម្ពុជា ​បន្ថែមពីលើ​គណៈកម្មាធិការ​សិទ្ធិមនុស្ស​ដែលមានស្រាប់។​ ភាពខុសគ្នា​រវាងគណៈកម្មាធិការ​ជាតិសិទ្ធិមនុស្ស​កម្ពុជា ​និងគណៈកម្មាធិការ​សិទ្ធិមនុស្ស​ដែលកំពុងដំណើរ​ការនៅត្រង់ថា​  គណៈកម្មាធិការ​សិទ្ធិមនុស្ស​បច្ចុប្បន្ន​ជាស្ថាប័ន​មួយរបស់​រដ្ឋាភិបាល​ស្ថិតក្រោមទីស្តី​ការគណៈរដ្ឋមន្រ្តី​។ ​ថ្នាក់ដឹកនាំ​នៃគណៈកម្មាធិការសិទ្ធិ​មនុស្ស​នេះរួមមាន​៖ ប្រធាន អនុប្រធាន និង​ សមាជិក​ គឺកើតចេញ​ពីការជ្រើសរើស​របស់រដ្ឋាភិបាល​។​  ចំណែកថ្នាក់ដឹកនាំ​នៃគណៈកម្មាធិការ​ជាតិសិទ្ធិមនុស្ស​កម្ពុជាវិញ​ គឺជាសាធារណជន​ ជាអ្នកដាក់ពាក្យ​សុំឈរឈ្មោះ ​ដោយរដ្ឋាភិបាល​ មិនមែនជាអ្នកជ្រើសរើស​ឡើយ ​ហើយជាស្ថាប័ន​សិទ្ធមនុស្ស​ថ្នាក់ជាតិ​មួយឯករាជ្យ​មិនស្ថិតក្រោម​ចំណុះ​របស់​រដ្ឋាភិបាល​។​ ត្បិតតែ​មិនទាន់លេចចេញ​ជារូបរាង​ក៏ពិតមែន​តែអ្នកនយោបាយ​និងសង្គមស៊ីវិលមួយ​ចំនួន​មានសង្ឃឹម​តិចតួចថា​ ស្ថាប័នសិទ្ធិមនុស្ស​ថ្នាក់ជាតិ​មួយនេះ​មានឯករាជ្យ​ភាពដូចគណៈកម្មាធិការ​ជាតិសិទ្ធិមនុស្ស​របស់ប្រទេស​ក្នុងតំបន់​អាស៊ាន​មួយចំនួន​។​ បន្ថែមលើនេះ​ពួកគេ​មើលឃើញថា​ វត្តមាន​នៃស្ថាប័ន​ការពារ​សិទ្ធិមនុស្ស​ថ្នាក់ជាតិ​មិនអាចធ្វើឲ្យ​ស្ថានភាព​សិទ្ធិមនុស្ស​កម្ពុជា​ប្រសើរ​ឡើងឡើយ​។