ម្សិលមិញ​ លោក​អ៊ូ ច័ន្ទរ័ត្ន ​អតីត​អ្នក​តំណាងរាស្រ្ត​នៃ​អតីត​បក្ស​ប្រឆាំង​បាន​ប្រកាស​ពី​ការ​រៀបចំ​ឯកសារ​ពាក់ព័ន្ធ​នានា ​ដើម្បី​ចុះ​បញ្ជី​បក្ស​ថ្មី​«កែទម្រង់កម្ពុជា»​នៅ​ក្រសួង​មហាផ្ទៃ​នៅ​ក្នុង​សប្តាហ៍​នេះ​។ គណបក្ស​នយោបាយ​ថ្មី​អាច​នឹង​ប្រកាស​ជា​ផ្លូវការ​នៅ​ចុង​ខែ​មករា​ ឆ្នាំ​២០២១​។ លោក​អ៊ូ ច័ន្ទរ័ត្ន ​បាន​អះអាង​ថា​ គណបក្ស​ថ្មី​របស់​លោក​នេះ​ មិនមាន​គោលដៅ​ប្រកួត​ប្រជែង​នឹង​អតីត​បក្ស​ប្រឆាំង​ឬ​ក្រុម​មន្រ្តី​នៃ​បក្ស​នេះ​ឡើយ​។ ផ្ទុយ​ទៅ​វិញ​ គណបក្ស​នេះ​នឹង​ឱ្យ​លោក​កឹម សុខា ​មក​ដឹកនាំ​បើ​លោក​ចង់​ក្រោយ​លោក​មាន​សិទ្ធិ​ធ្វើ​នយោបាយ​ឡើង​វិញ​។ ដូច្នេះ​តើ​អាច​ទេ​ដែល​ថា​ គណបក្ស​ថ្មី​នេះ​ជា​បក្ស​ត្រៀម​ជំនួស​អតីត​គណបក្ស​សង្រ្គោះជាតិ​ក្នុង​ករណី​មិនអាច​រស់​ឡើង​វិញ​?