លោកនាយក​រដ្ឋមន្ត្រី ​ហ៊ុន សែន​ កាលពី​ថ្ងៃម្សិលមិញ ​បានប្រកាស​ដោយបើកចំហ​ថា ​ប្រទេស​កម្ពុជាចាំបាច់​ត្រូវយក​ប្រទេសចិន​ធ្វើជាបង្អែក​យុទ្ធសាស្ត្រ ​ក្នុងការផ្គត់ផ្គង់​វ៉ាក់សាំង​ការពារ​ជំងឺកូវីដ-១៩ ​ដោយ មិនខ្វល់​ពីការរិះគន់​អ្វីទាំងអស់​ ព្រោះក្រៅពីចិន​មិនដឹងទៅពឹងនរណា​នោះឡើយ​ ខណៈប្រទេសខ្លះ​ បានតែសន្យា។​ រហូតមកទល់ពេលនេះ​ ប្រទេសកម្ពុជា​សម្រេចបាន​ការចាក់វ៉ាក់សាំង​ទៅលើពលរដ្ឋ​ជាង ៤លាននាក់​(ជាង៤០%) ​ក្នុងចំណោមគោលដៅដែ​លត្រូវចាក់សរុប ១០លាននាក់​។​ គឺជាការចាក់វ៉ាក់សាំង ​ដែលមានល្បឿនលឿន ​ធៀបទៅនឹង​បណ្តាប្រទេស​អាស៊ាន​ផ្សេងទៀត​។​ ជុំវិញបញ្ហានេះ ​អ្នកវិភាគមើលឃើញថា​ មានជាប់ពាក់ព័ន្ធ​នឹងកត្តា​ពីរសំខាន់​ គឺកត្តានយោបាយ ​និងកត្តាវាងវៃ​របស់រដ្ឋាភិបាល​ ក្នុងការចរចា​ទិញវ៉ាក់សាំង​។