ក្រោយពី​ចាក់​វ៉ាកសាំង​បង្ការ​ជំងឺ​កូវីដ១៩​របស់​អង់គ្លេស​ លោក​នាយក​រដ្ឋមន្រ្តី​ហ៊ុន សែន​ កាលពី​ម្សិលមិញ​បានឆ្លើយតប​ទៅនឹង​ការ​និន្ទា ​និង​ការវាយ​ប្រហារ​មកលើ​រដ្ឋាភិបាល​កម្ពុជា​ដែលប្រើប្រាស់​វ៉ាក់សាំង​ចិន​ចាក់​ឱ្យ​ប្រជាពលរដ្ឋ​។ ​លោកនាយក​រដ្ឋមន្រ្តី ​បាន​ចាត់ទុក​ការនិន្ទា ​និង​វាយប្រហារ​នេះថា​ គឺជា​នយោបាយ​ប្រឆាំង​នឹង​ចិន​ផ្គាប់មុខ​តែម្តង​។​ ប៉ុន្តែ ​មន្រ្តី​ជាន់ខ្ពស់​នៃ​អតីត​គណបក្ស​ប្រឆាំង​បាន​បដិសេធ​ថា ​ការរិះគន់​របស់​ពួកគេ​ពី​បញ្ហា​វ៉ាក់សាំងចិន​នេះ ​គឺមិនមែន​ជាការ​ប្រឆាំង​ចិន​ផ្កាប់មុខ​នោះទេ​ តែជាការ​ចង់ឱ្យ​ប្រជាពលរដ្ឋ​កម្ពុជា​ចាក់វ៉ាក់សាំង​ណា​ដែល​ទទួលស្គាល់​ពី​អង្គការ​សុខភាព​ពិភពលោក​តែប៉ុណ្ណោះ។​ ចំណែក​ អ្នកតាមដាន​ និង​វិភាគ​បញ្ហា​នយោបាយ​នៅ​កម្ពុជា​វិញ​បានមើលឃើញ​ខុសគ្នា​ដោយខ្លះថា​ ជារឿង​នយោបាយ​ និង​ខ្លះទៀតថា​ ជារឿង​ធម្មតា​នៅ​ក្នុង​សង្គមប្រជាធិបតេយ្យ​។