រដ្ឋាភិបាលកម្ពុជា​កាលពីខែមេសា ​កន្លងទៅ ​បានបង្កើត​ក្រុមការងារ​អន្តរក្រសួង​មួយ ​ដើម្បីសិក្សា ​រៀបចំលិខិត​បទដ្ឋាន​គតិយុត្ត ​សម្រាប់​ការគ្រប់គ្រង​ឧកញ៉ា ​ការផ្តល់​គោរមងារ​ឧកញ៉ា ​និងការដកហូត​គោរមងារ​ឧកញ៉ា​។​ ក្រុមការងារ​នេះ ​មានភារកិច្ច​សិក្សា​ស្រាវជ្រាវ​ ផ្តួចផ្តើម​ក្នុងការបង្កើត​លិខិត​បទដ្ឋាន​គតិយុត្ត​នានា​ សិក្សា​ស្រាវជ្រាវច្បាប់​ ដើម្បី​ជាធាតុចូល​ សិក្សា​អំពីសិទ្ធិ​ និងកាតព្វកិច្ច​របស់​ឧកញ៉ា​ក្នុងការចូលរួម​កិច្ចការ​សង្គម​ រៀបចំ​បែបបទ​ និងនីតិវិធី​នៃការគ្រប់គ្រង​ឧកញ៉ា​ក៏ដូចជា​ការស្នើសុំ​ផ្តល់គោរមងារ​ឧកញ៉ា ​អ្នកឧកញ៉ា ​និងការដកហូត​គោរមងារ​ឧកញ៉ា​ជាដើម​។​ ទាក់ទង​ទៅនឹងការបង្កើត​ឲ្យមាន​លិខិតបទដ្ឋាន​គតិយុត្ត​ និងនីតិ​វិធីនៃការគ្រប់គ្រង​ឧកញ៉ានេះ ​អ្នកតាមដាន​សង្គម​នានា​មើលឃើញថា​ជាការល្អ​ ដើម្បីលើកតម្លៃ ​និងកិត្តិយស​ឧកញ៉ា​ពិតប្រាកដ​។