មន្ត្រី​ជាន់​ខ្ពស់ការ​បរទេសរបស់​សហ​រដ្ឋ​អាមេរិក គឺលោកស្រី ​​​Wendy R. Sherman គ្រោង​នឹង​ធ្វើដំណើរ​ទស្សន​កិច្ច​នៅ​កម្ពុជា​ចន្លោះ​ថ្ងៃទី២៥ ខែ​ឧសភា ​ និងថ្ងៃទី០៤ ខែ​មិថុនាខាងមុខនេះ​ដោយនឹងមាន​ជំនួប​មួយចំនួន​ជាមួយមន្រ្តី​រដ្ឋាភិបាល​កម្ពុជា​។ ​នេះ គឺ​ជាទស្សនៈកិច្ច​ជាលើក​ដំបូង​របស់លោកស្រី​មកកាន់​តំបន់​អាស៊ីអាគ្នេយ៍​ និងនៅកម្ពុជា។​ អ្នកវិភាគ​ស្ថានការ​នយោបាយ​បានលើកឡើងថា​ ដំណើរ​ទស្សនកិច្ចនេះ ​គឺក្នុងគោលបំណង​សំខាន់​ដោះស្រាយ​បញ្ហានៅភូមា​ ហើយសម្រាប់កម្ពុជា​ គឺនឹង​ធ្វើឱ្យ​ទំនាក់ទំនង​រវាង​កម្ពុជា ​និងអាមេរិក​មានភាពល្អ​ប្រសើរ​ឡើងបន្ថែមទៀត​។ ចំណែក​ អ្នកធ្វើការងារ​ខាងសិទ្ធិមនុស្ស​វិញយល់ថា ​លោកស្រី ​​​Wendy R. Sherman​ គួរតែលើក​បញ្ហា​នយោបាយ ​និងសិទ្ធិមនុស្ស​ទៅនិយាយ​ជាមួយ​រដ្ឋាភិបាល​ក​ម្ពុជា។