ម្សិលមិញ​ ក្រសួងសុខាភិបាល​កម្ពុជា​បានប្រកាស​បើកយុទ្ធនាការ​ថ្មីក្រោមប្រធានបទ​ថា«រួមគ្នាទទួល​ខុសត្រូវទប់​ ស្កាត់ការចម្លង​វីរុសកូវីដ១៩​»​ ដើម្បីទប់ស្កាត់ ​និងកាត់ផ្តាច់​ការឆ្លងរាលដាល​នៃជំងឺ​កូវីដ១៩​។​ ក្រសួងសុខាភិបាល​កម្ពុជា ​និងអង្គការ​សុខភាព​ពិភពលោក​បានអះអាងថា ​វិធានការនេះ​នឹងជួយឱ្យ​កម្ពុជា​អាចគ្រប់គ្រងបាន​លើការឆ្លង​រាលដាល​នៃជំងឺកូវីដ១៩​ បើសិន​មានការចូលរួម​ស្មើដៃ​រវាង​អាជ្ញាធរ​មានសមត្ថកិច្ច​ និងប្រជាពលរដ្ឋ​។​ ចំណែក ​អ្នកតាមដាន ​និងឃ្លាំមើល​វិញក៏យល់ស្រប​ដែរ​ ប៉ុន្តែ​ពួកគេ​ទាមទារ​ឱ្យមាន​ការអនុវត្ត​ឱ្យបានត្រឹមត្រូវ​ ទើបអាចមាន​ប្រសិទ្ធភាព​ទៅតាម​ការចង់បាន​របស់​ក្រសួងសុខាភិបាល​កម្ពុជា​។​