នៅខេត្ត​ហ៊ូពេ ប្រទេស​ចិន ករណី​ឆ្លង​ថ្មី នៃ​មេរោគកូរ៉ូណា ឬ Covid-19 បាន​កើនឡើងលឿន ដូច​ព្រួញ ប្រមាណ ១ម៉ឺន ៥ពាន់​ករណី ក្នុង​មួយថ្ងៃ ពោល​គឺ​កើនឡើង ១០​ដង បើប្រៀបធៀប​នឹង​ករណី​ឆ្លងថ្មី នាពេល​កន្លងមក។ តាម​ការប្រកាស​របស់​អាជ្ញាធរ​សុខភាព​ចិន នៅ​ថ្ងៃ​ព្រហស្បតិ៍នេះ ចំនួន​មនុស្សស្លាប់​ដោយសារ​កូរ៉ូណាវីរុស បាន​កើនឡើង ទ្វេដង​ដែរ គឺ​ប្រមាណ ២៤២​នាក់ ក្នុងរយៈពេល​តែ​មួយថ្ងៃ នៅ​ក្នុង​ខេត្ត​ហ៊ូពេ​តែមួយ។ ជាមួយ​នឹង​តួលេខ​ថ្មី កូរ៉ូណាវីរុស ឬ Covid-19 បាន​សម្លាប់មនុស្ស​សរុប ១៣៥៥នាក់ និង​ឆ្លងទៅ​មនុស្ស​ជិត​៦ម៉ឺន​នាក់ ដែលក្នុងនោះ ៩៨ភាគរយ ស្ថិតនៅ​ក្នុង​ប្រទេស​ចិន។

នៅស៊ីរី ចាប់តាំងពីដើមខែកុម្ភៈមក សមរភូមិប្រយុទ្ធបានផ្ទុះឡើង រវាងកងទ័ពតួកគី និងកងទ័ពរដ្ឋាភិបាល​បាឆា អាល់អាសាដ នៅភាគខាងជើងឆៀងខាងលិច ក្បែរក្រុងអ៊ីដឡិប។ ក្រោយស្លាប់ទាហានតួកគី៥នាក់ កាលពីថ្ងៃអង្គារ លោកប្រធានាធិបតីតួកគី បាន​គំរាមខ្លាំងៗ​ថា បើកងទ័ពស៊ីរី ហ៊ានធ្វើ​ការ​​វាយប្រហារណាមួយ មកលើទីតាំងកងទ័ព​តួកគីទៀត នោះតួកគីនឹងវាយបក​ទៅលើស៊ីរីវិញ ដោយមិនរើសទីតាំងជាដាច់ខាត។ មានការព្រួយបារម្ភជាខ្លាំង ដល់សន្តិសុខរបស់ប្រជាជនស៊ីរី នៅតំបន់នោះ បើ​​ការវាយប្រហារ​គ្នា​រវាង​កងទ័ពតួកគី និងកងទ័ពស៊ីរី មិនបញ្ឈប់។ តែយ៉ាងណា ក៏ដោយ គេសង្ឃឹមថា នឹងមានការចរចាគ្នាណាមួយ រវាងតួកគី និងរុស្ស៊ី ព្រោះថាគឺរុស្ស៊ី ដែល​ជា​អ្នក​ចេញ​មុខ​ការពារ រដ្ឋាភិបាល​របស់​លោក​បាឆា អាល់អាសាដ។

បក្សកុម្មុយនិស្ត​ចិនប្រចាំ​ខេត្ត​ហ៊ូពេ បាន​សម្រេច​ដក​តំណែង​មន្រ្តី​សុខាភិបាល​២រូប នៅខណៈ​ដែល​ចំនួន​មនុស្ស​ស្លាប់​ដោយ​មេរោគកូរ៉ូណា​ថ្មី កើនឡើង​ជាង១ពាន់នាក់ គិត​ត្រឹម​ថ្ងៃ​អង្គារទី ១១ កុម្ភៈ ២០២០។ ដំណឹង​ដក​តំណែង​មន្រ្តីចិន ធ្វើឡើង នៅ​មួយថ្ងៃ​ក្រោយ ប្រធានាធិបតី​ចិន លោកស៊ី ជីនពីង នៅ​ក្នុងពេល​ចុះ​សួរសុខទុក្ខ​ជា​លើកទី ១ ប្រជាជន​ក្នុង​ទីក្រុង​ប៉េកាំង​បាន​អំពាវនាវ​ឲ្យ​មានការចាត់វិធានការ​ខ្លាំង និង​ដាច់ណាត់ ដើម្បី បិទបញ្ចប់ ការចម្លង​រីករាលដាល​មេរោគ កូរ៉ូណាថ្មី។

បន្ទាប់​ពីរង់ចាំ​អស់​ពីរ​សប្តាហ៍ ក្រុមជំនាញ​អន្តរជាតិ​​របស់​អង្គការ​សុខភាព​ពិភពលោកបានទទួល​ការ​អនុញ្ញាត​ពី​អាជ្ញាធរ​ចិន ឱ្យចូល​ទៅ​ធ្វើការ​ស៊ើប​អង្កេត​អំពី​កូរ៉ូណាវីរុស នៅ​ផ្ទាល់​កន្លែង។ ក្រុម​អ្នក​ជំនាញ​បាន​​ទៅ​ដល់​​ក្រុងវូហាន​ នៅ​ថ្ងៃចន្ទ​ទី ១០​កុម្ភៈ ចំ​ថ្ងៃ​ដែលចិន​ចាប់​មាន​​សកម្មភាព​ការងារ​ឡើងវិញ​ ដោយ​សន្សឹមៗ។ ចំណែក​ ឯតុល្យការ​នៃ​ជនរងគ្រោះ​ដោយ​កូរ៉ូណា​វីរុស​វិញ បាន​ឡើង​ដល់​ ៩០៩​នាក់​ស្លាប់​ និង​ អ្នក​ឆ្លង​ចំនួន ៤០២៣៥នាក់ (តួលេខ​ថ្ងៃចន្ទទី ១០កុម្ភៈ)។ ប៉ុន្តែ​កំណើន​នៃ​ការ​ចម្លង​មេរោគ​កូរ៉ូណា​ថ្មី ហាក់​ដូច​ជា ចាប់​ទ្រឹង ​លែង​សូវ​ឡើង។​

ហេតុការណ៍​បាញ់រះ សម្លាប់​មនុស្ស នៅ​ខេត្តនគររាជសីមា ឬ ខូរ៉ាត​របស់​ប្រទេស​ថៃ បាន​បិទបញ្ចប់ នៅព្រឹក​ថ្ងៃអាទិត្យ ទី​៩​កុម្ភៈ បន្ទាប់​ពី​កងកម្លាំង​ប៉ូលិស​ថៃ​បាន​បាញ់សម្លាប់​ខ្មាន់កាំភ្លើង ដែល​ចូល​ទៅ​ចាប់ជំរិត​មនុស្ស​ក្នុង​ផ្សារទំនើប កណ្តាល​ក្រុង​ខូរ៉ាត។ នៅក្នុង​សន្និសីទ​កាសែត នៅថ្ងៃអាទិត្យនេះ លោកនាយករដ្ឋមន្រ្តី​ថៃ ប្រាយុទ្ធ ចាន់អូចា បាន​លើក​និយាយ​ពី​ចំនួន​មនុស្ស​ស្លាប់ ២៦នាក់ ដែលក្នុង​នោះ ១នាក់ ជា​ប៉ូលិស​ថៃ និង​អ្នករបួស៥០នាក់ ផ្សេងទៀត។ តាម​ប្រមុខរដ្ឋាភិបាល​ថៃ បញ្ហា​ផ្ទាល់ខ្លួន ទាក់ទង​នឹងជម្លោះ​អចលនទ្រព្យ ជា​ដើមហេតុ​ធ្វើ​ឲ្យ​ខ្មាន់កាំភ្លើង ដែល​មានឋានៈ​ជា​ពលបាលឯក បើក​ការបាញ់រះ​សម្លាប់​មនុស្ស នៅ​បន្ទាយទាហាន មុន​នឹង​រាលដាល​ទៅដល់​ផ្សារទំនិញ នៅ​កណ្តាល​ក្រុង​ខូរ៉ាត។

ចំនួនអ្នកស្លាប់ ដោយកូរ៉ូណាវីរុស បានបន្តកើនឡើងយ៉ាងខ្លាំងរហូតដល់ជាង​៧២០នាក់ ខណៈអ្នកឆ្លងវិញ មានប្រមាណជាង ​៣៤៥០០​នាក់​ នៅក្នុងប្រទេសចិន​។ តាមប្រភពពីស្ថានទូតសហរដ្ឋអាមេរិក ប្រចាំ​ក្រុង​ប៉េកាំង បាន​ឲ្យដឹង​ថា ជនជាតិ​អាមេរិក​ម្នាក់​ដែល​មានផ្ទុកមេរោគនេះ បានស្លាប់នៅ​ក្នុង​មន្ទីរពេទ្យ​មួយ​ក្នុង​ក្រុងវូហាន។ នេះគឺជាអ្នកស្លាប់ដោយកូរ៉ូណាវីរុស​ទីមួយហើយ ដែលមិនមែន​ជា​ជនជាតិ​ចិន។ ចំណែក​ទីក្រុង​ហុងកុង អាជ្ញាធរ​បានចាប់ផ្តើម អនុវត្ត​​វិធានការ​​ដាក់បង្ឃាំង​ទុក​ដោយឡែក ទៅលើ​អ្នក​ដំណើរ​ទាំងអស់​ ដែល​ធ្វើ​ដំណើរ​​មកពី​ចិន​ដីគោក ចូល​កោះ​ហុងកុង។ មាន​ការ​លើកឡើង​ផងដែរ​ពីអ្នក​ជំនាញ​វិជ្ជសាស្ត្រ ថា​​កូរ៉ូណាវីរុស ទំនង​ជា​អាច​ចម្ល​ង​បាន​តាម​រយៈលាមក។

នៅ​ប្រទេស​ចិន ចំនួន​មនុស្ស​ស្លាប់​ដោយសារ​កូរ៉ូណាវីរុស បាន​កើនឡើង​ដល់ ៦៣៦​នាក់ នៅ​ថ្ងៃ​សុក្រ​ទី ៧ កុម្ភៈ និង​បាន​ចម្លង​ទៅមនុស្ស​ជាង ៣ម៉ឺននាក់ នៅ​ប្រទេស​ចិន។ នៅក្នុង​កិច្ចសន្ទនា​ទូរស័ព្ទ​ជាមួយ​ប្រធានាធិបតី​អាមេរិក លោក​ដូណាល់ ត្រាំ ប្រធានាធិបតី​ចិន លោក​ស៊ី ជីនពីង បាន​ធានា​អះអាង​ថា ចិន​មាន​សមត្ថភាព អាច​ប្រយុទ្ធយកឈ្នះ លើ​មេរោគកូរ៉ូណាថ្មី។ ពាក្យ​ធានា​របស់​ប្រមុខរដ្ឋ​ចិន ធ្វើឡើង នៅ​ប៉ុន្មាន​ម៉ោង​ក្រោយ​គ្រូពេទ្យ ចិន ម្នាក់​ដែល​អ្នកជា​ទាញសញ្ញាអាសន្ន​មុនគេ ពី​មេរោគ​កូរ៉ូណា នៅទីក្រុង​វូហាន បាន​ទទួល មរណភាព នៅ​មន្ទីរពេទ្យចិន។ មរណភាព​របស់​គ្រូពេទ្យ ដែល​ជា​អ្នកទាញសញ្ញា​ពី​គ្រោះថ្នាក់​របស់​កូរ៉ូណាវីរុស​បាន​បំផុសបំផុល​ឲ្យ​មានប្រតិកម្ម​រិះគន់ និង​ខឹងសម្បារ ពី​សំណាក់​ពលរដ្ឋចិន។

នៅ​ថ្ងៃ​ពុធ ទី៥ កុម្ភៈ ព្រឹទ្ធសភា​អាមេរិក​បាន​សម្រេច​ឲ្យ​លោក​ដូណាល់ ត្រាំ​រួច​ខ្លួន​នៅ​ក្នុង​បទចោទប្រកាន់​ចំនួន​ពីរ គឺ​ការ​រំលោភអំណាច និង​ការ​រារាំង​រដ្ឋសភា​មិន​ឲ្យ​ធ្វើ​ការ​ដោយ​រលូន។ នីតិវិធី​របស់​ព្រឹទ្ធសភា​បាន​ធ្វើ​ឡើង បន្ទាប់​ពី​សភា​បាន​អនុម័ត​ទម្លាក់​លោក​ដូណាល់ ត្រាំ​ចេញ​ពី​តំណែង។ គួរ​រម្លឹក​ថា លោក​ត្រាំ​ជា​ប្រធានាធិបតី​អាមេរិក​ទី៣ ដែល​បាន​រួច​ខ្លួន​ពី​ការ​ទម្លាក់​ពី​តំណែង តែ​ជា​ប្រធានាធិបតី​ទី១ ដែល​កំពុង​ធ្វើ​យុទ្ធនាការ​ឃោសនា​បោះឆ្នោត​ដើម្បី​អាណត្តិថ្មី​សម្រាប់​ការ​បោះឆ្នោត​នៅ​ខែ​វិច្ឆិកា​ខាង​មុខ។ ក្រៅ​ពី​បាន​រួច​ខ្លួន​ពី​ការ​ទម្លាក់​ពី​តំណែង ប្រជាប្រិយភាព​របស់​លោក​ត្រាំ​ក៏​កំពុង​កើន​ឡើង​ដែរ។ តែ​អ្វី​ជា​ការ​កត់សម្គាល់ រឿងរ៉ាវ​មួយ​នេះ​បាន​និង​កំពុង​ធ្វើ​ឲ្យ​គណបក្ស​ធំ​ពីរ គឺ​គណបក្ស​សាធារណរដ្ឋ​កំពុង​កាន់​អំណាច និង​គណបក្ស​ប្រជាធិបតេយ្យ​ដែល​ជា​បក្សប្រឆាំង​ឃា្លត​គ្នា​កាន់​តែ​ខ្លាំង។

មួយ​ថ្ងៃ​មុន​​ការ​ជំនុំ​ជម្រះ​សំណុំ​រឿង​ទម្លាក់​ពី​តំណែងនៅ​ព្រឹទ្ធសភា, លោក ដូណាល់ ត្រាំ ពីអង្គារទី​៤កុម្ភៈ បាន​ថ្លែងសារទៅកាន់ប្រជាជាតិ ពី​ការ​រីកចម្រើន​សេដ្ឋកិច្ចនិង​ការ​ជឿនលឿន​របស់​អាមេរិក​ ដ៏​អស្ចារ្យ​មិនធ្លាប់​ជួបនៅក្រោម​ការ​ដឹកនាំរបស់​លោក។ ការ​ថ្លែង​សារ​នេះក៏​ស្ថិត​នៅក្នុង​ទម្រង់​នៃការ​ឃោសនា​រក​សំឡេង​ឆ្នោត​បន្ថែម ដើម្បី​ឈ្នះ​ឆ្នោត​កាន់​អំណាច​ប្រធានាធិបតី​ជាថ្មី។ នៅ​ចំពោះ​មុខ​សមាជិក​សភា​ លោក​ដូណាល់ ត្រាំ ស្រាប់​តែ​ប្រកាស​ស្រេច​ឱ្យ​ហើយថា លោក​នឹង​កាន់​អំណាច​បួន​ឆ្នាំ​ទៀត​!

ទោះ​យ៉ាង​នេះ​ក្តី នៅ​ក្នុង​រដ្ឋ​សភា​សហព័ន្ធ​នេះ គឺ​មាន​ការ​ផ្ទុះ​សញ្ញាណ​បែក​បែក​គ្នា​ជាខ្លាំង រវាង​ក្រុម​ដឹកនាំ​បក្ស​នយោបាយ​ធំ​ៗ​ទាំង​ពីរ​របស់​អាមេរិក។ ឧប្បត្តិហេតុនេះ កើត​ឡើង​នៅពេល​ដែល​លោក ដូណាល់ត្រាំ បាន​ធ្វើ​ព្រ​ងើយ​កន្តើយ​ មិន​ព្រម​ទទួល​ការ​គោរព​ចាប់​ដៃស្វាគមន៍​​របស់​អ្នក​ស្រី​ប្រធានសភា ដែល​​មកពីបក្ស​​ប្រជាធិបតេយ្យ ជាបក្ស​ប្រឆាំង​ ហើយ​ជាការ​សងសឹក​ភ្លាមៗ អ្នក​ស្រី Nancy Pelosi ក៏​បាន​ហែ​កក្រដាស​​សុន្ទរកថា​របស់​លោកប្រធានាធិបតី​ ត្រាំ ​នៅ​ចំពោះ​មុខ ទាំងដឹង​ថា​កំពុងតែ​មាន​គេ​ថត​ផ្សាយ​ផ្ទាល់​ទៀត​ផង​។

នៅ​ក្នុង​ប្រទេស​ចិន ចំនួន​មនុស្ស​ស្លាប់ និង​ចំនួន​អ្នកឆ្លង​ដោយមេរោគ​កូរ៉ូណាថ្មី​កំពុង​បន្ត​កើន​ឡើង​ពី​មួយ​ថ្ងៃ​ទៅ​មួយ​ថ្ងៃ។ ផ្អែក​តាម​តួលេខ​របស់​គណៈកម្មការ​សុខាភិបាលជាតិ​ចិន ចំនួន​មនុស្ស​ស្លាប់​មាន ៤២៥នាក់ និង​ចំនួន​អ្នក​ឈឺ​មាន​ជាង ២០ ០០០នាក់​គិត​ត្រឹម​ថ្ងៃ​អង្គារ ទី៤ កុម្ភៈ។ ក្រៅ​ពី​នៅ​ទឹកដីចិនដីគោក មាន​ជនជាតិ​ចិន​ម្នាក់​បាន​ស្លាប់​ដោយ​មេរោគកូរ៉ូណាថ្មី​នៅ​ហុងកុង។ នេះ​ជា​ករណី​ស្លាប់​ទី២ បន្ទាប់​ពី​មាន​ជនជាតិ​ចិន​ម្នាក់​បាន​ស្លាប់​នៅ​ក្នុង​ប្រទេស​ហ្វីលីពីន​កាល​ពី​សប្តាហ៍​មុន។ ប្រឈម​នឹង​កំណើន​ឥទ្ធិពល​របស់​មេរោគ​កូរ៉ូណាថ្មី មាន​ប្រទេស​កាន់​តែ​ច្រើន​បាន​ចាត់​វិធានការ​ជម្លៀស​ពលរដ្ឋ​ខ្លួន​ចេញ​ពី​ទីក្រុង​វូហាន ផ្អាក​ជើងហោះហើរ​ទៅ មក​ជាមួយ​ចិន ឬ​ផ្អាក​ទិដ្នាការ​ដល់​ពលរដ្ឋ​ចិន​ជា​ដើម។ ដោយឡែក និង​ជា​លើកទី១ រដ្ឋាភិបាល​ចិន​បាន​ទទួល​ស្គាល់​ពី​ចំណុច​ខ្វះខាត​របស់​ខ្លួន​នៅ​ក្នុង​វិធានការ​ទប់ស្កាត់​នឹង​មេរោគផ្លូវដង្ហើម​ថ្មី និង​បាន​អំពាវនាវ​ឲ្យ​សហគមន៍អន្តរជាតិ​ជួយ។