November 14, 2024

ចិន៖ ការវាយប្រហារសម្លាប់មនុស្សច្រើននាក់ ធ្វើឲ្យខូចមុខមាត់ចិនដែលអួតថាជា “ប្រទេសមាន សុវត្ថិភាព”

7 minutes

កាលពីថ្ងៃទី១១វិច្ឆិកា មានករណីវាយប្រហារដោយប្រើរថយន្តបើកបំបុក សម្លាប់មនុស្សចំនួន៣៥នាក់ នៅទីក្រុងជូហៃ ភាគខាងត្បូងប្រទេសចិន។ ជនដៃដល់ ជាបុរសជនជាតិចិនអាយុ ៦២ឆ្នាំ។ ករណីវាយប្រហារនេះ ហាក់បានធ្វើឲ្យប្រឡាក់ប្រឡូសប៉ះពាល់យ៉ាងខ្លាំង ទៅលើមុខមាត់កិត្តិយសរបស់ចិន ព្រោះថាកន្លងមក ចិនតែងតែអួតប្រាប់គេឯងថាប្រទេសខ្លួន ជាប្រទេសដែលមានសុវត្ថិភាពបំផុត មិនដូចប្រទេសខ្លះដែលតែងតែមានករណីបាញ់រះសម្លាប់មនុស្សរាប់សិបនាក់យ៉ាងញឹកញាប់។ ដើម្បីការពារមុខមាត់ខ្លួន អាជ្ញាធរចិនបានព្យាយាមរារាំងការផ្សព្វផ្សាយព័ត៌មាន ជុំវិញការពិតនៃករណីវាយប្រហារនៅជូហៃ កាលពីល្ងាចថ្ងៃចន្ទ។

អាជ្ញាធរចិនព្យាយាមបិទខ្ទប់ព៏ត៌មាន

កាលពីល្ងាចថ្ងៃចន្ទ ទី១១វិច្ឆិកា នៅទីក្រុងជូហៃ ក្បែរហុងកុងនិងម៉ាកាវ បុរសអាយុ៦២ឆ្នាំម្នាក់ បានបើករថយន្តបំបុកមនុស្សដែលកំពុងរាំហាត់ប្រាណ នៅក្នុងបរិវេណក្បែរកីឡដ្ឋាន បណ្តាលឲ្យស្លាប់មនុស្ស៣៥នាក់ និងរបួសធ្ងន់ស្រាលជាង៤០នាក់។ នៅថ្ងៃអង្គារ មុននឹងប្រកាសអំពីចំនួនមនុស្សស្លាប់នេះ កាលពីយប់ថ្ងៃចន្ទ នគរបាលចិនបានផ្សាយត្រឹមថាមានមនុស្សរបួសតែប៉ុណ្ណោះ។ ទន្ទឹមគ្នានេះ សមត្ថកិច្ចចិនបានចេញបញ្ជាតាមលុបវីដេអូ ដែលបង្ហោះតៗគ្នាតាមបណ្តាញសង្គមថែមទៀត ហាក់ដូចជាចង់បំបិទព័ត៌មាននេះ។ ហើយមិនត្រឹមប៉ុណ្ណោះទេ សូម្បីតែទៀនធូបនិងបាច់ផ្កា ដែលគេយកមកដាក់នៅកន្លែងកើតហេតុដើម្បីឧទ្ទិសដល់វិញ្ញាណក្ខន្ធអ្នកស្លាប់ ក៏ត្រូវបានសមត្ថកិច្ចចិនចុះមករុះរើ ប្រមូលយកទៅចោលដែរ ដើម្បីបំបាត់ស្លាកស្នាមទាំងអស់នៃហេតុការណ៍នេះ។ ផ្អែកតាមទីភ្នាក់ងារព័ត៌មាន Reuters នៅព្រឹកថ្ងៃពុធទី១៣វិច្ឆិកា ទីតាំងកើតហេតុត្រូវបាននគរបាលចិនដាក់រនាំងបិទខ្ទប់ មិនឲ្យមាននរណាចូលជាដាច់ខាត។

គួររំលឹកថា ករណីវាយប្រហារនៅជូហៃ គឺជាការវាយប្រហារសម្លាប់រង្គាល ដ៏ធ្ងន់ធ្ងរបំផុតមួយដែលគេកម្រឃើញមាននៅចិន បើគិតចាប់ពីករណីដាក់គ្រាប់បែកបង្កៃក្នុងឡាន នៅទីក្រុងអ៊ូរំឈី ខេត្តស៊ីនជាំងកាលពីឆ្នាំ២០១៤ ដែលបានផ្តាច់ជីវិតមនុស្ស៣១នាក់។ ជាករណីវាយប្រហារ ដែលត្រូវបានអាជ្ញាធរចិន ចាត់ទុកថាជាស្នាដៃរបស់ក្រុមភេរវកម្មអ៊ុយហ្គួរ។ កន្លងមក ចិនតែងតែអះអាងថា ប្រទេសខ្លួនជាប្រទេសមានសុវត្ថិភាព តាមរយៈការប្រើប្រាស់ប្រព័ន្ធបច្ចេកវិទ្យាកាមេរ៉ាសុវត្ថិភាពគ្រប់ច្រកល្ហក និងប្រព័ន្ធច្បាប់គ្រប់គ្រងអាវុធយ៉ាងតឹងតែង។ តែធាតុពិតទៅ អំពើហិង្សាបង្កឡើងដោយជនខ្លះ ទៅលើអាយុជីវិតប្រជាជនស៊ីវីល តែងកើតមានជារឿយៗដែរ។ ជាក់ស្តែងប៉ុន្មានខែចុងក្រោយនេះ ជាមួយនឹងវិបត្តិសេដ្ឋកិច្ចដែលធ្វើបាបជីវភាពប្រជាជនចិនកាន់តែខ្លាំងឡើង គឺអាជ្ញាធរចិនបានទទួលស្គាល់ថាគេបារម្ភ អំពីការឈានកើនឡើងនូវអំពើហិង្សារបៀបនេះ។

នៅក្នុងវីដេអូដែលគេថតបាន មុននឹងត្រូវលុបចោលអស់ពីបណ្តាញសង្គម គឺឃើញមនុស្សជាច្រើនសិបនាក់ ភាគច្រើនសុទ្ធតែជាមនុស្សចាស់ ដេកដួលស្រែកទ្រហោរនៅនឹងដី បន្ទាប់ពីរថយន្តបង្កហេតុបានបើកបុកកិន។ ហើយយោងតាមសាក្សីថ្លែងប្រាប់ទស្សនាវត្តីចិន Caixin គឺរថយន្តបង្កហេតុ បានបើកទៅមុខនិងថយចុះថយឡើងច្រើនដង ដើម្បីបុកកិនមនុស្សឲ្យបានច្រើននាក់។ ជនដៃដល់ ដែលប៉ុនប៉ងសម្លាប់ខ្លួនដោយអារកនោះ ត្រូវនគរបាលចាប់ឃាត់ខ្លួនភ្លាមៗ ហើយកំពុងស្ថិតក្នុងការសង្គ្រោះបន្ទាន់។ នៅក្នុងលិខិតប្រកាសផ្លូវការ នគរបាលក្រុងជូហៃ បានអះអាងថាហេតុផលដែលជំរុញឲ្យជនដៃដល់ធ្វើអំពើដ៏ព្រៃផ្សៃនេះ គឺដោយសារតែមានជម្លោះក្នុងគ្រួសារ បែងចែកទ្រព្យសម្បត្តិមិនត្រូវគ្នាក្រោយការលែងលះ។

ចិនអួតថាខ្លួនជាប្រទេសមានសុវត្ថិភាពបំផុត

ទោះចង់មិនចង់ ការវាយប្រហារស្លាប់មនុស្សដល់ទៅ៣៥នាក់នៅជូហៃនេះ បានធ្វើឲ្យកិត្តិយសចិនត្រូវប្រឡាក់ប្រឡូសជាខ្លាំង។ ជាងនេះទៀត គឺហេតុការណ៍នេះបានកើតឡើងនៅមួយថ្ងៃមុនការបើកសម្ពោធ កម្មវិធីពិពណ៌យន្តហោះនៅជូហៃ។ លោកប្រធានាធិបតីចិន ស៊ី ជីនពីង បានផ្ញើសារប្រាប់អាជ្ញាធរគ្រប់ជាន់ថ្នាក់ ត្រូវតែប្រើគ្រប់មធ្យោបាយដើម្បីទប់ស្កាត់ករណីហិង្សារបៀបនេះ និងដើម្បីធានាការពារសន្តិសុខនិងស្ថិរភាពសង្គម។

គួរកត់សំគាល់ថា នៅរៀងរាល់លើក ពេលមានករណីបាញ់រះសម្លាប់មនុស្សនៅសហរដ្ឋអាមេរិក បណ្តាញព័ត៌មានចិនតែងតែផ្សព្វផ្សាយយ៉ាងព្រោងព្រាត។ កាសែត Global Times ធ្លាប់ទាំងបានចុះផ្សាយទៀតកាលពីឆ្នាំ២០១៨ ថាសហរដ្ឋអាមេរិក គួរតែយកចិនធ្វើជាគម្រូ។ ហើយកាលពីខែមិថុនាកន្លងទៅ អ្នកនាំពាក្យម្នាក់នៃក្រសួងការបរទេសចិន បានលើកឡើងថា ចិនត្រូវបានគេចាត់ទុកថាជាប្រទេសមួយដែលមានសុវត្ថិភាពបំផុត។ ជាការថ្លែងអះអាង បន្ទាប់ពីមានករណីវាយប្រហារដោយចាក់នឹងកំបិត ទៅលើគ្រូបង្ក្រៀនជនជាតិអាមេរិក៤នាក់ នៅភាគខាងជើងប្រទេសចិន។

ជាការពិតណាស់ ករណីឧក្រិដ្ឋកម្មនៅចិន គឺមិនសូវសំបូរទេ ហើយក៏មិនបណ្តាលឲ្យមានមនុស្សស្លាប់ច្រើនដែរ បើប្រៀបធៀបទៅសហរដ្ឋអាមេរិក។ តែយ៉ាងណា មិនមែនមានន័យថាវាគ្មានសោះនោះទេ។ កាលពីថ្ងៃទី៣០កញ្ញាកន្លងទៅ បុរសអាយុ៣៧ឆ្នាំម្នាក់បានប្រើកាំបិត ចាក់អតិថិជននៅក្នុងផ្សារទំនើបមួយនៅក្រុងសៀងហៃ បង្កឲ្យស្លាប់មនុស្ស៣នាក់ និងរបួសមនុស្ស១៥នាក់ទៀត។ ចំណែកកាលពីខែឧសភា បុរសម្នាក់ទៀតបានចាក់សម្លាប់មនុស្សចំនួន៨នាក់។

នៅមានករណីវាយប្រហារផ្សេងទៀត ដែលបានបង្កឡើងសំដៅទៅលើជនជាតិមកពីប្រទេសដែលប្រព័ន្ធឃោសនាចិន ចាត់ទុកថាជាសត្រូ។ ជាក់ស្តែង កាលពីខែមិថុនាបុគ្គលិកបើករថយន្តដឹកសិស្សសាលាម្នាក់ បានស្លាប់បន្ទាប់ពីព្យាយាមចូលឃាត់ជនដៃដល់ម្នាក់ ដែលប៉ុនប៉ងវាយប្រហារទៅលើសិស្សសាលាជនជាតិជប៉ុន។ ហើយកាលពីខែកញ្ញា សិស្សសាលាជនជាតិជប៉ុន អាយុ១០ឆ្នាំម្នាក់ ត្រូវបានគេចាក់សម្លាប់នៅទីក្រុងឆិនចិន បង្កឲ្យមានវិបត្តិការទូតរវាងចិននិងជប៉ុន។

"ជនបរាជ័យទាំង៥យ៉ាង"

តើហេតុអ្វី បានជាមានករណីវាយប្រហារសម្លាប់មនុស្សញឹកញាប់បែបនេះ នៅចិន? ហេតុផលអាចមានច្រើនកត្តា ដោយផ្តើមចេញ ពីបញ្ហាសុខភាពផ្លូវចិត្តរបស់ប្រជាជនចិន នៅក្នុងបរិបទសេដ្ឋកិច្ចដែលកាន់តែយាប់យ៉ឺនខ្លាំង។ ប្រព័ន្ធសុខាភិបាលចិន ហាក់ដូចជាមិនសូវយកចិត្តទុកដាក់ប៉ុន្មានឡើយ ទាក់ទិននឹងសុខភាពផ្លូវចិត្តរបស់ពលរដ្ឋខ្លួន។

លោកស្រី Wang Yaqiu អគ្គនាយកស្រាវជ្រាវស្តីពីចិន នៅអង្គការ Freedom House បានលើកឡើងថា កាលពីជាង១០ឆ្នាំមុន ប្រសិនបើប្រជាជនចិនណាម្នាក់មានបញ្ហាអ្វីមួយចង់តវ៉ា គឺគេអាចប្រាប់ទៅអង្គការសមាគម ឬទៅបណ្តាញព័ត៌មានឲ្យជួយផ្សាយ ហើយអាចបង្ហោះតាមបណ្តាញអ៊ីនធ័រនិតបន្ថែមបាន។ តែបច្ចុប្បន្ននេះ សង្គមស៊ីវីលនៅចិនលែងមានទៀតហើយ ហើយការនិយាយតវ៉ានៅលើបណ្តាញសង្គម ក៏ត្រូវហាមឃាត់យ៉ាងតឹងតែងបំផុត។ កំហឹងនិងការកើតទុក្ខមិនសុខចិត្តទាំងអំបាលម៉ានរបស់ប្រជាជនចិន ត្រូវកៀបសង្កត់ដោយអំណាចរដ្ឋ ដែលពេលណាមួយនោះ វាអាចផ្ទុះកញ្ជ្រោលឡើង ដោយកំហឹងនេះអាចវាយប្រហារទៅលើមហាជនផ្សេងទៀត ដោយមិនរើសមុខ។

ប្រឈមនឹងអំពើហិង្សាទាំងអស់នេះ អាជ្ញាធរចិនបានជ្រើសរើសវិធីធម៌ក្តៅ រឹតបន្តឹងការតាមដានសន្តិសុខកាន់តែខ្លាំង ទៅលើប្រជាពលរដ្ឋខ្លួនដែលមានបញ្ហាសតិអារម្មណ៍ ជាជាងការជួយជ្រោមជ្រែងយកអាសារពួកគេ។ កាលពីខែកញ្ញ រដ្ឋបាលស្រុកមួយឈ្មោះ Xiangyang នៅក្នុងខេត្ត Shaanxi បានផ្ញើសារជូនដំណឹងទៅកាន់អាជ្ញាធរមូលដ្ឋាន ថាត្រូវតែ “គ្រប់គ្រងឲ្យបានតឹងតែងបំផុត ទៅលើជនទាំងឡាយណាដែលមានបញ្ហាបរាជ័យទាំង៥យ៉ាង ដើម្បីទប់ស្កាត់កុំឲ្យមានករណីហិង្សាហួសប្រមាណ”។

កាសែតហុងកុង South China Morning Post បានចុះផ្សាយថា ជនបរាជ័យទាំង៥យ៉ាងនោះ គឺគេចង់សំដៅទៅលើ ជនដែលមានបញ្ហាសតិស្មារតី ជនដែលមានជីវភាពក្រីក្រតោកយ៉ាក ជនដែលប្រឈមនឹងបញ្ហាទំនាក់ទំនងជាមួយគេឯង ជនដែលបាត់បង់ប្រាក់កាសអស់ពីខ្លួន ឬយុវជនក្មេងៗដែលឯកោគ្មានញាតិជាទីពឹងពំនាក់ជាដើម។ មន្ត្រីនគរបាលចិនបានប្រាប់កាសែតហុងកុងខាងលើថា ថ្នាក់លើបានបញ្ជាឲ្យពួកគេ ត្រូវតែតាមកំណត់មុខសញ្ញាអត្តសញ្ញាណ ជនបរាជ័យទាំង៥ប្រភេទខាងលើនេះ។ នគរបាលត្រូវតាមដានពពួកជនទាំងនេះ ជាប់ជាប្រចាំ ដើម្បីកាត់បន្ថយហានិភ័យដែលពួកគេ អាចឈានទៅធ្វើអំពើហិង្សាណាមួយទៅលើអ្នកដទៃនៅទីសាធារណៈ៕

...more