អស់រយៈពេលជាងមួយខែមកហើយ ដែលទីក្រុងសៀងហៃ បេះដូងសេដ្ឋកិច្ចរបស់ចិន​ ត្រូវបាន​រាំងខ្ទប់ទាំងស្រុង យ៉ាងតឹងតែងបំផុត ដើម្បី​បង្អាក់​ការឆ្លងរាលដាល ជម្ងឺកូវីដ​១៩។ នៅរដ្ឋធានីប៉េកាំងឯនោះវិញ អាជ្ញាធរចិនបាន​បន្ថែមវិធានការរិតបន្តឹងកាន់តែខ្លាំងផងដែរ ខណៈដែលទីក្រុងមួយចំនួនទៀត ត្រូវបាន​បិទមួយផ្នែក ឬទាំងស្រុង។ កម្មវិធីប្រកួតកីឡា អាស៊ីហ្គេម ដែលគេគ្រោងធ្វើនៅប្រទេសចិន នៅខែកញ្ញាខាងមុខ ក៏ត្រូវបាន​គេសម្រេចលើកពេល​ដែរ។ វិធានការ​បិទខ្ទប់យ៉ាងតឹងតែងនេះ នៅតែត្រូវបាន​រដ្ឋាភិបាលចិន មានះអនុវត្តវា បើទោះបីជាមាន​មតិកាន់តែច្រើន បានលើកឡើងថា វាកំពុងតែបង្កការប៉ះពាល់ខ្លាំងសម្បើមណាស់ ទៅលើសេដ្ឋកិច្ចរបស់​ចិន។