ថ្ងៃទី២៤កុម្ភៈ គឺជាថ្ងៃគម្រប់ខួបមួយឆ្នាំហើយ នៃសង្គ្រាមឈ្លានពានរបស់​រុស្ស៊ី​នៅអ៊ុយក្រែន​។ សង្គ្រាមដែលកំពុងស្ថិតនៅក្នុងដំណាក់កាលជាប់គាំង ដោយ​ភាគីទាំងសងខាង អះអាងប្តេជ្ញាថានឹងប្រយុទ្ធយកឈ្នះ តែរៀងៗខ្លួន។ សង្គ្រាមនៅអ៊ុយក្រែន ក៏បានឆ្លុះបង្ហាញ​ឲ្យ​ឃើញ​ពី​ការប្រឈមមុខដាក់គ្នាខ្លាំងទៅៗ រវាងរុស្ស៊ី ជាមួយនឹងក្រុមប្រទេសលោកខាងលិច ដែលសហរដ្ឋអាមេរិកជាអ្នកដឹកនាំ ហើយ​អ្វីដែលគេព្រួយបារម្ភបំផុតនោះ គឺ​លទ្ធភាព​ផ្ទុះសង្គ្រាម​នុយក្លេអ៊ែរ បន្ទាប់ពីលោក​ពូទីន​បាន​ប្រកាសព្យួរសន្ធិសញ្ញា New Start។ កាលពីថ្ងៃពុធទី​២២កុម្ភៈ​ លោក​វ៉ាង យី បានធ្វើដំណើរទៅក្រុងម៉ូស្គូ ដើម្បីនិយាយពី “ផែនការដំណោះស្រាយសន្តិភាព” ជាមួយ​នឹងលោក​ពូទីន។ ចិនសន្យាថា នឹងបង្ហាញ​ផែនការរបស់ខ្លួនជាសាធារណៈ ក្នុងសប្តាហ៍នេះ ក្នុងឱកាសខួប​១ឆ្នាំនៃសង្គ្រាមនៅអ៊ុយក្រែន​។