នៅរដ្ឋធានី​ប្រាស៊ីលីយ៉ា ប្រទេសប្រេស៊ីល កាលពីថ្ងៃអាទិត្យទី៨មករា​ ហេតុការណ៍ចលនាចលដ៏ហិង្សា បាន​កើតឡើង បន្ទាប់​ពីក្រុម​អ្នកគាំទ្រ​លោកអតីត​ប្រធានាធិបតី ​បុលសូណារ៉ូ ជាច្រើនពាន់នាក់ បានសំរុកចូលទន្រ្ទានក្នុង​អាគារ​ស្ថាប័ន​កំពូលទាំង៣ របស់រដ្ឋ។ វិមានប្រធានាធិបតី វិមាន​សភាខុនហ្ក្រេស និង​តុលាការកំពូល ត្រូវ​បាន​ក្រុមបាតុករហិង្សាជ្រុលនិយម ចូលទៅវាយបំផ្លាញយ៉ាងដំណំ ដើម្បី​ប្រឆាំងនឹង​ការឡើងមកកាន់អំណាច របស់​លោក​ប្រធានាធិបតីលូឡា។ នេះគឺជាព្រឹត្តិការណ៍ជាប្រវត្តិសាស្ត្រ ដែល​របបប្រជាធិបតេយ្យ​ប្រេស៊ីល រងគ្រោះរង្គោះរង្គើរ ដោយសារតែចរន្តចលនាស្តាំនិយមជ្រុល​ដ៏ហិង្សា។ អ្នកវិភាគខ្លះ បានចាត់ទុកព្រឹត្តិការណ៍នេះ​ថាជា ការប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាលស្របច្បាប់ ថែមទៀតផង។