July 24, 2025

ទទួលទានអាហារពេលល្ងាច កាន់តែឆាប់កាន់តែល្អសម្រាប់សុខភាព

8 minutes

ជម្រើសម្ហូបអាហារមានសារៈសំខាន់ណាស់សម្រាប់សុខភាព។ ពេលម៉ោងទទួលទានអាហារក៏សំខាន់ដែរ។ តើអ្នកដឹងទេ ថាម៉ោងទទួលទានអាហារ អាចជះឥទ្ធិពលអាក្រក់ដល់សុខភាព? អ្នកវិទ្យាសាស្ត្រផ្តល់សេចក្តីបំភ្លឺថាហេតុអ្វីត្រូវឆាប់ទទួលទានអាហារល្ងាច។

មនុស្សភាគច្រើនប្រុងប្រយ័ត្នខ្លាំងណាស់នៅពេលហូបចុកម្តងៗ។ មិនហ៊ានហូបនេះ តមអាហារនោះ ឬសុខចិត្តអត់ផងក៏មាន ដើម្បីរក្សារាង និងក្នុងបំណងថែរក្សាសុខភាពឱ្យបានល្អ។ ការហូបចុកពិតជាសំខាន់មែនហើយ ប៉ុន្តែពេលម៉ោងទទួលទានអាហារក៏សំខាន់ខ្លាំងដែរ ជាពិសេសអាហារពេលល្ងាចតែម្តង។ លោកអ្នកប្រាកដជាធ្លាប់ឮសេចក្តីណែនាំរបស់គ្រូពេទ្យ កុំឱ្យទទួលទានអាហារច្រើននៅល្ងាច និង ឆាប់ទទួលទានអាហារពេលល្ងាច ហើយមែនទេ?

ហេតុអ្វីត្រូវឆាប់ទទួលទានអាហារពេលល្ងាច?

គុណប្រយោជន៍មួយក្នុងចំណោមគុណប្រយោជន៍ជាច្រើននៃការឆាប់ទទួលទានអាហារល្ងាច គឺជួយសម្រួលដំណេក នៅពេលយប់។ នៅពេលបរិភោគអាហារពេលល្ងាច យប់ខ្លាំងពេក អ្នកនឹងរុញពន្យឺតពេលម៉ោងចូលសំរាន្ត និងរារាំងយន្តការរំលាយអាហារ។ នៅពេលក្រពះកំពុងកិនរំលាយអាហារ ខ្លួនប្រាណនឹងឡើងកម្តៅ។ ការឡើងកម្តៅសីតុណ្ហភាព ជាកត្តាមួយនាំឱ្យរំខានដល់ដំណើរងោយងុយ។ ដើម្បីមានអារម្មណ៍ងុយគេង និងអាចសំរាន្តលក់ស្រួល សីតុណ្ហភាពខ្លួនប្រាណត្រូវចុះត្រជាក់ជាងពេលធម្មតាបន្តិច។

ម្យ៉ាងទៀត ប្រសិនបើអ្នកមានបញ្ហាក្រពះ ឧស្សាហ៍ភើ ច្រាលឡើងជាតិអាស៊ីតផង នោះអ្នកត្រូវតែទទួលទានអាហារល្ងាចឱ្យបានយ៉ាងហោចបីម៉ោងមុនចូលសំរាន្តទើបល្អ។ ការទទួលទានអាហារល្ងាចច្រើនពេក បូកផ្សំនឹងអាហារសម្បូរទៅដោយជាតិខ្លាញ់ច្រើនទៀត នោះក្រពះច្បាស់ជាត្រូវពេលវេលាច្រើនសម្រាប់រំលាយ។ គ្រោះហានិភ័យកើតរោគច្រាលទឹកអាស៊ីត នឹងកើនឡើង ព្រោះការទំរេតខ្លួនដេក ក្រោយបាយហើយភ្លាម ជាពិសេសបើដេកផ្អៀងទៅខាងស្តាំ ប្រៀបដូចជាផ្កាប់ក្រពះចាក់អាហារឱ្យចេញមកវិញ។ អ៊ីចឹងហើយបានជាមានអាការៈឡើងច្រាលអាស៊ីត និងរលាកក្រពះ។

ជាងនេះទៅទៀត បើតាមអ្នកស្រាវជ្រាវ ការឆាប់ទទួលទានអាហារពេលល្ងាច អាចជាឱកាសអត់អាហារបានយូរម៉ោង គ្រប់គ្រាន់ល្អសម្រាប់សុខភាព។ ការអត់អាហារ យ៉ាងហោច១២ម៉ោងជាប់គ្នា ឬច្រើនជាងនេះ អាចជះឥទ្ធិពលវិជ្ជមាន ដល់ប្រព័ន្ធមេតាបូលិក ជាពិសេសមេតាបូលិកខាងចាត់ចែងជាតិស្ករ និងសម្ពាធឈាម។ អត់អាហាររយៈពេលវែងជាអន្ទាក់ចងភ្ជាប់នាំទៅរកការជួយបញ្ចុះហានិភ័យនៃគ្រោះថ្នាក់សរសៃឈាមខួរក្បាល។

ទម្លាប់ល្អនេះអាចជួយកាត់បន្ថយគ្រោះកើតជំងឺសរសៃឈាមបេះដូងទៀត។ បើតាមការសិក្សាថ្មី ដឹកនាំដោយវិទ្យាស្ថានស្រាវជ្រាវវេជ្ជសាស្ត្របារាំង អ្នកដែលបរិភោគអាហារល្ងាចនៅក្រោយម៉ោង៩យប់ មានហានិភ័យកើតជំងឺសរសៃឈាមបេះដូង ២៨%លើសអ្នកដែលទទួលទានអាហារល្ងាចនៅមុនម៉ោង៨ល្ងាច។ ភាពខុសគ្នាមានកាន់តែច្បាស់ខ្លាំងសម្រាប់ស្ត្រីភេទ។ ឆាប់បាយល្ងាច ទំនងអាចចូលរួមចំណែកជួយគ្រប់គ្រងទម្ងន់មិនឱ្យឡើងគីឡូបានទៀតផង។

តើត្រូវទទួលទានអាហារល្ងាចនៅម៉ោងប៉ុន្មាន ដែលល្អបំផុតនោះ ?

សរីរាង្គកាយមនុស្សធ្វើសកម្មភាពបំប្លែងអាហារមិនដូចគ្នាទេ រវាងអាហារពេលព្រឹក ពេលថ្ងៃ និងពេលល្ងាច។ មានន័យថា អាហារមួយចានក្នុងបរិមាណនិងគុណភាពដូចគ្នា តែទទួលទានខុសពេលម៉ោងគ្នា ជាបាយថ្ងៃត្រង់និងបាយល្ងាច នឹងជះឥទ្ធិពលទៅលើសុខភាពខុសគ្នាស្រលះ ជាពិសេសការបំប្លែងជាតិស្ករ។ សកម្មភាពធ្វើមេតាបូលិករបស់សរីរាង្គកាយ មានសក្តិសិទ្ធភាព ធ្លាក់ចុះទៅតាមពេលវេលា។ ឧទាហរណ៍ ការចាត់ចែងបំប្លែងអត្រាជាតិស្ករក្នុងឈាម បានល្អ ប្រកបដោយប្រសិទ្ធភាពខ្លាំងនៅពេលព្រឹក ជាងនៅពេលល្ងាច និងជាងនៅពេលយប់ ដែលអរមូនមេឡាតូនីន ចាប់ផ្តើមចេញសាយភាព ពោលគឺយើងចាប់ផ្តើមងងុយគេង។ គ្មានការបំប្លែង គ្មានសកម្មភាពមេតាបូលិកត្រឹមត្រូវ ខ្លាញ់នឹងកកស្តុកក្នុងពោះ។ នេះបើតាមការសិក្សាដដែលដោយសង្កត់ធ្ងន់ថា ការបរិភោគអាហារនៅពេលយប់ជ្រៅពេកនឹងសម្រួលឱ្យមានសល់ជាតិខ្លាញ់ក្នុងឈាម ហើយធ្វើឱ្យឆាប់ឃ្លានទៀត។

នៅក្នុងអនុសាសន៍ ក្រុមអ្នកវិទ្យាសាស្ត្របានណែនាំឱ្យទទួលទានអាហារឱ្យបានមុនម៉ោង៨យប់ សម្រាប់ទម្លាប់របស់បណ្តាជនបារាំង ដែលចូលធ្វើការនៅម៉ោង៩-១០ព្រឹក។ ពេលម៉ោងបាយល្ងាចនេះអាចប្រែប្រួលទៅតាមប្រពៃណីទំនៀមទម្លាប់របស់ប្រទេសនីមួយដែរ។ តែគោលការណ៍មានតែមួយគឺ ប្រសិនបើអាច ត្រូវសម្របម៉ោងបាយល្ងាច ទៅនឹងពេលភ្ញាក់ ដើម្បីធ្វើយ៉ាងណាឱ្យរយៈពេលអត់អាហារ បានវែងបំផុតតាមតែអាចធ្វើទៅបាន យ៉ាងហោចប្រមាណជាង១២ម៉ោង។

បាយល្ងាចត្រូវតិចជាងពេលព្រឹកនិងពេលថ្ងៃ?

តាមក្បួន អាហារពេលល្ងាចត្រូវឱ្យតិចជាងពេលព្រឹក និងពេលថ្ងៃត្រង់។ ប៉ុន្តែសម្រាប់មនុស្សសម័យថ្មី និងសម្រាប់អ្នកធ្វើការ ក៏ដូចជាក្មេងកំពុងពេញវ័យសិក្សា មនុស្សភាគច្រើនគ្មានពេលវេលាច្រើនទេ នៅពេលថ្ងៃ និងមិនអាចផ្តល់តម្លៃខ្លាំងដល់ការទទួលទានអាហារពេលថ្ងៃត្រង់បានឡើយ។ ទាំងក្មេងទាំងចាស់ បាយថ្ងៃ គ្រាន់តែជាការបរិភោគបំបាត់ឃ្លាន។ ដូច្នេះអាហារត្រឹមត្រូវ និងសំខាន់ ត្រូវលើកទៅហូបជុំគ្នានៅពេលល្ងាច និងមិនអាចបរិភោគឆាប់បានទេ។

ក្នុងករណី អ្នកមិនអាចទទួលទានអាហារល្ងាច តាំងពីក្បាលព្រលប់បានទេ សូមព្យាយាមបរិភោគឱ្យបានបីម៉ោងមុនចូលសំរាន្ត និងកុំបរិភោគច្រើន ឱ្យឆ្អែតជ្រុលពេក។ អាហារល្អ អាហារឆ្ងាញ់ ផ្តល់សុខភាពល្អ មិនមែនជាអាហារក្នុងបរិមាណច្រើន សុទ្ធតែសាច់ទេ តែជាអាហារដែលងាយរលាយ ជាអាហារដែលមានជាតិខ្លាញ់តិច និងមិនធ្វើឱ្យឡើងជាតិស្ករខ្លាំង។ គំរូអាហារពេលល្ងាចត្រឹមត្រូវមានលំនឹង គឺ ពិសាបន្លែឱ្យបានច្រើន ក្នុងបរិមាណពាក់កណ្តាល ជាតិប្រូតេអ៊ីន (សាច់សត្វឬពិសេសត្រី) និងជាតិម្សៅ (បាយ នំប៉័ង ប៉ាត់) តែមួយភាគបួនបានហើយក្នុងមួយមុខៗ។

សូមប្រយ័ត្ន! ពាក្យថាបរិភោគអាហារពេលល្ងាចកុំឱ្យឆ្អែតជ្រុល មិនមែនមានន័យថា ត្រូវបន្ថយឱ្យនៅតិចខ្លាំង និងមិនហូបសោះនោះទេ។ តិចពេក ឬអត់ហូបល្ងាច អាចជះឥទ្ធិពលបញ្ច្រាស ព្រោះយើងអាចកើតរោគឃ្លានពេលយប់ ហើយទ្រាំមិនបានក៏ទៅហូបច្បិចច្បុចទាំងយប់។ ទង្វើនេះគ្រោះថ្នាក់ខ្លាំងណាស់សម្រាប់សុខភាព ព្រោះវានឹងរំខានសង្វាក់មេតាបូលិកផង ងាយធ្វើឱ្យធាត់ផង។

អាហារព្រឹកសំខាន់ជាងគេបំផុត?

ការលោតរំលង មិនបរិភោគអាហារនៅពេលយប់ ឬនៅពេលណាមួយ សុទ្ធតែមិនមែនជាអ្វីដែលអ្នកវិទ្យាសាស្ត្រចង់ណែនាំឡើយ។ អ្នកខ្លះ ដោយមានអារម្មណ៍ខុសខ្លួន ទទួលទានអាហារពេលល្ងាចច្រើនជ្រុល និងយប់ជ្រុលពេក ព្រឹកឡើងមិនស្រស់ស្រូបអាហារពេលព្រឹក។ សម្រាប់មនុស្សធំពេញវ័យ មិនស្រស់ស្រូបពេលព្រឹកក៏មិនអីដែរ តែចំពោះក្មេងវិញ ការមិនស្រស់ស្រូបអាហារពេលព្រឹក សំខាន់ខ្លាំងជាងគេបំផុត សំខាន់ជាងអាហារពេលថ្ងៃនិងពេលល្ងាចខ្លាំងណាស់។ ការសិក្សាតាមដានក្មេងរយៈពេល២០ឆ្នាំបានបង្ហាញឱ្យឃើញថា កុមារនិងក្មេងជំទង់ (៩ទៅ១៥ឆ្នាំ) ពេញវ័យលូតលាស់ មិនទទួលទានអាហារពេលព្រឹក មានអត្រាជាតិខ្លាញ់កូឡេស្តេរ៉ូលអាក្រក់ក្នុងឈាមខ្ពស់ នៅពេលធំ ដែលជាហេតុធ្វើឱ្យពួកគេប្រឈមនឹងគ្រោះកើតជំងឺសរសៃឈាមបេះដូងនៅពេលចាស់ឡើង។

ចំពោះមនុស្សធំ ដោយជាក់ស្តែង បើមិនឃ្លាន យើងមិនគួរប្រឹងបរិភោគទេ។ ប៉ុន្តែការឃ្លានជាអាការៈជំងឺធម្មជាតិ។ ហេតុដូច្នេះហើយបានជាលោកវេជ្ជបណ្ឌិត Michel Cymes យល់ថានៅពេលមានអាការៈមិនឃ្លាន មិនចង់ទទួលទានអាហារនៅពេលណាមួយ អ្នកត្រូវចោទសួរខ្លួនឯងភ្លាម អំពីរបៀបរបបរស់នៅប្រចាំថ្ងៃ ៖ តើខ្ញុំមិនបានបរិភោគច្រើនជ្រុលនៅពេលល្ងាចទេឬ? តើខ្ញុំមិនហូបបាយល្ងាច នៅយប់ជ្រៅពេកទេឬ? តើខ្ញុំដេកជ្រុល ក្រភ្ញាក់នៅពេលព្រលឹមមែនទេ? នៅពេលរកចម្លើយឱ្យសំណួរទាំងបីនេះបានហើយ អ្នកពិតជាអាចរកឃើញទម្លាប់អាក្រក់ណាមួយរបស់ខ្លួន ហើយសាកល្បងប្តូរវាចោលទៅ នោះអ្នកនឹងអាចឃ្លានទៀងពេលបានយ៉ាងត្រឹមត្រូវហើយ៕

...more