De Döschkassen

By Heiko KrollComedy Society & Culture News News Commentary

De Döschkassen episodes

August 18, 2023 Keen Platz för Fachlüüd
Keen Platz för Fachlüüd
Vöriged Johr bün ich mol mit‘ Auto no Stuttgart fohrt. Op de A5 bi Frankfurt an‘ Main heff ick ehr dorbi to’n ersten Mol sehn: De Teststreck för elektrische Lastwogens, de sick den Saft mit Stromafnehmers as ’n Strootenbohn vun ’n Böberleitung trecken schüllt.
So’n Streck gifft dat je ook op de A1 mang Hamborg un Lübeck un noch een op’n Bunnesstroot in’t Badische.
Op de A5 weer ’n Barg Verkehr, as ick dor langfohrt bün. Ick glööv so veel Autos as op de achtspoorige Autobohn heff ick vörher noch nie op’nmol sehn. Nu heff ick bi de Fohrt dör’t Gewusel mol tellt, wo veele elektrische Lastwogens dor ünnerwegens weern. De Fingers heff ick för’t Telln ni vut Stüüer nehm‘ musst, denn ick heff ni een‘ eenzigen Strom-Laster to sehn kreegen. Null.
Nu is dat je so, dat allerhand Ingenieure un so al 2019 seggt hebbt, wat dat dumm‘ Tüch weer, mit de Stromleitung‘.
Overs de Meenung vun de Fachlüüd wull man in’t Verkehrsministerium eenfach ni heuern. Man harr sien eegene Experten, Experten de veel vun Strom kinnt hebbt, overs nix vun Lastwogens. Dorüm wurrn erstmol de Strippen trocken. Intwüschen harrn Mercedes, MAN, DAF un so wieder al afwunken. De wulln sick an den Krom ni bedeeligen. Blots Scania kunn Lastwogens mit Stromafnehmers leevern – för 1,5 Millioon‘ dat Stück. Un dat weer noch de afgespeckte Version. Noch dorto keem de Lasters fief Monot‘ loter as plont. De wurrn nömli vun’t Verkehrsministerium to lot bestellt. Intwüschen kann man an de Kabels veellicht noch Wäsche to’n Dröögen ophangen. 190 Millioon Euro an Stüüergeld hett de Spoß mol even kost‘. Overs man wull je eenfach ni op de Lüüd heuern, de dor würkli wat vun kinnt.
Jüst so is dat mit de Regeerungsfleegers. Meist jede Floogsellschop hett de A340 in’t Programm. Dor flücht se ook ganz wunnerbor. Mach ween, dat de Floogsellschopen eenfach betere Mechanikers hebbt, de sick mit de Fleegers utkint.
Un weller datsülbige Bild: De Bund will anschiend eenfach nix mit echte Fachlüüd to kriegen hebben…
In düssen Sinn
3 min
August 11, 2023 Agent 007 in de Kaserne
Oha, in de Bunneswehr hebbt se ’n russischen Spioon tofot‘ kreegen. Dat hannelt sick üm ’n Offizier, de för de Anschaffung vun Soldaten-Utrüstung‘ un gröttere Waffensüsteme tostänni is – oder beter geseggt – tostänni ween is.
Un man mach gor ni glööven, wodör de dorste Spioon sick verroden hett: He is in’t russische Generalkunsulat in Bonn un in de russische Botschaft in Berlin ween. Dor hett he sien Tosomarbeid anboden un he hett ook al düt un dat verroden.
Dor fallt een echt nix mehr to in. Jüst so good harr he sick ’n russische Flagge an de Wand in sien Stuuv hangen kunnt. Oder he harr in de Kantine jümmers Borschtsch statt Swattsuuer eeten kunnt.
Mit de AfD hett he ook al lang op Du un Du stohn. Wo kann dat angohn, dat ’n Offizier mit so’n Opgooven, de sick so un so al verdächti mokt hett, eenfach so mit de russiche Botschaft un dat Konsulat tosomarbeiden kann.
Dat is so, as wenn man weet, dat de Marder ünnerwegens is, man over nix dorgegen deiht, sünnern ook noch de Döör vun‘ Heunerstall wiet opmokt.
De Vörsitter vun Kontrull-Utschuss för de Geheimdeenste, Konstantin von Notz vun de Greun‘ seggt natüürli, wat dat „grooten Erfolg vun de Spionage-Afwehr“ ween is.
Na denn. Uns‘ halved Land hett 40 Johr Stasi-Erfohrung op’t Konto, overs ’n Spioon fallt hier erst op, wenn he al meist bi de Spionage-Afwehr op’n Schoot sitten deiht.
De Offizier is je ook ni dat erste russiche Kuckucks-Ei, dat bi de Bunneswehr in’t Nest leggt worrn is.
Ick glööv, mien Oma harr de Banditen gauer tofot kreegen, de kunn man nömli gor nix verheimlichen.
Tscha, un James Bond harr sick wechlacht un erstmol ’n Wodka-Martini schlüft.
Oogenblick mol – worüm eegentli „Wodka“-Martini? Ohaueha, harr 007 ook Kontakt no Moskau? Jo, dor weer doch wat: „Leevesgrööte ut Moskau“, hett een Bond-Film ut de 60er Johrn mit Jean Connery heeten.
Na jo, wo dat bi unse Truppe mit de Leevensgrööte „no“ Moskau wiedergeiht, is overs meist jüst so spannend as ’n „echten“ Bond-Film…
In düssen Sinn
3 min
August 04, 2023 Ganz in Roh‘ dör de Unennlichkeit
Dormols, dat is al lang her, in’t Johr 1977, dor hett de Nasa de Sonde „Voyager 2“ in den Unennlichkeit schickt. Nu 46 Johr loter, bebbt de Lüüd, de den dorsten Apparot Kommandos gifft, de Sonde so’n poor falsche Informatschoon tofunkt.
Voyager twee hett jüst wegen de dorsten Kommandos de Antenn‘ vun de Eer wechdreiht.
Nu is de Kontakt wech. Dat hett wiss düchti Larm för de geeven, de düsse Kommandos rutjogt hebbt.
Dat gifft noch de lütte Schangs, wat dat Dorste Dings sick in Oktober vun alleent weller op de Eer utricht‘.
Man ward dat sehn.
Wat mi overs veel mehr Gedanken mokt, is, dat de Sonde no 46 Johr man jüst bummeli 80 Milliarden Kilometer vun uns wech is. Anners geseggt: 75 Lichtstünnen.
De näste Stern blang de Sünn is overs veer Lichtjohr wiet vun uns wech. Dat heet rund 470 mol so wiet, as Voyager twee al flogen is. De wurr dor erst in 21000 Johr ankom‘.
Jüst dorüm glööv ick je ook ni doran, dat wi irgendwann mol Lüüd to sehn kriegt, de vun ’n annern Planet‘ no uns kümmt oder wi no ehr.
Seeker, dat mach ween, wat dat noch annere Planeten mit Leven dorop gifft. Veellicht eet de ook op ehr Oart Bickbeern-Pannkooken oder Möötbüddel un all sowat.
Overs eher wi de mol „Moin“ seggen künnt, mööt wi weenstern duusend mol so gau ween, as Voyager twee.
Un wenn ick mi bekiek, wolang dat bi uns duuert, ’n Andrag för irgendwat to stelln – annerlei wat –, kann ick mi even ni vörstelln, dat wülk vun uns mol gauer sünd, as de dorste Sonde.
Nu vertellt uns de Sonde erstmol je ni mehr, wat se süht.
Un se süht in de nästen 20000 Johr wohrschienli ook överhaupt nix. Dat ward ’n tehmli langwielige Tour, dücht mi.
Op de anner Sied is de fleegende Kist‘ je in ganz besünnere Situatschoon – tominst bet Oktober, veellicht overs ook för ümmer: Bi ehr klingelt erstmol keen Telefoon, un keeneen seggt ehr wat se dohn oder loten schall.
Wenn man mol genau doröver nodinkt, kann man so’n lütt beten neidisch op Voyager twee warrn...

In düssen Sinn

3 min
July 28, 2023 Spoorn in de Schokolod‘
Also, wenn ick ehrli bün, denn heff ick bi de Verpackung‘ vun Levensmidels fröher nie op de Listen mit de „Inhaltsstoffe“ keeken, de dor je achter opdruckt sünd.
Nierdings doh ick dat overs doch. Ni jümmers, overs af un to.
Menniged, wat dor steiht, versteiht man je gor ni. Tominst heff ick vun düt un dat, wat dor steiht mien Levdag noch nix heuert.
Ick glööv ook ni allns wat dor to leesen is. Veellicht wüllt de Lüüd, de dat Eeten herstellt, je ook gor ni, dat man würkli weet, wat se dor allns rinsmeeten hebbt. Overs dat Gesetz schrievt ehr nu mol vör, dat se dor wat opschrieven mööt. Un dat is mitünner recht dösige Literatur.
Nehmt wi mol Muuermanns-Marmelod‘, also Zwiebelmett as Bispeel. De Marke segg ick nu ni.
Overs ick, as Verbruuker, wurr erstmol dinken, wat dor Fleesch un Zwiebeln bin sünd. Wieder nix.
Achter steiht overs op: „94 Perzent Swienfleesch, Kooksolt, Gewürze un Gewürzextrakte“. Aha.
Un denn: „0,3 Perzent Zwiebeln.“ Jungedi! Un wieder: „Säuerungsmittel: Melksäure, Stabilisator: Natriumlactat.“ Dat mutt ick dreemol leesen, eher ick dat utsnacken kann. Overs dat weer noch lang ni allns. Dor kümmt noch: „Verdickungsmittel: Guarkernmehl“ un „Ascorbinsäure“, as Antioxidatschoonsmiddel, wohrschienli dormit dat Mett keen Rust ansett. Denn noch de Konserveerungsstoff: Natriumnitrit“ un „Reifekulturen“, wat jümmers dat för Kultuurn sünd, de dat Fleesch anschiend riep mokt.
Jo, man mutt sick würkli wunnern, wat in de Leevensmiddels allns bin is. Tomeist is dat je ook so lütt schreeven, dat man dor meist mit ’n Mikroskop bimutt, üm dat to leesen.
Achter op’n Tofel Schokolod‘, heff ick sogor al mol leest, wat dor „Spoorn vun Erdnööt“ bin ween künnt.
Dor weer dat bi mi ganz vörbi. Ick heff nömli al veel heuert, overs ni, dat Erdnööt loopen künnt.
Wo anners schulln se sünst de Spoorn in de Schokolod‘ moken?
Ohaueha. Ick glööv, ick hol doch leever weller op, mi den dorsten Krom dörtoleesen...

In düssen Sinn
3 min
July 21, 2023 Dat is ’n reine Energie-Froog...
Wenn man in Dithmarschen dör de Gegend fohrt, gifft dat blots wenige Steeden vun de ut man keen Windenergie-Anlog sehn kann. De Dingers haut bi uns al meist mit de Flünken tosom. Mit Photovoltaik-Anlogen ist dat al meist jüst so.
Un genau so stellt Robert Habeck un sien Truppe sick je de Tokunft vör. He kümmt je ook ut Sleswig-Hulsteen. Dor hett he sick wohrschienli dacht: Wat hier geiht, mutt annerwegens jüst so gohn.
Annerwegens süht dat overs noch ganz anners ut. In Bayern to’n Bispeel gifft dat geföhlt mehr Dörpskarken as Strom-Windmöhln.
Dor kann man weenstern an jede Eck de Hannen falten un för mehr Strom beeden, wenn dat Licht utgeiht.
Mit de Atomkraft – annerlei, wat man dorvun hölt, – is dat hier vörbi. Dorför ward Gas mit Scheep rankoort, un de Bruunkohle hett je ook fröher al funktschoneert, üm den Saft in de Steekdosen to kriegen. Un wat denn noch fehlt, köfft wi in’t Utland to, dat noch Atomkraft hett.
So’n Öko-Bilanz harrn de Greun‘ fröher jede Regeerung üm de Ohrn haut, dat dat blots so rökelt harr.
Dormit de Energie-Wenn‘ klappen deh, so as Habeck sick dat utmolt hett, mutt de Utbuu vun Wind un Solar veermol so gau gohn, as nu. So gau geiht dat overs ni.
Un wat seggt de Kanzler dorto? He seggt dat, wat he jümmers vertellt: „Dat heff ick jümmers al seggt.“ Un: „Dat hebbt je ook all wusst.“ Also ick heff dat ni wusst. Un ick heff ook nie heuert, dat Scholz mol seggt hett, dat de Bunnesrepublik as Industrienatschoon bald ni mehr in de Loog is, sick üm den eegen‘ Strom to kümmern. Nu is Düütschland je overs ook dat Land vun de Dichters un Dinkers. So kann man över den Snurrkrom bald je veellicht ’n poor scheune Gedichte un Bööker leesen. Jungedi. Sowat kann man sick alleent gor ni utdinken.
Dorno, wo sick dat mit de Energiewenn‘ verhölt, harr man vörher je ook mol Lüüd frogen kunnt, de sick mit sowat utkinnt.
Overs veellicht wull man de Energie, üm dat ruttofinnen in’t Energieministerium ni opwennen. Dat harr je veels to veel Energie kost‘...
In düssen Sinn
3 min
July 14, 2023 Wohlföhl-Technik
Wenn man no’n Dokter kümmt, denn ward een je toerst oftmols de Blootdruck meeten. Un dat is ’n echt figeliensche Sook. Wenn man ’n richti gooden Blootdruck hett, denn is de 120 to 80. Overs wat heet dat överhaupt? 120 to 80?
Tscha, dat hett mit Quecksülber un mit Heuern to dohn. Dorüm hebbt de Dokters fröher ook jümmers ehr Stethoskop in de Ohrn hatt bi’t Blootdruck meeten. Un dat gung so: In de Manschette, de man üm‘ Arm kriegt, ward so lang Luft rinpumpt, bet keen Dropen Bloot mehr dör de Odern kümmt.
Denn ward de Druck langsom afloten, de wurr ganz toerst in Millimeter op’n Quecksülbersüül meeten – mm/Hg, so heet dat jümmers noch.
Wenn denn bi jeden Hartslag weller ’n beten Bloot dör de Odern kümmt, heuert sick dat in’t Stethoskop an as ’n Goorn-Schlauch mit ’n Knick bin.
Wenn dat so dat Rauschen anfangt, hett man den ersten Wert, also 120, wenn man Glück hett.
Op’t Letzt‘, wenn de Druck in de Manschette jümmers weniger ward, is weller so veel Platz in de Odern, wat man dat Bloot ni mehr heuern kann. Düsse Övergang is de tweete Wert, de an leevsten 80 ween schall.
Den ganzen Snurrkrom hett sick mol ’n Italiener utdacht. Un dat funktschoneert würkli good. Dat heet: Dat hett good funktschoneert. Fröher mol, as dat noch mit ’n mechanischen Druckmeter un ’n Stethoskop mokt wurr.
Intwüschen gifft dat meist blots noch elektroonische Apparote to’n Blootdruck meeten, weil je dör de moderne Technik allns beter ward, ne. Vun düsse elektroonischen Wunnerkassens hebbt wi dree Stück in’t Huus. Wenn ick mi overs mit de Dree Dingers achter’nanner wech den Blootdruck meet, denn kümmt dor jedet mol wat ganz anners rut. No den een Apparot bün ick kerngesund, no den nästen schull ick al mol anfangen, mi op’n Karkhoff ’n Lock to buddeln. Dat is keen exakte Weetenschop, dat is Alchemie.
Overs ick weet mi to hölpen: Ick meet eenfach jümmers mit den Apparot, no denn ick den besten Blootdruck heff. Un denn föhl ick mi glieks weller richti good…
In düssen Sinn
3 min
July 07, 2023 Lütte groote Lüüd
Kinner to hebben is bilütten jüst so fiegeliensch as dat weer, sülms Kind to ween.
Un wenn de „Lütten“ denn 18 Johr un öller ward, anfangt Auto to fohrn un ’n eegene Wohnung hebbt, denn föhlt sick dat ganz dösig an.
So lang se noch to Huus wohnt, seggt man je jümmers noch: „Kannst Du dien Stuuv ni mol oprüüm?“ Oder: „Muttst Du dien Schoh jümmers meern in’t Gelach stohn loten?“ Oder: „Hest Du Dien Schoolarbeiden al trech?“ Oder: „Muttst Du jümmers op dien Smartfohn kieken?“
Bi all de Froogen rullt se denn natüürli mit de Oogen.
Se ward overs ook slagferti: „Wat schall ick nu toerst moken? Mien Stuuv oprüüm, de Schoh wechstell oder de Schoolarbeiden moken? Dat Handy wechpacken? Un worüm hest Du Dien Schoh eegenli ni anstänni wechstellt?“ Dor ward denn noch achteran schooven: „Wenn Ju fiern goht, worüm schall ick dat denn ni?“
Tscha, gor ni so eenfach.
Ick heff fröher jümmers luud „Indioner-Musik“ heuert, as mien Vadder dat nöömt hett. Vun all dat, wat passert is, wenn ick an’t Weekenenn ünnerwegens weer, will ick an düsse Steed leever nix to’n Besten geeven. Ick weet gor ni, wo mien Öllern dat utholn hebbt.
Denn kümmt man irgendwann op de Sätze, de man sülms vun sien Öllern heuert hett: „Du muttst Di op’t Leven vörbereiden. Dor kriegt man nix verschinkt!“
Nu is overs de Welt in de de „Lütten“ opwasst, ganz anners as de, in de man sülms opwussen is. Un unse Welt weer ganz anners as de, in de uns‘ Öllern opwussen sünd. Un mit dat, wat mien Öllern wusst hebbt, kümmt man hüüt an mennige Steeden ni mehr wiet. Dorüm mutt ick de beiden, uns‘ Deern un unsen Jung – de Jung wohnt noch bi uns, de Deern kümmt blots an de Weekenenn mol vörbi – dorüm mutt ick de beiden hier mol ganz offiziell seggen: „Ju mokt dat al. Un ick bün stolt op Ju beiden.“ Bilütten vergeet man sowat nömli, wenn man blots op dat kiekt, wat ni dor is un an dat vörbi kiekt, wat de lütten grooten Lüüd al op’n Kassen hebbt. Veellicht kinnt annere Öllern dat je ook...
In düssen Sinn
3 min
June 30, 2023 Ick bün al een!
Dat gifft je veele Sellschopsspeele to kööpen. Wülk mit Breed‘, mit Würfels, mit Koarten, wülk to de man Batterien un noch meh Tobeheur bruukt oder ook allns tosom.
Dor kann man richti veel Geld för utgeeven. Mien Madam un ick speelt overs oftmols ’n Speel, dat gor nix kost‘. Över den Noom vun dat Speel hebbt wi uns noch gor keen Gedanken mokt. Seggt wi mol, dat heet „Een ween“.
An un för sick is Dat ’n Afwannlung vun „Was bin ich“, blots ohne Robert Lemke – wenn den överhaupt noch een kinnt. Ook ohne Swien, wo fief Mark rinkümmt.
Un wenn mi un mien Fruu mol langwieli is, denn froogt se bilütten: „Wullt Du een ween?“ Un ick segg denn: „Ick bün al een.“
Denn heff ick mi al ’n prominente Person utsöcht, de se roden schall. Wenn se de Person roden hett, tuuscht wi. Denn is se een un ick mutt roden.
Nu finnd mien Sonja dat overs beter, wenn se een is un ick roden mutt. Blangbi heuert ehr je de Stimm to, de in de Titelmusik to den Pocast, den „Podkassen“ to düsse Kolumne in’t Internet to heuern is.
Wenn ick also roden mutt, denn is allns in Ordnung.
Wenn se overs roden mutt, ward dat mitünner hokeli. Seggt wi mol, ick heff mi uttacht, Dieter Hallervorden to ween. Denn froogt se: „Büst Du ’n Mann?“ Ick: „Jo.“ Se: „Levst Du noch?“ Ick: „Jo.“ Se: „Kümmst Du ut de USA?“ Ick: „Nä.“ Se: „Büst Du Olaf Scholz?“ Ick „Nä.“ Se: „Denn weet ick dat ni.“ Ick denn: „Du muttst overs wieder roden!“ Se: „Ick weet dat overs ni.“ Ick: „Dorüm schallst Du je ook roden.“ Se: „Kann ick ni weller een ween?“
Tscha, ’n Tatortkommissarin ward mien Leevste seeker ni erst. Se finnd dat mit ’n poor Tipps op’t Letzt‘ overs doch jümmers rut.
Un denn is se weller een. Dat kann man ook mit mehr Lüüd speeln.
Ick kinn meist keen annered Speel, dat so veel Spoß mokt un bi dat man so veel lachen kann.
Un för denn Fall, dat Ju düssed Speel ook gefallt, künnt Ju dormit direkt losleggen. Eeenfah so. Veellicht wüllt Ju sülms je mol een ween...
In düssen Sinn
3 min
June 23, 2023 Eensomed Geschäft
No de Wohln in Mai hebbt veele Dörpers un Städte in Dithmarschen niede Gemeendevertredungen (GV) oder ’n frischen Stadtrot kreegen.
Mennige Dörpers hebbt nu ook ’n niede Börgermeisterin oder ’n nieden Börgermeister, wenn dat denn wülk geev, de düssen Posten övernehm‘ wulln. Dat weer ni överall so.
Bi uns in Windbargen hebbt wi nu overs ’n nieden Börgermeister. Christian Hanßen heet he. Chischan is Schoolmaster un man jüst 38 Johr jung. Noch dorto hett he vörher noch ni veel mit Kommunalpolitik an Hoot hatt. Chapeau! An Dingsdag weer de konstitueernde Sitzung vun de niede GV un de Verafscheedung vun all, de sick ut de GV trüchtrocken hebbt, no dat se sick in de vörigen Johrn hunnerte oder gor duusende vun Stünnen för ehr Dörp insett hebbt.
Wat mi overs ümmer weller wunnert, un ick heff al in mennige annere Dörper GV-Sitzungen mitbelevt, is, dat in de Versammlungsrüüm tomeist blots de Gemeendevertreders, een vun’t Amt un veellicht noch ’n poor Dörpsbewohners togegen sünd. Un düsse Dörpsbewohners sünd oder weern tomeist sülms in’t Ehr’namt engascheert.
Bi de Sitzung an Dingsdag in unsen Dörpskrog weer dat mol weller ni anners: Blang de scheedenden un de nieden Gemeendevertreders weern noch söben oder acht Dörpsbewohners op’n Sool – tomeist weller Ehr’namtler oder wülk, de mol ’n Ehrnamt bekleed‘ hebbt. Dösig, ne? Stell di vör, wi begrööt ’n nieden Börgermeister un keeneen geiht hen.
Ward in de GV overs wat entscheed, dat de een oder den annern achteran suuer opstött, denn is de Larm groot. Denn ward vun „de dor boben“ snackt. Dat sünd overs keen vun dor boben, de sünd ni höger oder sieder as all de annern. De sitt overs över ehr Ünnerlogen un haut sick op Sitzungen de Tied üm de Ohrn, in de annere ehr Frietied geneet‘. De GV is’n hoged Good. Liekers is dat doch ’n recht eensomed Geschäft. Overs weil de GV sick vör uns, de Bögers, insett, ook, wenn se dat ni all recht moken künnt, hebbt de Lüüd mien allergröttsten Respekt. Un wenn ick gnegeln will, goh ick no de Sitzung‘ anstatt achteran to schimpen...
In düssen Sinn
3 min
June 16, 2023 Chips to’n Afnehm‘
An un för sick sünd Katten je ni veel anners as Minschen. Jede Katt hett ehrn eegenen Charakter. De een‘ sitt gern op’n Schoot, lött sick striegeln un snurrt, de anner‘ kleiht een de Oogen ut, wenn man ehr blots anfot‘.
Bi’t Eeten is dat ook ni anners. De een‘ itt gern un veel, de anner‘ ni so. De een‘ nehmt twee Pund to, wenn se blots an Freetnapf vörbilöppt de anner‘ anner kann ’n halved Swien in een Rutsch wechneihn, blifft overs liekers rank un slank.
So as bi unse Katten, ’n Katt un ’n Koter, ümgenau to ween. De Katt süht ut as ’n Medizinball, de Koter as ’n Athlet bi Olümpia.
Nu mutt de Katt overs dohl vun ehr Gewicht. De kann sick al gor ni mehr richti röhrn, so pummeli is se.
Dorüm hebbt wi Diät-Fudder köfft. Dat kriegt beide, denn, man kann den een‘ Tiger je ni vertelln, dat he wat anners eeten schall as de annere.
Dat Ergeevnis: De Katt is so dick bleeven, as se weer un de Koter ward jümmers dünner. He mach den Diät-Krom nömli ni. De lött dat liggen. So haut de Katt sick sien Portschoon ook noch wech. Wat moken? Mien Fruu hett nu elektroonische Fudder-Spenners funnen. De reageert op de Chips, de de Katten so un so in de Nack inplanteert hebbt.
So kriegt de Katt blots noch ’n beten Diät-Fudder un de Koter kriegt normoled Eeeten. Und dorvun kriegt he so veel as he will.
Wat dat ni allns gifft, ne.
Nu wüllt wi mol aftööven, wat passeert. Un wenn de Katt würkli dünner ward, denn warr ick hanneln.
Mi is nömli ’n Idee kom‘ – morns, as ick no’t Duuschen in’t Adamskostüm vör’n Speegel stunn.
Wat bi Katten geiht, mutt doch ook bi Minschen gohn. Ick heff je ook veels to veel op de Rippen.
Dor weer dat doch ganz wunnerbor, wenn de Köhlschapp vör mi blots 20 Sekunnen an Dag opgehit – un denn ook blots de Beriek mit Eeten, dat ni dick mokt. Dat mutt sick doch realiseern loten.
Jo, wenn wenn de Katt würkli afnehmt, denn stoh ick, een, twee, dree bi’n Tierarzt op de Matte.
Un denn lot ick mi vun den Kattenmediziner ook so’n Chip achter an Hals insetten...
In düssen Sinn
3 min

About De Döschkassen

From the publisher's feed

Seit Jahren hat sie einen festen Platz in den Tageszeitungen von Boyens Medien: die Platt-Kolumne „De Döschkassen“. Mit dem etwas anderen Blick auf die Themen, die die Menschen bewegen, aber auch für…