សង្រ្គាមពាក្យសម្តី​កំពុង​បន្ត​មាន​យ៉ាង​ផុសផុល​ជុំវិញ​ការ​បែកធ្លាយ​បំពង់​បង្ហូរ​ឧស្ម័ន Nord Stream 1 និង Nord Stream 2 នៅ​ក្រោម​សមុទ្រ​បាល់ទិក​កាល​ពី​ថ្ងៃ​ចន្ទ ទី២៧ កញ្ញា។ បំពង់​បង្ហូរ​ឧស្ម័ន​ទាំង​ពីរ​នេះ​បាន ត ភ្ជាប់​ពី​ប្រទេស​រុស្ស៊ី​ទៅ​ប្រទេស​អាល្លឺម៉ង់។ ការ​បែក​ធ្លាយ​មាន ៣កន្លែង​ផ្សេង​គ្នា​ដោយ​មាន​ពីរ​កន្លែង​នៅ​លើ​បំពង់ Nord stream 1 ក្នុង​នោះ មាន​មួយ​កន្លែង​ស្ថិត​ក្នុង​ដែន​ទឹក​របស់​ដាណឺម៉ាក និង​មួយ​កន្លែង​ទៀត​ស្ថិត​ក្នុង​ដែន​ទឹក​របស់​ស៊ុយអែត។ ចំណែក​ការ​ធ្លាយ​មួយ​កន្លែង​លើ​បំពង់ Nord Stream 2 ស្ថិត​ក្នុង​ដែន​ទឹក​សេដ្ឋកិច្ច​ផ្តាច់មុខ​របស់​ដាណឺម៉ាក។ ខណៈ​នេះ ការ​ស៊ើបអង្កេត​មួយ​បាន​បើក​ធ្វើ​ដើម្បី​ស្វែង​រក​ការ​ពិត​ជុំវិញ​ការ​បែក​ធ្លាយ​បំពង់ Nord Stream ទាំង​ពីរ។