നാം പ്രത്യാശയെ നാട്ടുനനയ്ക്കുന്നു , തൊഴിലില്ലാത്തവരും തടവുപുള്ളികളും ചെയ്യന്നതുപോലെ ...

കവി പറഞ്ഞു : കടൽകാക്കകൾ തട്ടിപ്പറിച്ച തിര എന്റേതാണ് ...

ആരാണ് കവി ? ഒരു വാതിലിൽ നിന്നും മറ്റൊരു വാതിലിലേക്ക് നടക്കുന്നവൻ ...മമതകൾ ഇല്ലാത്തവൻ .

അപ്പോൾ കവിയെ നമ്മൾ എവിടെ മറവുചെയ്യും ? മറവിയിലോ ?

Mahmoud Darwish നെ ചുറ്റിപ്പറ്റി അലയുന്ന ഒരു പോഡ്കാസ്റ്റ് കാറ്റ് .

സ്നേഹപൂർവ്വം 

എസ് . ഗോപാലകൃഷ്ണൻ 

ഡൽഹി 

09 March 2021 

dillidalipodcast.com

PROMETHEUS 1930

ഒരു ചുവർചിത്രവും കലാകാരനും

ദില്ലി -ദാലിയിൽ ഒരു പോഡ്കാസ്റ്റ്

ഒരഗ്നിബാധയിൽ ഇടതുകൈ നഷ്ടപ്പെട്ട മെക്സിക്കൻ ചുവർചിത്രകാരൻ അഗ്നിയ്ക്ക് നൽകിയ മറുപടിയാണ് ലോകോത്തരമായ fresco Prometheus (1930 )

ക്രിസ്തു സ്വന്തം കുരിശുതകർക്കുന്ന ചിത്രത്തിലൂടെ മെക്സിക്കോ ശ്രദ്ധിച്ച ഈ കലാപകാരിയെ ലോകം ശ്രദ്ധിച്ചത്   Prometheus ലൂടെയാണ്.   Jackson Pollock പറഞ്ഞത് വടക്കേ അമേരിക്കയിലെ എക്കാലത്തെയും പ്രധാനപ്പെട്ട painting ഇതാണെന്നാണ് .

പോഡ്കാസ്റ്റ്  കേട്ടാലും .

സ്നേഹപൂർവ്വം

എസ് . ഗോപാലകൃഷ്ണൻ

ഡൽഹി

06 മാർച്ച് 2021

മിയാൻ കി തോടി

ഒരു ആത്മഛായാശബ്ദചിത്രം

ഒരു പരീക്ഷണപോഡ്‌കാസ്റ്റിലേക്ക് സ്വാഗതം

1963 ൽ പണ്ഡിറ്റ് ഭീംസെൻ ജോഷി പാടിയ മിയാൻ കി തോടി കേട്ടപ്പോൾ എന്റെ മനസ്സ് സഞ്ചരിച്ച ദൂരങ്ങൾ ഒരു ശബ്ദചിത്രമാക്കാൻ ശ്രമിച്ചതാണിത് .

33 ആനകളുടെ വലുപ്പമുള്ള ഒരു നീലത്തിമിംഗലം, ഒരു ചിത്രശലഭത്തിന്റെ ജന്മം , ശ്രീനാരായണഗുരു ജീവിച്ചപ്പോൾ ജീവിച്ച ദസ്തയ്വ്സ്കിയുടെ നരകചിന്ത , ബാപ്പുവിനോട് കലഹിക്കുന്ന ബാ, ആനന്ദനോട് ബുദ്ധൻ പറഞ്ഞത് , വാസവദത്ത ഉപഗുപ്തനോട് പറഞ്ഞത്, പിക്കാസോയുടെ പകൽ , വിശുദ്ധയൂദായുടെ ആത്മഹത്യ , അരവിന്ദന്റെ മരണം , കബീറിന്റെ തോളുരുമ്മൽ , സുഗതകുമാരിയുടെ കാലിലെ ചങ്ങലകൾ ....

ഒരസാധാരണഗായകൻ എന്നെ നയിച്ച വിഭ്രാന്തശബ്ദഘരാന

സ്നേഹത്തോടെ

എസ് . ഗോപാലകൃഷ്ണൻ

ഡൽഹി

25 ഫെബ്രുവരി 2021

പ്രിയ സുഹൃത്തേ ,

റഷ്യയിൽ വ്ലാദിമിർ  പുടിനെതിരെ നിർണ്ണായകമായ രാഷ്ട്രീയ നീക്കങ്ങൾ നടത്തുന്ന വിവാദനായകനെക്കുറിച്ചാണ് ഈ പോഡ്കാസ്റ്റ് . റഷ്യൻ സമകാലീന ആഭ്യന്തര  രാഷ്ട്രീയത്തേയും സമ്പദ്‌രംഗത്തേയും വിദേശബന്ധങ്ങളേയും അടുത്ത് പഠിക്കുന്ന ഡോക്ടർ ഉമാ പുരുഷോത്തമനാണ് ദില്ലി -ദാലിയിലെ അതിഥി . സെൻട്രൽ യൂണിവേഴ്സിറ്റി ഓഫ് കേരളായിൽ International Relations and Politics ൽ അധ്യാപികയാണ് ഉമ .

വ്ലാദിമിർ പുടിൻ ഇതുവരെ നാവെടുത്തുപേര് പറയാത്ത ഒരാളാണ് അലക്സി നവൽനി എന്ന 44 കാരൻ . പക്ഷേ പുടിൻ ഈ തീപ്പൊരിയെ ഭയക്കുന്നുണ്ടോ ? അല്ലെങ്കിൽ എന്തിന് കേസ്സുകൾ കൊണ്ട് അയാളെ വേട്ടയാടണം ? വിദേശത്തുവെച്ചു നവൽനിക്ക് വിഷബാധയേൽക്കണം ? നവൽനി ഒരു നഗരപ്രതിഭാസം മാത്രമോ ?

എന്താണ് ഇയാളുടെ രാഷ്ട്രീയം ? സാമ്പത്തികദർശനം ? സ്ത്രീകളുടെ ഇടയിൽ ആരാണ് കൂടുതൽ ജനകീയൻ ? യുവാക്കൾ എന്തുകൊണ്ട് നവൽനിയെ ഇഷ്ടപ്പെടുന്നു ? എന്തുകൊണ്ട് ആഗോളമാധ്യമങ്ങൾ റഷ്യൻ കാര്യങ്ങൾ വലുതായി റിപ്പോർട് ചെയ്യാത്തത് ? നവൽനി പൂർണ്ണമായും സോവിയറ്റാനാന്തര രാഷ്ട്രീയത്തിന്റെ ഉൽപന്നമാണോ ? നവൽനിയ്ക്ക് റഷ്യയുടെ അയൽരാജ്യങ്ങളുമായുള്ള ബന്ധങ്ങൾ എങ്ങനെയാണ് ? നവൽനിയുടെ രാഷ്ട്രീയപാർട്ടിയായ Russia for the Future എത്രമാത്രം സംഘടിതമാണ് ? റഷ്യയിൽ കമ്മ്യുണിസ്റ് പാർട്ടിയുണ്ടോ ? USSR ശാസ്ത്രരംഗത്തുണ്ടാക്കിയ മുന്നേറ്റങ്ങൾ റഷ്യയ്ക്ക് മുന്നോട്ടുകൊണ്ടുപോകാൻ കഴിയുന്നുണ്ടോ ? ഇന്ത്യയുമായുള്ള ബന്ധം ?

റഷ്യൻ രാഷ്ട്രീയത്തെ ആഴത്തിൽ മനസ്സിലാക്കാൻ ഒരു ശ്രമം .

പോഡ്‌കാസ്റ്റിലേക്ക് സ്വാഗതം

എസ് . ഗോപാലകൃഷ്ണൻ

ഡൽഹി

23 ഫെബ്രുവരി 2021

രാഷ്ട്രീയപാർട്ടിയിൽ ചേരാതെ മൈസൂർ പ്രധാനമന്ത്രിയായ സർ മോക്ഷഗുണ്ഡം  വിശ്വേശ്വരയ്യ

പ്രിയ സുഹൃത്തേ ,

ആധുനിക ഇന്ത്യയുടെ സാമ്പത്തികാസൂത്രണത്തിന്റെ പിതാവ് എന്നറിയപ്പെടുന്ന എം വിശേശ്വരയ്യ ഇന്ത്യ കണ്ട എക്കാലത്തേയും വലിയ എഞ്ചിനീയർമാരിൽ ഒരാൾ ആയിരുന്നു  . മൈസൂർ രാജാവ് അദ്ദേഹത്തെ പ്രധാനമന്ത്രിയാക്കി. ഹൈദരാബാദിലെ നിസാമും പ്രധാനമന്ത്രിയാക്കാൻ മുന്നോട്ടുവന്നു . ഗാന്ധിയോടു വിയോജിച്ചു , എന്നിട്ടും ഗാന്ധി ആദരിച്ചു . നേതാജി വികസനകാര്യങ്ങളിൽ സംശയം വന്നാൽ അദ്ദേഹത്തെ സമീപിച്ചു . ഭാവിയിലെ ഇന്ത്യ എങ്ങനെയാകണമെന്ന് പണ്ഡിറ്റ് നെഹ്‌റുവിനെ ഉപദേശിച്ചു . എന്നിട്ടും ഒരു രാഷ്ട്രീയപ്പാർട്ടിയിലും ചേരാതെ  ഇന്ത്യയുടെ പഞ്ചവത്സരപദ്ധതികളുടെ അസ്ഥിവാരമിട്ടു. 1955 ൽ ജവഹർലാൽ നെഹ്രുവിനോപ്പം ഭാരതരത്നം പങ്കിട്ടു . തൊണ്ണൂറ്റിയെട്ടാം  വയസ്സിൽ ഒരു പത്രലേഖകൻ ചോദിച്ചു , എന്താണ് ഈ ദീർഘായുസിന്റെ രഹസ്യം ? അദ്ദേഹം പറഞ്ഞു : മരണം പലപ്പോഴും എന്നെ  അന്വേഷിച്ചു വീട്ടിൽ  വന്നു...ഞാൻ തെരക്കായതിനാൽ അവിടെ ഉണ്ടായിരുന്നില്ല .

ഈ പോഡ്കാസ്റ്റ് കേട്ടാലും

സ്നേഹപൂർവ്വം

എസ് . ഗോപാലകൃഷ്ണൻ

20 ഫെബ്രുവരി 2021

ഡൽഹി

പ്രിയ സുഹൃത്തേ ,

ചരിത്രം തുറന്ന വാഹനത്തിൽ കൈകൂപ്പി കടന്നുപോകുമ്പോൾ വഴിവക്കിൽ മിഴിനട്ടുനിന്നുകളഞ്ഞ ബാലനായിരുന്നു പുതുക്കുടി ബാലേട്ടൻ.

അനശ്വരനായ ഒരു കാണി.

ഊരിയ കത്തിയുമായി നിൽക്കുന്ന വൈക്കം മുഹമ്മദ് ബഷീറിനെ ആശുപത്രിയിൽ കൊണ്ടുപോകുമ്പോഴും ബാലേട്ടന് അതേ മാനസികാവസ്ഥയായിരുന്നു.

1940 കളിൽ  എൻ വി കൃഷ്ണവാര്യർ എഡിറ്റ് ചെയ്തിരുന്ന സ്വന്തന്ത്രഭാരതം പത്രം   കല്ലായിയിലെ തന്റെ മേൽനോട്ടത്തിലുള്ള  തടിലോറികളിൽ  കയറ്റിഅയക്കുമ്പോഴും അതേ മാനസികാവസ്ഥ . ദാർശനികനായ ഗവേഷകൻ  നിസ്സാർ അഹമ്മദ്  മധ്യവേനലവധിയ്ക്ക് കാൺപൂരുനിന്നും വരാൻ കാത്തിരുന്ന ബാലേട്ടൻ.  വ്യക്തിസ്വാതന്ത്ര്യം ഉയർത്തിപ്പിടിക്കാൻ ഓരോ ബന്ദുദിവസവും കറുത്തമുണ്ടുടുത്ത് കാറിൽ കയറി ഇടതു -വലതു ഭേദമന്യേ കല്ലേറുവാങ്ങിയ ബാലേട്ടൻ.

പുതുക്കുടി ബാലേട്ടനെ പരിചയപ്പെട്ടുകഴിഞ്ഞപ്പോഴാണ് എനിക്കു മനസ്സിലായത് കല്ലായിപ്പുഴയിൽ മാത്രമല്ല മനുഷ്യരിലും കനപ്പെട്ട ഈട്ടിത്തടികൾ ഉണ്ടാക്കാമെന്ന്.

പോഡ്കാസ്റ്റ് കേട്ടാലും, ഒരോർമ്മച്ചിത്രം

സ്നേഹപൂർവ്വം

എസ് . ഗോപാലകൃഷ്ണൻ

ഡൽഹി

18 ഫെബ്രുവരി 2021

മിയാൻമാർ മരീചിക

ജനാധിപത്യം പട്ടാളം സമൂഹം

The Hindu ദിനപ്പത്രത്തിൽ International Affairs Editor സ്റ്റാൻലി ജോണി , മിയാൻമാറിൽ ജീവിച്ച , ഇപ്പോൾ ചെന്നൈയിൽ ശിവ് നാടാർ കോളേജിൽ അധ്യാപകരായ ഡോ . ചെറി മാത്യു ഫിലിപ്പോസ്  , ഡോ .ദീപേഷ് ചന്ദ്രശേഖരൻ എന്നിവർ പങ്കെടുക്കുന്ന ആഴമുള്ള

ചർച്ച

എന്തുകൊണ്ട് മിയാൻമാറിൽ ജനാധിപത്യഭരണം അട്ടിമറിക്കപ്പെട്ടു ?

ഭരണഘടനാപ്രകാരം തന്നെ എങ്ങനെ ആ രാജ്യത്തിൽ പട്ടാളത്തിന് മേൽക്കൈ വരുന്നു ?

എന്തുകൊണ്ട് ജനാധിപത്യനായിക ഓങ് സാൻ സ്യൂചിയ്ക്ക് ഒരിക്കലും രാജ്യത്തിന്റെ പ്രസിഡണ്ട് ആകാൻ കഴിയില്ല ?

എന്നിട്ടും സ്യൂചി എങ്ങനെ പട്ടാളത്തെ ജനാധിപത്യത്താൽ ചെറുക്കുന്നു ?

എന്തുകൊണ്ട് പട്ടാളക്കാരുടെ ഭാര്യമാർ സ്യൂചിയ്ക്ക് വോട്ടുചെയ്യുന്നു ?

ബർമ്മയിലെ ഏഴ് വിവിധ വംശീയവിഭാഗങ്ങളും ദേശീയതാപ്രശ്‌നവും എങ്ങനെ കൂടിക്കുഴയുന്നു ?

യുവാക്കൾ പുതിയ നീക്കങ്ങൾ നടത്തുന്നുവോ ?

സ്യൂചിയിൽ എത്ര ഗാന്ധി ?

ബുദ്ധമതത്തിലെ അക്രമശാഖകൾ ?

മിയാൻമാറും ഇന്റർനെറ്റും അവിടുത്തെ ജനാധിപത്യവും ?

റോഹിൻഗ്യൻ പ്രശ്നത്തിൽ സ്യൂചി  ജനാധിപത്യവാദിയാണ് ?

ബൗദ്ധപാഠശാലകൾ രാഷ്ട്രീയശാഖകളോ ?

രാജ്യത്തെ രാഷ്ട്രീയം ഇനി എങ്ങോട്ട് ? പട്ടാളത്തിന്റെ പരിമിതികൾ ?

എന്താണ് തെരുവിൽ കുട്ടികൾ കാണിക്കുന്ന മൂന്നുവിരൽ പ്രതിഷേധം ?

അമിതാധികാരദാഹിയായ മിയാൻമാർ പട്ടാളം എങ്ങനെ മുന്നോട്ടു നീങ്ങും ?

മിയാൻമാറിലെ സ്ത്രീകളും ജനാധിപത്യപ്രസ്ഥാനവും ?

രാജ്യത്തിന്റെ സമ്പദ്‌വ്യവസ്ഥ എത്ര ഭദ്രം ?

മിയാൻമാറിലെ ജനാധിപത്യത്തിലെ പുതിയ പ്രതിസന്ധിയിൽ എന്തുകൊണ്ട് ഇന്ത്യ ശക്തമായ നിലപാട് എടുക്കുന്നില്ല ?

സമഗ്രമായ ഒരവലോകനം .

പോഡ്‌കാസ്റ്റിലേക്ക് സ്വാഗതം

സ്നേഹപൂർവ്വം

എസ് . ഗോപാലകൃഷ്ണൻ

16 ഫെബ്രുവരി 2021

ഡൽഹി

dillidalipodcast.com

സംഗീതചരിത്രത്തിലെ ഏറ്റവും വലിയ  പ്രണയപ്രാർത്ഥന

2021 പ്രണയദിന പോഡ്കാസ്റ്റ്

മൊസാർട് സി -മൈനറിൽ മഹാപ്രാർത്ഥന ചെയ്തത് കാമുകിയെ  ദൈവം നൽകിയതിനുള്ള നന്ദിസൂചകമായിട്ടായിരുന്നു .

അച്ഛൻ എതിരു നിന്ന പ്രണയം . അച്ഛനെ മെരുക്കാൻ മഹാനായ മൊസാർട് സംഗീതത്തിൽ ചെയ്ത ശ്രമങ്ങൾ , പരാജയങ്ങൾ .

മരിയ കോൺസ്റ്റാൻസ് എന്ന ഗായിക മോസർട്ടിന്റെ ജീവിതത്തിലേക്ക് വന്ന കഥയും ആ മനോഹര സംഗീതശിൽപവുമാണ് ഈ പോഡ്കാസ്റ്റ് .

സ്നേഹപൂർവ്വം

എസ് . ഗോപാലകൃഷ്ണൻ

14 ഫെബ്രുവരി 2021 , ഡൽഹി

പ്രിയസുഹൃത്തേ ,

1971 ഫെബ്രുവരി പതിനൊന്നാം തീയതിയാണ് കുറ്റിപ്പുഴ കൃഷ്ണപിള്ള അന്തരിച്ചത് . 

അതായത് ഇന്നേക്ക് അൻപതുകൊല്ലങ്ങൾക്കു മുൻപ് .

അദ്ദേഹത്തെ അടുത്തറിഞ്ഞ , അദ്ദേഹവുമായി കത്തിടപാടുകൾ ഉണ്ടായിരുന്ന , കൗമാരത്തിൽ സഹോദരൻ അയ്യപ്പനേയും MC ജോസഫിനെയും കുറ്റിപ്പുഴയേയും ഒരുമിച്ചു കാണാൻ കഴിഞ്ഞ ആഹ്ലാദം ഇപ്പോഴും കൊണ്ടു നടക്കുന്ന ഡോക്ടർ ബി ഇക്‌ബാൽ കുറ്റിപ്പുഴയെ അനുസ്മരിക്കുന്നു .

ലോകത്തിലെ യുക്തിവാദ ചരിത്രത്തിൽ കുറ്റിപ്പുഴ ഏത് സരണിയിൽ പെടുന്നു ? കേരള റസ്സലോ ? കുറ്റിപ്പുഴ അജ്ഞേയവാദിയായിരുന്നോ ?

ദൈവവധം  എന്ന സങ്കുചിതപദ്ധതിയിൽ നിന്നും അദ്ദേഹത്തിൻറെ അന്വേഷണ പഥം എങ്ങനെ വ്യത്യസ്‌തമായി ? ഇന്നത്തെ ആഗോളതലത്തിലെ നവനാസ്തികരുടെ നിലപാടുകൾ എന്ത് ?

സഹോദരൻ അയ്യപ്പന്റേയും കുറ്റിപ്പുഴയുടേയും ശ്രീ നാരായണ ഗുരു പൈതൃകം ? 1968 ൽ വി ടി ഭട്ടതിരിപ്പാട് കാഞ്ഞങ്ങാടു നിന്നും ചെമ്പഴന്തി വരെ നടത്തിയ ഒരു ജാഥയുടെ പ്രാധാന്യം , ആ തലമുറ തുറന്ന ശാസ്ത്രാവബോധത്തിന്റെ വാതിലുകൾ പുതിയ നവോത്ഥാന ചർച്ചകളിൽ എന്തുകൊണ്ട് കടന്നുവരുന്നില്ല ? കുറ്റിപ്പുഴ മലയാളിക്ക് പരിചയപ്പെടുത്തിയ വിശ്വസാഹിത്യം , അദ്ദേഹം വിവർത്തനം ചെയ്ത ഓസ്കാർ വൈൽഡ് , കമ്മ്യുണിസത്തോടും ഗാന്ധിയോടുമുള്ള സമീപനം , ട്രോട്സ്കിയെക്കുറിച്ച് കുറ്റിപ്പുഴ എഴുതിയ ലേഖനവും അതിലെ സ്റ്റാലിനും ....

കുറ്റിപ്പുഴയുടെ ധൈഷണികജീവിതത്തെക്കുറിച്ച് വികാരപരമായ ഒരു അനുസ്മരണമാണ് ഈ പോഡ്കാസ്റ്റ് .

ഡോ . ഇക്‌ബാലിന് നന്ദി .

സ്നേഹപൂർവ്വം

എസ് . ഗോപാലകൃഷ്ണൻ

11 ഫെബ്രുവരി 2021

ഡൽഹി

dillidalipodcast.com

ഫെബ്രുവരി ആദ്യവാരം അന്തരിച്ച ചരിത്രകാരൻ പ്രൊഫസ്സർ DN Jha യ്ക്കുള്ള ആദരപോഡ്കാസ്റ്റ് ആണിത് .

വിശുദ്ധപശു എന്ന മിത്ത്എന്ന പുസ്തകത്തിലെ  ' മാംസം ഭക്ഷണമാണ് , യാജ്ഞവൽക്യന് ഇഷ്ടം ബീഫ് ആയിരുന്നു' എന്ന അദ്ധ്യായത്തിന്റെ പ്രസക്തഭാഗങ്ങൾ ആണിത് .

ഋഗ് വേദത്തിന്റെ പത്താം അദ്ധ്യായത്തിൽ അതിഥികൾക്കായി ഭക്ഷണമാകാൻ അർഹമായ പശുക്കളെ കുറിച്ച് പറയുന്നത് , ശതപഥബ്രാഹ്മണത്തിൽ മാംസമാണ് ഏറ്റവും നല്ല ഭക്ഷണം എന്ന് പറയുന്നത് , പശു അന്നം തന്നെയാണ് എന്ന് തൈത്തിരീയ ബ്രാഹ്മണത്തിൽ പറയുന്നത് ...

ഏറെ ചർച്ചാവിഷയമായ പുസ്തകത്തെ അവലംബിച്ച പോഡ്‌കാസ്റ്റിലേക്ക് സ്വാഗതം

സ്നേഹപൂർവ്വം

എസ് . ഗോപാലകൃഷ്ണൻ

ഡൽഹി , 09 ഫെബ്രുവരി 2021

dillidalipodcast.com