ថ្ងៃទី​៩ឧសភា នៅទីក្រុងម៉ូស្គូ លោក​ប្រធានាធិបតី​រុស្ស៊ី វ្លាឌីមៀរ ពូទីន បានចូល​ក្នុង​កម្មវិធីដង្ហែរ​ក្បួន​ព្យុហយាត្រាកងទ័ពដ៏ធំមួយ ដើម្បីអបអរជ័យជំនះរបស់រុស្ស៊ី ទៅលើ​របបអ៊ីទ្លែរណាស៊ី កាលពីជំនាន់សង្គ្រាម​លោក​លើកទី២។ ដូចជារៀងរាល់ឆ្នាំ លោកពូទីន យកឱកាសនេះដើម្បី​ថ្លែងសារប្រាប់ទៅប្រជាជនរុស្ស៊ី ក៏ដូចជាពិភពលោកទាំងមូល ឲ្យ​បានដឹងនូវ​ភាពអង់អាច ភាពអស្ចារ្យរបស់កងទ័ពរុស្ស៊ីតាំងតែពីជំនាន់មុន រហូតមកដល់បច្ចុប្បន្ន។ ក្នុង​បរិបទសង្គ្រាមនៅអ៊ុយក្រែននាពេល​នេះ ការប្រារព្ធទិវា ជ័យជំនះ៩ឧសភា នៅទីក្រុងម៉ូស្គូ ត្រូវបាន​គេ​មើលឃើញថា គឺជា​កម្មវិធីឃោសនានយោបាយ​ដ៏ធំអស្ចារ្យ របស់​លោកពូទីន ដើម្បីប្រឆាំងនឹងពួកបស្ចឹមលោក ក៏ដូចជា​​អ៊ុយក្រែន ដែលលោកបានចាត់ទុកថា គឺជារបបណាស៊ីសម័យថ្មី។