ចាប់តាំងពីឆ្នាំ​១៩៧៧មក​ ទិវាសិទ្ធិនារីអន្តរជាតិ ត្រូវបាន​គេប្រារព្ធ​នៅថ្ងៃទី​៨​មីនា ដើម្បីជាឱកាសលើកឡើង ពីស្ថានភាពសិទ្ធិរបស់​ស្ត្រី​ នៅទូទាំងពិភពលោក។ ដូចជារៀងរាល់ឆ្នាំ នៅថ្ងៃ៨មីនានេះ នឹងមានក្បួនដង្ហែរបាតុកម្ម នៅតាមទីក្រុងធំៗជាច្រើន នៅទូទាំងពិភពលោក។ ដោយ​ឡែកនៅតាម​ប្រទេសមួយចំនួនវិញ មិនត្រឹមតែសិទ្ធស្ត្រីបានរងការគំរាមកំហែងប៉ុណ្ណោះទេ តែ​ក្បួនដង្ហែរនៅក្នុងទិវា​៨មីនានេះ ក៏ត្រូវបាន​អាជ្ញាធរ​ហាមឃាត់ដែរ​។ មកទល់ឆ្នាំ២០២៣នេះ ស្ថានភាពសិទ្ធិស្ត្រីបានធ្លាក់ចុះជាខ្លាំង តួយ៉ាងជាមួយនឹងការវិលត្រលប់មកកាន់អំណាចវិញ របស់ក្រុម​តាលីបង់នៅអាហ្វហ្កានីស្ថាន ឬ​​អំណាចកៀបសង្កត់ នៃរបស់រដ្ឋា​ភិបាលអ៊ីស្លាម​ផ្តាច់ការអ៊ីរ៉ង់ជាដើម។