ពិធីបុណ្យចូលឆ្នាំខ្មែរ​នៅឆ្នាំនេះ ​ក្រុមគ្រួសាររបស់​មន្ត្រី ​និង​សកម្ម​ជន​គណ​បក្ស​ប្រ​ឆាំង​ដែលកំពុង​ជាប់​ពន្ធនាគារ​​និងរត់​ភៀសខ្លួន​នៅ​ក្រៅ​ប្រទេស​នោះ​ នៅតែគ្មាន​វាសនា​បាន​ជួបជុំ​ក្រុមគ្រួសារ​ដូចគេនោះ​ទេ​ ដោយសារ​របប​ក្រុង​ភ្នំពេញ​ បន្ត​ធ្វើ​ទុក្ខ​បុក​ម្នេញ​ និង​ចាប់ដាក់​ពន្ធនាគារ​ឥតស្រាក​ស្រាន្ត ​ក្រោម​មូល​ហេតុ​នយោ​បាយ។ក្រុមគ្រួសារ​របស់ពួកគេ​មួយចំនួន​ បានរស់នៅ​បែកបាក់គ្នា​២ឆ្នាំ ហើយ​ខ្លះទៀត​៤ឆ្នាំ​ទៅហើយ​ ចាប់តាំងពី​របបក្រុងភ្នំពេញ​រំលាយ​គណបក្សសង្គ្រោះជាតិ ​កាលពីចុង​ឆ្នាំ២០១៧​មក។ មន្ត្រីសង្គមស៊ីវិល ​យល់ថា ​រដ្ឋាភិបាល ​ល្មមដល់ពេល​បញ្ចប់​វិបត្តិនយោបាយ​ និងបើកឱកាស​ឲ្យពលរដ្ឋ​គ្រប់​និន្នាការ​នយោបាយ​មានសេរី​ភាព​ និងរស់នៅជួបជុំក្រុម គ្រួសារ​​​ឡើងវិញ។