ថ្ងៃ​សៅរិ៍ ទី១៩ វិច្ឆិកានេះ អង្គការ​អន្តរជាតិ​នៃ​ក្រុមប្រទេស​និយាយភាសាបារាំង​ហៅហ្រ្វង់កូហ្វូនី​បើក​កិច្ចប្រជុំកំពូល​លើកទី១៨​រយៈពេល ២ថ្ងៃលើកោះ​ជែរបាស្ថិតប៉ែកខាងត្បូងក្នុងប្រទេស​ទុយនីស៊ី។ កិច្ចប្រជុំកំពូល​ដែល​រៀបចំ​នៅ​រៀងរាល់ ២ឆ្នាំ​ម្តង​មួយ​នេះចូលរួម​ដោយ​ប្រមុខរដ្ឋ និង​ប្រមុខរដ្ឋាភិបាល​មក​ពី​ប្រទេស​សមាជិក រួម​ទាំងអង្គការ​ក្រៅ​រដ្ឋាភិបាល និង​សង្គម​ស៊ីវិលជា​ច្រើន​ផ្សេង​ទៀត​។ កិច្ចប្រជុំកំពូល​លើកទី១៨របស់​អង្គការ​ហ្រ្វង់កូហ្វូនីពេល​នេះ​ធ្វើ​ឡើង​នៅ​ក្នុង​បរិបទ​ដែល​ពិភពលោក​បាន​ស្គាល់ និង​កំពុងឆ្លង​កាត់​នូវ​វិបត្តិ​ជា​បន្តបន្ទាប់ ពិសេស​វិបត្តិ​កូវីដ១៩ និងសង្រ្គាម​រុស្ស៊ី​ឈ្លានពានអ៊ុយក្រែន។ នេះ​ដោយ​មិនទាន់​និយាយ​ពីវិបត្តិ​ដែល​ហ្រ្វង់កូហ្វូនី​ខ្លួន​ឯង​កំពុង​ជួប​ប្រទះ។