គ្រោះមហន្តរាយទឹកជំនន់ នៅប្រទេសប៉ាគីស្ថាន កាលពីសប្តាហ៍កន្លងទៅនេះ បាន​ផ្តាច់ជីវិតមនុស្សជាង​១ពាន់នាក់ និងបានរុញច្រាន​ប្រជាជន​ជាច្រើនលាននាក់ ឲ្យរស់នៅ​ក្នុង​ស្ថានភាព​ដ៏លំបាកជាទីបំផុត។ កង្វះចំណីអាហារ កត្តាអនាម័យសុខភាព កំពុងតែ​បង្កការលំបាកទៅលើប្រជាជនប៉ាគីស្ថាន ដែលមានជីវភាពក្រី​ក្រខ្លាំងស្រាប់ទៅហើយ។ យ៉ាងហោចណាស់ ១ភាគ​៣ នៃផ្ទៃដី​ប៉ាគីស្ថាន ត្រូវបានលិចលង់ដោយ​ទឹកជំនន់ ខណៈអ្នកជំនាញឧតុនិយមអះអាងថា បញ្ហានេះនឹងមិនធូរស្រាលទេ ព្រោះភ្លៀងនឹងបន្តធ្លាក់​បន្ថែមទៀត។ កត្តាជាច្រើនបានគួបផ្សំគ្នា ធ្វើ​ឲ្យ​ប្រទេសក្រីក្រមួយនេះ ធ្លាក់ខ្លួនជាប្រទេសងាយ​រងគ្រោះ​បំផុត​ ដោយ​បញ្ហាបម្រែបម្រួលអាកាសធាតុ។