„Ég var svona barnafyllibytta, byrjaði mjög snemma en hætti líka mjög ungur,“ segir Einar Hermannsson nýkjörinn formaður SÁÁ. „Ég var 11 ára gamall sem telst frekar ungt, ég fór á minn fyrsta AA-fund 17 ára. Var þá búinn að vita í nokkurn tíma að ég ætti við vandamál að stríða.“ Einar hætti svo alfarið að drekka 27 ára.

Einar er líka bisness-maður og hefur undanfarin 20 ár verið framkvæmdastjóri hjá dansk-frönsku fyrirtæki sem er með starfsemi í 52 löndum. „Þeir eru stærstir á sínu sviði í útiauglýsingum. Eru með saminga við flugvelli, reka strætóskýli, almenningssalerni, reiðhjólaleigur og fleira. Velta 350-400 milljörðum.“ Núna rekur hann fyrirtæki með félaga sínum og þeir hyggjast hasla sér völl á því sem hann kallar örflæðismarkaðnum. Það er leiga á faratækjum til skamms tíma eins og rafhlaupahjólum, sem Einar segir að sé á frumstigi og eigi eftir að vaxa mikið. „Ef markaðurinn væri sími, væri hann Nokia 3110 í dag. Breytingarnar eru rosalega örar frá degi til dags. Í Bandaríkjunum eru fyrirtæki þar sem þú pantar heim til þín rafskútu og hún kemur sjálf keyrandi til þín.“