euroradio.fm

Дарагі "Арэшнік" і ты не Коля — Еўразум за 12 снежня | Новости Беларуси за 12 декабря by Euroradio

12 снежня ў эфіры Еўрарадыё — папулярызатар гісторыі, сцэнарыст, журналіст Алесь Кіркевіч.

Беларусы мусяць вырашыць свае праблемы і навесці парадак у краіне. Хай сабе часам і недэмакратычным шляхам. Колькі часу гэта зойме, толькі Бог ведае, але трэба да гэтага быць гатовымі. І калі парадак будзе наведзены, то настане час для цудоўных эканамістаў, для ІТ-шнікаў, якія вярнуцца з Кіпра: для іх і ўсіх астатніх будзе закон і парадак, перакананы Алесь Кіркевіч.

Пра тое, чаму свабоду без крыві не здабыць нават у ХХІ стагоддзі, як нам захаваць сябе ў эміграцыі і ці гатовыя беларусы змагацца са зброяй у руках за сваю будучыню, мы і разважаем у праграме “Ідэя Х” з Алесем Кіркевічам.

Пуцін — не торт і кругленькі стол — Еўразум за 11 снежня | Новости Беларуси за 11 декабря by Euroradio

Журналіст і медыяменеджар Аляксей Дзікавіцкі напісаў чарговую кнігу вершаў на палескай мове. Дагэтуль у зборніку "Оньдэ" ён рэфлексаваў пра падзеі 20-га года, а ў брашуры "Світомузыка" пераклаў для палешукоў тэксты любімых сусветных музычных хітоў.

Чым натхнёная новая кніга? У чым фішка Палесся і палешукоў? Чаму ў горадзе не любяць вясковую мову? Пра ўсё гэта гутарым з Аляксеем у чарговым палескім інтэрв'ю на Еўрарадыё.

Эмігранты-харасеры і бедны Герман — Еўразум за 10 снежня | Новости Беларуси за 10 декабря by Euroradio

Як абраны прэзідэнт Дональд Трамп наведаў Парыж, дзе меў у тым ліку кароткую сустрэчу з Уладзімірам Зяленскім і паспеў зрабіць шэраг гучных заяў. Што падчас яго кіравання дапамога Украіне з боку ЗША, хутчэй за ўсё, зменшыцца, што ён не абавязаны “ўтрымліваць ЗША ў NATO” і што Кіеву і Маскве неабходна тэрмінова спыніць агонь і распачаць перамовы. Што імгненна выклікала як адказ Зяленскага, так і каментар… Пяскова. Як ні дзіўна, Лукашэнка пакуль ніяк выказванні Трампа не пракаментаваў і сваіх парадаў усім бакам будучых перамоў не панадаваў.

Ці варта заявы Трампа, зробленыя да інаўгурацыі, успрымаць як будучую палітыку ЗША ў гэтых кірунках? Якія вынікі будзе мець тое, што на заявы Трампа адказаў не Пуцін, а толькі яго прэс-сакратар — ці не стане гэта для Трампа прыніжэннем? Ці магчымыя змены пазіцыі Захаду адносна Лукашэнкі пасля падпісання ім дамовы аб гарантыях бяспекі з Расіяй і ў выніку праведзеных “выбараў”? На гэтыя ды іншыя пытанні ў эфіры Еўрарадыё адказвае палітычны аглядальнік Віталь Цыганкоў

Як высвятляецца, далёка не ўсе краіны, якія беларусы лічылі дастаткова бяспечнымі для сябе, такімі насамрэч з’яўляюцца. Альбо іх статус нечакана змяніўся. Як прыклад можна прывесці В’етнам і выдачу ўладамі гэтай краіны лукашэнкаўскаму рэжыму Васіля Верамейчыка і Грузію, улады якой пасля выбараў відавочна ўзялі курс на збліжэнне з Масквой і Мінскам. Усё гэта прымушае разважаць пра механізм выхаду з сітуацыі, у якую праз рэжым Лукашэнкі трапілі і Беларусь, і значная колькасць беларускага грамадства.

Ці можа вопыт перамоў польскай “Салідарнасці” і камуністычнага рэжыму тагачаснай Польшчы зрабіцца прыкладам для вырашэння сённяшняй сітуацыі ў Беларусі? На якіх умовах магчымы круглы стол дэмсіл і Лукашэнкі? Ці сапраўды небяспечных для беларусаў краін паболела і як пазбегнуць непрыемных сітуацый? На гэтыя ды іншыя пытанні ў эфіры Еўрарадыё адказвае адвакат, спецыяліст у галіне міжнародна-прававога супрацоўніцтва па крымінальных справах, доктар сацыяльных навук, кіраўнік адвакацкага бюро "Legal status" Алесь Міхалевіч.

Гісторыя мае звычку паўтарацца. Не раз супрацьстаянне з кіроўным рэжымам прыводзіла да паразы апазіцыі. І не раз апаненты рэжыму вымушана выязджалі з роднай краіны за мяжу, дзе ўтваралі пэўныя структуры і працягвалі барацьбу. Але кіроўны рэжым рабіў усё магчымае, каб тым ці іншым чынам такія структуры перасталі існаваць: акты тэрарызму, захоп у закладнікі сваякоў лідараў апазіцыі, рэпрэсіі ў адказ на дзеянні сіл за мяжой, вярбоўка і прапаганда. І часам гэтыя высілкі мелі поспех.

Ці былі ў гісторыі прыклады, калі апазіцыя за мяжой самастойна спыняла сваё існаванне ў жаданні паразумецца з рэжымам? Якія вынікі былі ў такіх дзеянняў і да чаго ў выніку яны прыводзілі? Ці магчымы пачатак нацыянальнага прымірэння ў краіне, калі аўтарытарны рэжым застаецца, а апазіцыя адыходзіць? Пра гэта і шмат што іншае мы і разважаем у жывым эфіры Еўрарадыё з кандыдатам гістарычных навук, маяністам Яўгенам Красуліным

Асад — усё і штучны псіхолаг — Еўразум за 9 снежня | Новости Беларуси за 9 декабря by Euroradio

Пасяджэнне “Вышэйшага дзяржаўнага савета Саюзнай дзяржавы” адбылося 6 снежня ў Мінску. Дзе Лукашэнка і Пуцін падпісалі двухбаковую дамову “Аб гарантыях бяспекі ў рамках Саюзнай дзяржавы”. Вось толькі тое, што канкрэтна было падпісанае, беларусам вырашылі не паказваць. Але “Белпол” сцвярджае, што палажэнні той дамовы падобныя да ўмоў Дамовы аб усёахопным стратэгічным партнёрстве, падпісанай паміж Расіяй і КНДР. А гэта азначае рызыку таго, што створаныя прававыя ўмовы для адпраўкі грамадзян Беларусі на вайну “дзеля абароны тэрытарыяльнай цэласнасці РФ і вонкавых межаў Саюзнай дзяржавы”. Таксама дамова дазваляе Расіі ствараць на тэрыторыі Беларусі дадатковыя вайсковыя базы і размяшчаць вайсковыя кантынгенты і пацвярджае размяшчэнне ядзернай зброі на тэрыторыі Беларусі.

Ці сапраўды падпісанне гэтай дамовы будзе падставай для адпраўкі беларускіх вайскоўцаў ва Украіну і якія пагрозы для Беларусі такі крок стварае? Якім чынам “ядзерны парасон” гарантуе захаванне ўлады Лукашэнку? Ці стаў больш зразумелы “мірны план Трампа” пасля паездкі абранага прэзідэнта ЗША ў Парыж і сустрэчы там з Зяленскім? Гэтыя ды іншыя тэмы абмяркоўваем у штотыднёвым жывым эфіры Еўрарадыё з палітычным аглядальнікам, гісторыкам Аляксандрам Фрыдманам