Samkvæmt reglugerð heilbrigðisráðherra, sem tekur gildi á þriðjudaginn, verða farþegar sem koma frá löndum þar sem nýgengi smita er 700 eða meira á hverja 100.000 þúsund íbúa að fara í sóttkví í sóttvarnahúsi. Þetta á nú við um 16 ríki.

Rösklega 25 þúsund manns verða bólusett við covid-19 í næstu viku. Fram að þessu hafa ekki svo margir fengið sprautu á einni viku.

Tap á rekstri hjúkrunarheimila nam þremur og hálfum milljarði króna árin 2017 til 2019.

Önnur bylgja kórónuveirufaraldursins leikur Indverja grátt. Lýst var yfir neyðarástandi á sjúkrahúsum í Delhi í dag þar sem súrefnisbirgðir eru senn á þrotum.

Ferðamálastjóri segir að ef allt gengur eftir megi búast við að um þrjú þúsund erlendir ferðamenn leggi leið sína í haust daglega að gosinu í Geldingadölum. Undirbúningur við að bæta aðgengi að gosstað er í fullum gangi. Arnar Páll Hauksson talar við Skarphéðin Berg Steinarsson.

Stærsta dagblað Spánar hefur kortlagt og staðfest 306 tilfelli þar sem kennarar og prestar innan kaþólsku kirkjunnar hafa beitt börn kynferðislegu ofbeldi. Blaðið segir að í þessum málum séu 816 fórnarlömb, aðallega drengir, en að ljóst sé að fórnarlömb kirkjunnar manna hlaupi á þúsundum. Flest börn beri harm sinn í hljóði. Jóhann Hlíðar Harðarson segir frá.

Undanfarið hefur hvert spillingarmálið, tengt breska Íhaldsflokknum , rekið annað, nú síðast mál tengt forsætisráðherra. Stjórnarandstaðan gerir sér mikinn mat úr þessum málum og í þeim bergmála spillingarmál fyrri áratuga. Í raun oft þannig að það eru líkur á spillingu ef einn flokkur er lengi við stjórn. Sigrún Davíðsdóttir segir frá.